கொல்கத்தா மியூசியத்தில் உள்ள 4,000 ஆண்டு பழமை வாய்ந்த மம்மியை சீரமைக்க நடவடிக்கை

-
கொல்கத்தா:
மேற்குவங்க மாநிலத்தில் உள்ள 4000 ஆண்டுகள் பழமைவாய்ந்த
எகிப்து மம்மியை சீரமைத்து புத்துயிர் கொடுப்பதற்கான
நடவடிக்கைகள் மேற்கொள்ளப்பட்டுள்ளது. மேற்குவங்க மாநிலம்,
கொல்கத்தாவில் பழமைவாய்ந்த அருங்காட்சியகம் அமைந்துள்ளது.

ஐரோப்பா மற்றும் அமெரிக்காவிற்கு அடுத்தபடியாக எகிப்து மம்மிகளை
கொண்டுள்ள அருங்காட்சியகங்களில் இதுவும் ஒன்றாகும்.
இங்கு எகிப்து மம்மி, புத்தரின் சாம்பல், அசோகரின் தூண், புதை படிவ
எலும்புக்கூடு, விண்கற்கள் என பல அரிய பொருட்கள் காட்சிக்கு
வைக்கப்பட்டுள்ளன.

இங்குள்ள சுமார் 4000 ஆண்டுகள் பழமைவாய்ந்த எகிப்து மம்மி, கடந்த
1882ம் ஆண்டு எகிப்தில் இருந்த கொல்கத்தாவிற்கு பரிசாக வழங்கப்பட்டது.
தற்போது இதனை பாதுகாக்கும் வகையில் தனிப்பெட்டியில் பதப்படுத்தி
வைக்கப்பட்டுள்ளது. மத்திய வெளியுறவுத்துறை இணை அமைச்சர்
எம்.ஜே.அக்பர் நேற்று முன்தினம் இந்த அருங்காட்சியகத்தை பார்வையிட்டார்.

எகிப்து மம்மி வைக்கப்பட்டிருந்ததை பார்த்த அவர், அது தொடர்பாக
அருங்காட்சியக நிர்வாகிகளிடம் பல்வேறு கேள்விகளை எழுப்பினார்.

மம்மி எந்த நிலையில் உள்ளது, அழியாமல் பாதுகாப்பதற்கான
நடவடிக்கைகளை மேற்கொள்ளாமல் பதப்படுத்தப்பட்டுள்ளது குறித்து
அமைச்சர் அதிருப்தி தெரிவித்தார். மம்மியை சீரமைப்பதற்கான
நடவடிக்கைகளை எடுக்கும்படி அறிவுறுத்தினார்.

இதனையடுத்து மம்மியை சீரமைத்து பாதுகாப்பதற்கு அருங்காட்சியக
நிர்வாகிகள் முடிவு செய்துள்ளனர். இதற்காக லக்னோவில் உள்ள தேசிய
ஆராய்ச்சி ஆய்வகம் மற்றும் மும்பையில் உள்ள சத்ரபதி சிவாஜி மகராஜ்
வாஸ்து சங்கராலயா நிபுணர்களின் உதவியை நாடுவதற்கு திட்டமிட்டுள்ளனர்.

எகிப்து மம்மியின் உண்மையான நிலை என்ன என்பதை கண்டறிந்து,
அதனை சரிசெய்து புத்துயிர் தருவதற்கான முயற்சிகள் மேற்கொள்ளப்
பட்டுள்ளது. இந்த பணி நிறைவடைந்தால் எகிப்து மம்மி மீண்டும் பொதுமக்கள்
பார்வைக்கு வைக்கப்படலாம் என எதிர்பார்க்கப்படுகிறது.
-
-----------------------------------------
தினகரன்