மறக்க முடியாத சிரிப்பு!

-

--

முதல் படத்தில் இருந்து இன்று வரை சில பழக்கவழக்கங்களில்
மாற்றம் ஏதுமின்றி பின்பற்றி வருகிறார் அஜித். அதில் ஒன்று,
காலை ஷூட்டிங் ஸ்பாட்டுக்கு சென்றதும் டைரக்டர் முதல் லைட்
பாய்ஸ் வரை வித்தியாசம் பார்க்காமல் அனைவரையும் விஷ்
செய்வது.

உடன் நடிக்கும் நடிகர்கள், அவர்கள் பெரிய ஸ்டாராக இருந்தாலும்
சரி, சிறிய வேடங்களில் நடிக்கும் துணை நடிகர்களாக இருந்தாலும்
சரி, ஒரே மாதிரி மரியாதையுடன் அவர்களை நடத்துவது என்று
தனக்கென சில விதிமுறைகள் தலயிடம் உண்டு.

'எனக்கும் அஜித் தம்பிகிட்ட அப்படியொரு அனுபவம் இருக்கு' என்று
ஒரு சம்பவம் குறித்து பேசத் தொடங்கினார் நடிகர் எம்.எஸ். பாஸ்கர்.
டப்பிங் ஆர்ட்டிஸ்டாக துவங்கி காமெடி, குணச்சித்திரம் என்று
தனக்கென தனி அடையாளம் ஏற்படுத்திக் கொண்டவர் பாஸ்கர்.

'அஜித் கூட நான் நடிச்ச முதல் படம் கிரீடம். அவர் அப்பாவா நடிச்ச
ராஜ்கிரண் கூடவே நானும் கான்ஸ்டபிளா வருவேன். விசாகப்
பட்டினத்தில் ஷூட்டிங் பிரேக்ல கேரவன் பக்கத்துல யார் கூடவோ
நின்னு பேசிட்டிருந்தார்.

அந்த நேரத்துல எனக்கு அவர் பழக்கமில்ல. நாமே
அறிமுகமாகிக்கலாமேன்னு கிட்ட போனேன். 'தம்பி நான்
எம்.எஸ். பாஸ்கர்'னு சொல்லி பேசத் தொடங்கினதும், ஏற்கெனவே
பேசிட்டிருந்த ஆள் போயிட்டார். 'தெரியும் சார்... உங்க படங்கள்
பார்த்திருக்கிறேன்' என்று பணிவாக பேசி நலம் விசாரிச்சவர்.
சர்வீஸ் பாய்கிட்டச் சொல்லி சேர் எடுத்துட்டு வரச் சொன்னார்.

ஒத்தங்க நம்மை உட்கார வச்சு பேசுனாலே குளிர்ந்து போறது மனுஷ
மனமில்லையா? அதுவும் அவர் ஹீரோ நான் ரெண்டு சீன்ல வந்துட்டுப்
போற காமெடியன். அந்த எக்ஸ்பீரியன்ஸ் எனக்குப் புதுசாவும் அதே
நேரம் சந்தோஷமாகவும் இருந்திச்சு.

அதுக்குப் பிறகு நடந்தது தான் எனக்குப் பெரிய அதிர்ச்சி. சேர் எடுத்துட்டு
வந்த ஆளு ஒரு சேர் மட்டும் கொண்டு வந்தார். ஒரு நிமிஷம் ஆடிப்
போயிட்டேன். 'பக்கத்துல வந்ததுக்கு வேணும்டா பாஸ்கரா'ன்னு மனசு
கொதிக்க, அப்படியே நாசூக்கா அந்த இடத்தை விட்டு நகர்ந்திடலாம்னு
புறப்பட்டப்ப, 'அண்ணே உட்காருங்க' என்று அந்த ஒர சேரை என் பக்கமா
போட்டு உடகாரச் சொன்னார்.

'நீங்க உட்காருங்க தம்பீ'ன்னேன்.

'எனக்கு முதுகுத் தண்டுல சின்ன ப்ராப்ளம். உட்கார முடியாது. நீங்க
உட்காருங்க'ன்னார். முதுகுவலி பிரச்னையில் உட்கார்ந்து எழும்போது
உச்சந்தலை வரை வலி சுளீரென சுண்டி இழுக்குமாம். உயிர் போகிற வலி அது.
அதனால் ஒண்ணு நின்னுட்டே இருக்கலாம். இல்லாட்டி படுத்துடணும்கிற
நிலைமையில் இருந்தார்.

அந்த சிச்சுவேஷன்லயும் ரெஸ்ட் எடுக்க விரும்பாம ஷூட்டிங் வந்துட்டார்.
அவர் நின்னபடியும் நான் உட்கார்ந்தும் எவ்வளவு நேரம் பேச முடியும்?
என் மனசுக்க அதுவும் தான் ஒப்புமா? ரெண்டு மூணு நிமிஷத்துல கிளம்பிட்டேன்.
தனக்கு நிகரில்லாத ஆட்களையும் மதிக்கணும்னு நினைக்கிற அந்தப்
புள்ளைக்கு இப்படியொரு பிரச்னையான்னு நினைச்சப்ப ரொம்ப வருத்தமா
இருந்துச்சு.
-
-------------------------------------------------

-

--


வரலாறு ஷூட்டிங்
இன்னொரு விஷயம் பொதுவா ஒரு நடிகனோட நடிப்பு நல்லா இருந்தா,
அதை வாய்விட்டுப் பாராட்டுற இன்னொரு நடிகர் ரெம்ப ரொம்ப கம்மி.
அப்படியே பாராட்டினாலும், அதை நாலு பேர்கிட்ட சொல்லி சம்பந்தப்
பட்டவனைப் பெருமைப்படுத்தறதெல்லாம் பேரதிசயம்.

ஆனா லட்சக்கணக்கான ரசிகர்களுக்க தலயா இருக்கற அந்த தம்பி
அதை பண்ணுச்சு.

என்னோட சீன் வர்றப்ப சில நேரம் விழுந்து விழுந்து சிரிப்பார். சிரிப்புன்னா
ஃப்ரெண்ட்ஸ் படத்துல கட்டுப்படுத்த முடியாத அளவுக்கு விஜய் ஒரு சிரிப்பு
சிரிப்பாரே! அது மாதிரியான சிரிப்பு. ஷூட்டிங்கே ஸ்டாப் ஆகிடும்.

டைரக்டர் கே.எஸ். ரவிக்குமார்கிட்ட 'கொஞ்ச நேரம் சிரிச்சுக்கிடரேனே'ன்னு
ரெக்வஸ்ட் கேட்டுச் சிரிப்பார். அன்னிக்குப் பூராவும் எனக்கு சந்தோஷத்துல
தூக்கமே வராது.

யாருக்கு வரும் அந்த மனசு? அல்லது யாருக்குதான் கிடைக்கும் எனக்கு
கிடைச்ச மாதிரி இந்த பாக்கியம்? தலைகனம் இல்லாத அந்த தல இன்னும்
உச்சத்துக்க வருவார் வரணும்கிறதுதான் என்னோட ஆசை' என்று மனதார
வாழ்த்தினார் பாஸ்கர்.
-
----------------------------------------------

- அய்யனார்ராஜன்
 குமுதம்