பெண் மருத்துவர்களுக்காக ஒரு சங்கம்!

-

மகிழ்ச்சி

‘ஒன்றுபட்டால் உண்டு வாழ்வு’ என்பது பழைய பழமொழிதான்.
ஆனால், எப்போதும் தேவைப்படும் பொன்மொழி அது. தனியாக
இயங்குவதைவிட நான்கு பேர் சேர்ந்து குழுவாக செயல்படும்
மனப்பான்மை எப்போதும் பாராட்டுக்குரியது.

அதுவும், மக்களின் ஆரோக்கியத்துக்காக செயல்படும் பெண்
மருத்துவர்கள் ஒன்றாக செயல்படுவதைக் கேள்விப்படுவதே
மகிழ்ச்சிதான்.இப்படி ஓர் அமைப்பு உருவாகக் காரணம் என்ன
என்று பெண் மருத்துவர்கள் சங்கத்தின் ஆலோசகர் டாக்டர்
மதனிகாவிடம் பேசினோம்.

‘‘நாங்கள் மருத்துவத் துறைக்குள் வந்த காலகட்டத்தில் பெண்கள்
வீட்டைவிட்டு வெளியே வருவதே அபூர்வமாக இருந்தது. சக்தியின்
மறுவடிவமாகச் சொல்லப்படும் பெண்கள், ஆண்களுக்கு இணையாகப்
பணியாற்ற முடியும் என்பதை உலகத்துக்குச் சொல்ல வேண்டும் என்று
விரும்பினோம். அதற்காகவே தமிழகம் முழுவதும் உள்ள
மருத்துவர்களை ஒருங்கிணைத்து Woman doctors association
அமைப்பை சென்னையில் தொடங்கினோம்.

மகப்பேறு, மனநலம், குழந்தைகள் நலம் போன்ற பல்வேறு துறைகளைச்
சேர்ந்தவர்கள் இப்போது ஒருங்கிணைந்து செயல்பட்டுக்
கொண்டிருக்கிறோம். எங்கள் அமைப்பு தொடங்கப்பட்ட 1975ம்
ஆண்டுதான் சர்வதேச மகளிர் தினமும் முதன்முதலாக கடைப்பிடிக்கப்
பட்டது ஒரு சுவாரஸ்யமான ஒற்றுமை’’ என்று தங்கள் சங்கம்
தொடங்கப்பட்டதைப் பற்றி அறிமுகப்படுத்துகிறார் மதனிகா.

மகளிர் மருத்துவ அமைப்பின் செயல்பாடுகள் என்ன?

‘‘இதன் முதல் தலைவராக டாக்டர் விசாலாட்சி நெடுஞ்செழியன்
பொறுப்பு வகித்தார். அவருக்குப் பின்னர், மனநல மருத்துவத்தில் சிறந்து
விளங்கும் சாரதா மேனன் இப்பொறுப்பை வகித்தார். அவரைத் தொடர்ந்து
பலரும் இப்பொறுப்பை ஏற்று திறமையாக செயல்பட்டிருக்கிறார்கள்.

இவ்வாறு ஆரம்பிக்கப்பட்ட எங்கள் அமைப்பு மூலமாக, தமிழகம் முழுவதும்
பெண்களுக்காகவும் குழந்தைகளுக்காகவும் இந்திய மாதர் சங்கம்,
ராமகிருஷ்ண மடம் ஆகிய அமைப்புகளுடன் சேர்ந்து கிராமப்புறங்களில்
மருத்துவ முகாம்களைத் தொடர்ந்து நடத்தி வருகிறோம்.

இதில், பெண்களுக்கு கர்ப்பப்பை பரிசோதனை, மார்பகப் பரிசோதனை
செய்து, அதில் புற்றுநோய் போன்ற பாதிப்புகள் ஏதேனும் இருந்தால்,
அதற்கான ஆலோசனைகள் தருகிறோம். விழிப்புணர்வு முகாம்களையும்
அதிகம் நடத்தி வருகிறோம். இதுமட்டு மில்லாமல், பள்ளிகளுக்குச் சென்று,
மாணவ, மாணவியர்களுக்கு முழு உடல் பரிசோதனை நடத்தி, தேவையான
ஆலோசனைகள், மருந்து, மாத்திரைகள் கொடுத்து வருகிறோம்.

மருத்துவம் படிக்கும் மாணவ, மாணவியர்களுக்குக் கல்வி தொடர்பாக
உதவும் வகையில் பயிற்சிப் பட்டறைகளும் நடத்துகிறோம். மருத்துவத்துறை
மட்டும் அல்லாமல் குடும்ப நிர்வாகம், வருமான வரி செலுத்துதல் மற்றும்
மன அழுத்தம் யோகா பயன்பாடு குறித்த விழிப்புணர்வுகளையும் அமைப்பின்
மூலம் செயல்படுத்தி வருகிறோம்.

மேலும், மருத்துவம் படித்துவிட்டு வரும் இளம் மருத்துவர்களுக்கு நோய்களின்
தன்மை, நவீன சிகிச்சை முறைகள் பற்றி சொல்லித் தருகிறோம். ஒவ்வோர்
வருடமும் மகளிர் தின கொண்டாட்டத்தில் பெண் சாதனையாளர்களை
கெளரவிப்பதையும் வழக்கமாகக் கொண்டிருக்கிறோம்.

நாங்கள் அலோபதி மருத்துவராக இருந்தாலும் நம்முடைய பாரம்பரிய
மருத்துவ முறைகளான சித்த மருத்துவம், ஆயுர்வேதம் போன்றவற்றுக்கும்
முக்கியத்துவம் கொடுக்கிறோம்.மாற்று மருத்துவ வல்லுநர்களை வரவழைத்து
நிகழ்ச்சிகளையும் தொடர்ந்து நடத்திக் கொண்டு இருக்கிறோம்.

காரணம், மக்களுக்கு மருத்துவம் கிடைக்க வேண்டும், குணமாக வேண்டும்
என்பதுதான் எங்களுடைய நோக்கம். அலோபதி மருத்துவம்தான் பெரிது என்று
மற்ற மருத்துவங்களைப் புறக்கணிப்பதில் எங்களுக்கு விருப்பமில்லை’’
என்கிறார் பெருமையாக !
-
------------------------------------------------------------
- விஜயகுமார்
நன்றி குங்குமம் டாக்டர்