கல்கியின் தூரிகை; கல்விக்கு பேரிகை!

-

திருநங்கைகள் தம்மை, தம் இருப்பை, தம் திறனை வெளிப்படுத்தும்
ஆரோக்கியமான சூழலுக்க அரசும் ஆதரவுக்கரம் நீட்டுவது மகிழ்ச்சி
அளிக்கிறது. திருநங்கைகள் கவிதைகள், கட்டுரை, படிப்பு, நடிப்பு,
இயக்கம் என கோலோச்சும் காலத்தில் திருநங்கையான கல்கி,
ஓவியத்துறையில் ஓவியராக சாதிக்கத் தொடங்கிவிட்டார்.

சமீபத்தில் அவர் வைத்த ஓவியக் கண்காட்சியில் ஓவியம் விற்ற
பணத்தை நான்கு திருநங்கைகளுக்கு கல்வி உதவித் தொகையாக
வழஙகி நெகிழ வைத்து விட்டார்.

'தமிழகத்தில் திருநங்கை யாராவது இப்படி கண்காட்சி வைக்கும்
அளவு ஓவியராகத் தம்மை வெளிப்படுத்தியிருக்கிறார்களா' என்று
மூத்த ஓவியர் பாலசுப்ரமணியனிடம் கேட்டபோது '30 வருடங்களாக
ஓவியத்தை ஆவணப்படுத்தும் பணியில் ஈடுபட்டுள்ளேன்.

திருநங்கை கல்கியைத் தவிர யாரும் இதுவரை பதிவாகவில்லை'
என்றார். அந்தப் பெருமிதத்தோடு திருநங்கை கல்கியிடம்
உரையாடியதிலிருந்து...
-
'ஐநதாவது ஆறாவது படிக்கிற காலத்தில் பாலியல் குழப்பம்
ஏற்பட்ட போதே எனக்கு ஓவிய ஈடுபாடு வந்துவிட்டது.

என் உணர்வுகளின் குழப்பங்களை அப்போதே ஒவியராக
வெளிப்படுத்தத் தொடங்கி விட்டேன். அப்போதெல்லாம்
உதட்டுச் சாயம் பூசிய உதடுகளையே அதிகம் வரைவேன்.
பூக்களும் உதட்டுச் சாயமும் என் உணர்வின் வெளிப்பாடாக
அமைந்தது.

இப்போது பெரும் கல்வி நிறுவனங்களுக்கு சிறப்பு விருந்தினராகப்
போகிறேன். வி.ஐ.பி. களைச் சந்திக்கிறேன். நான் யார் என்ற கேள்வி
தொடர்ந்து பின் தொடர்கிறது. எனக்குள்ளிருக்கும் ஓவியரை வெளிக்
கொண்டுவர ஆரம்பித்தேன்.

விளையாட்டாக, பொழுதுபோக்காக ஆரம்பித்து இப்போது என்னை
ஓவியராக முன்னிறுத்தி கண்காட்சி வைக்கும் அளவு வந்திருக்கிறது.
கேரளாவில் பிரான்ஸ் அலையன்ஸில் சிறந்த சிற்பி தத்தன்
கண்காட்சியை திறந்து வைத்தார். பின் கோவையில் இரண்டாவது
ஓவியக் கண்காட்சியை என் அம்மா திறந்து வைத்தார்.

ஒரு தாய் தன் மகன் திருநங்கையான பின் அதை ஏற்று அரவணைத்து
ஆறுதலாய் உடன் இருந்து இந்தக் கண்காட்சியைத் தொடங்கி வைத்தது,
மிகச் சிறந்த முன்னுதாரணம்.

25 ஓவியங்களில் 20 ஓவியங்கள் விற்றுத் தீர்ந்தன. அதில் ஒரு பங்கை
திருநங்கைகளின் கல்வி உதவித் தொகையாக அளித்தேன்.
அடுத்து கொச்சியிலும் ஜெர்மனியிலும் நடக்கவிருக்கிறது. எனக்கு
ஓவிய குரு யாருமில்லை. நான் சுயம்பு. நான் கட்டுப்பாடற்ற, அடர்த்தியான
வண்ணங்களை சர்ரியலிச பாணியில் பயன்படுத்துகிறேன்.

கொஞ்சம் நிஜம்; அதிக கற்பனைதான் என் ஃபார்முலா, ஓவியரான பின்
திருநங்கை என்ற வட்டத்துக்குள் மட்டும இயங்க முடியாது. பொது
வெளியில் கலக்க பலதரப்பட்ட ஓவியங்களையும் வரைய வேண்டிய
சூழல்.

என் ரத்தத்தையே வண்ணமாக்கி ஓவியங்கள் வரைந்து சாதனை
செய்யவும் திட்டமுண்டு. திருநங்கைகளுக்கு ஓவியப் பயிற்சி கொடுத்து
குரூப் எக்ஸிபிஷன் நடத்த எதிர்கால ஐடியாவும் இருக்கிறது' எனறு
நான்ஸ்டாப் பேச்சாகச் சொல்லி முடித்தார் ஓவியர் கல்கி.
-
-----------------------------------------------

- அமிர்தா
கல்கி