வங்கிகள் மூலம் ஊதியம்: அவசர சட்டத்துக்கு குடியரசுத் தலைவர் ஒப்புதல்

ஊதியத்தை கட்டாயமாக வங்கி அமைப்பு முறை மூலமாக வழங்க
வகை செய்யும் மத்திய அரசின் அவசர சட்டத்துக்கு குடியரசுத் தலைவர்
பிரணாப் முகர்ஜி ஒப்புதல் அளித்தார்.

அதன்படி, தொழில் - வணிக நிறுவனங்கள் காசோலை மூலமாகவோ
அல்லது நேரடியாக தொழிலாளர்களின் வங்கிக் கணக்கிலோ
ரூ.18,000 வரையிலான மாத ஊதியத்தை, பணியாளர்களின் அனுமதியின்றி
வழங்கிட இந்த அவசரச் சட்டம் வழிவகுக்கிறது.

ஊதிய வழங்கல் சட்டம், 1936-ல் திருத்தம் மேற்கொள்ளும் வகையில்,
மத்திய அரசு கொண்டு வந்த அவசர சட்டத்தின்படி, தொழில், வணிக
நிறுவனங்கள் தங்கள் பணியாளர்களுக்கான ஊதியத்தை கட்டாயமாக
மின்னணு முறையில் அவர்களது வங்கிக் கணக்கில் செலுத்தவும்,
காசோலை மூலமும் வழங்க வேண்டும்.

ஊதிய வழங்கல் சட்டம் (திருத்தப்பட்டது) 2016-ல் பிரிவு 6 ஊதியத்தை
தொழில்நிறுவனங்கள் காசோலையாகவோ அல்லது மின்னணு
பரிவர்த்தனை மூலமாகவோ வழங்க வழிவகை செய்கிறது. இந்த மசோதா
சமீபத்தில் நடந்து முடிந்த நாடாளுமன்றக் கூட்டத் தொடரில் தொழிலாளர்
நலத்துறை அமைச்சர் பண்டாரு தத்தாத்ரேயாவால் தாக்கல் செய்யப்பட்டது.

தொழில்நிறுவனங்கள் பணமில்லா ஊதியம் வழங்கும் முறைக்கு மாற
மாநில அரசுகள் வலியுறுத்த வேண்டும் என்பதற்கும் இந்தச் சட்டம் வழிவகை
செய்கிறது.

டிஜிட்டல் மற்றும் குறைத்த பண பொருளாதாரத்தை நோக்கமாக கொண்டு
இந்த புதிய விதிமுறைகள் கொண்டுவரப்படுவதாக மசோதாவில்
கூறப்பட்டுள்ளது.

ஊதிய வழங்கல் சட்டம் 1936-ம் ஆண்டு ஏப்ரல் மாதம் 23-ம் தேதி கொண்டு
வரப்பட்டது. இந்தச் சட்டத்தின் படி நிறுவனங்கள் ஊதியங்களை
நோட்டுகளாகவோ அல்லது நாணயங்களாகவோ வழங்கலாம். 1975-ம் ஆண்டு
இந்த சட்டத்தில் இரண்டு விதிகள் சேர்க்கப்பட்டன. அதாவது ஊழியர்கள்
கோரிக்கையின் பேரில் ஊதியங்களை காசோலையாகவோ அல்லது வங்கிக்
கணக்கு மூலம் வழங்க முடியும்.

ஆந்திர பிரதேசம், உத்தராகண்ட், பஞ்சாப், கேரளா, ஹரியாணா ஆகிய
மாநிலங்கள் ஏற்கெனவே ஊதியத்தை காசோலை மற்றும் மின்னணு முறையில்
வழங்குவதற்கு விதிகளைக் கொண்டுவந்துள்ளன என்பது குறிப்பிடத்தக்கது.
-
--------------------------------------------
தி இந்து