பொங்கல்

by ruthrak@gmail.com Fri Jan 06, 2017 3:29 am

பொங்கல் திருநாளைப் பேற்றிப் பொலிவுடன் கொண்டாடும் இந்த
இந்த மங்கல நாளில் பெரியோர்க்கும் நண்பர்களுக்கும் என் வணக்கம்.

என்தையும் தாயும் மகிழ்ந்திங்கு கொண்டாடி என் முன்னோர் வழக்கத்தை
எனக்குளிங்கு விதைத்து. மகிழ்ந்து கதைபேசும் மக்களாய் நாமெல்லாம்.
பொங்கல் பற்றியென் கவிதை புனைந்திங்கு பகிர்ந்திடும் வேளையிலே
என்னுள் தோன்றியதெல்லாம் ஏனிப்படி நாமென்றே?

பொங்கலுக்கென்றோர் பெருமையுண்டு. அன்று தமிழன் அடைந்த லாபங்கள்
பொதிகளாய் மூட்டைகட்டி. செல்வத்தால் பொங்கிய காலமது.
மேடைகளிட்டு நாங்களிங்கு வேறு கதைகள் பேசுகின்றோம்.
உழவனையும் உழவுத் தொழிலையும் மறந்துவிட்டோமோ?

உழவுக்கு வந்தனையும், உண்டு களித்திருப்போனுக்கு நிந்தனையும் என்று
உலகிற்கு உரக்கச் சொன்னான் பாரதி.
உழுதுண்டு வாழ்பவனே வாழ்பவன். மற்றயவன் உழவனைத் தொழுது வாழ்பவன்
என்று உறைக்கச் சொன்னானே பொதுமறை தந்த வள்ளுவன்.

இவையெல்லாம் நமக்குத் தெரியும், தெரிந்துமென்ன பயன்?
சூரியனுக்குப் பொங்கலிட்டு சூரியனுக்கு நன்றி மறுநாள்
மாட்டிற்குப் பொங்கலிட்டு மாடுகளுக்கு நன்றி
அறிவியல் காலத்தில் நம்முள் அறிவிலியான சிந்தனைகள்.

உழவனைப் போற்றுவோம், உழவுத் தொழிலையும் போற்றுவோம்
நம்மைப் போற்றி மகிழ்வுடன் நாமும் வாழ்வோம்
நண்பர்களுடன் கூடி நயம்பட பல பேசுவோம் ஆனால்
உழுதவனை உணவுருவாக்குவேன் துயரை எப்படிப் போக்குவோம்?

பொங்கல் திருநாளை வருடந்தோறும் பொலிவுடன் கொண்டாடுகின்றோம்
ஏங்கும் உழவன் துயரை நாம் எப்போதும் கண்டதில்லை
துங்கும் உள்ளங்களுக்காய் எழுந்தது இந்தச் சிந்தனைக் கவி
பாங்குடன் கருத்தில் கொள்வீர் பெரியோரே அங்கே
பசி பொங்கும் உழவனுக்கு பொங்குமா பானையில் அரிசி?
கடன் நிறைந்த வாழ்க்கை அங்கே, நமக்கோ கழிவிரக்கமில்லை
வருடத்திற்கு உழவர் இருவருக்கு வாழ வழிசெய்தாலென்ன?
சிறுதொகை சேர்த்தாலே போதும் நாம், பெரிதாக உழவன் வாழ்வான்
சின்னவன் நான் சொன்ன கவி பொங்கலின் பெருமை கூறவல்ல.
சிறுமைப்பட்ட உழவன் வந்துங்கள் சிந்தனையில் நிற்பதற்கே
உண்டி கொடுத்தவனை உளமார வாழ்த்துவோம் அவர்
உயர்வுக்காய் நாமேதும் செய்வோம், நலமுடன் நாமும் வாழ்வோம்.
நன்றி வணக்கம்.

by **T.N.Balasubramanian** Fri Jan 13, 2017 9:27 am

உங்கள் வருகைக்கு நன்றி ருத்ரா. :நல்வரவு:

தொடர்ந்து இணைந்திருங்கள்.

உங்களுக்கும் எங்களது இனிய பொங்கல் வாழ்த்துகள்.
ஆங்கில புத்தாண்டு முதலில் நியூசிலாந்தில் பிறக்கின்றது என்பர்.
அதே போல் பொங்கல் வாழ்த்தும் அங்கிருந்தே முதலில் வந்துள்ளது.மகிழ்ச்சி.

உங்களை பற்றி மேலதிக தகவல்களை அறிமுகப்பகுதி மூலம் தெரியப்படுத்தவும்.

ரமணியன்