Latest topics

வலிகள் வேண்டாம் !

ஈகரை தமிழ் களஞ்சியம் :: கவிதைக் களஞ்சியம் :: சொந்தக் கவிதைகள்

Page 1 of 1

வலிகள் வேண்டாம் !

Post by M.Jagadeesan Mon Nov 28, 2016 6:46 pm

வழிகளைக் காண்பவனுக்கு
வலிகள் இருக்காது !

விழிகளைத் திறந்து பார் !
விரிந்துகிடக்கும் கடலைப் பார் !
ஆர்ப்பரிக்கும் அலைகளைப் பார் !
அவை துள்ளும் அழகைப் பார் !
வழிகளைக் கண்ட அலைகளுக்கு
வலிகள் என்பது எப்போதுமில்லை !

மொட்டை மாடியிலே மல்லாந்து கிடந்து
வெட்டவெளி வானத்தை சற்றே உற்றுப்பார் !
பால்வெளி மண்டலம் பார்க்க பார்க்கப் பரவசம் !
சப்தரிஷி மண்டலம்தான் எத்தனை அழகு !
எத்தனைகோடி விண்மீன்கள் ! எத்தனைகோடி கிரகங்கள் !
அத்தனையும் அருகருகே இருந்தாலும் மோதியது உண்டா ?
வழிகளைக் கண்டதால் வலிகள் இல்லை !

V வடிவத்தில் வியூகம் அமைத்து
அதிகாலை வேளையில் பறக்கும் பறவைக் கூட்டம் !
பனங் கிழங்கைப் பிளந்ததுபோன்ற
பவளக்கூர்வாய் குஞ்சுகளின் வாயிலே
இரையை ஊட்டுகின்ற தாய்ப்பறவை !
ஓடுமீன் ஓட உறுமீன் வருமளவும்
எரிக்கரையிலே மோனத்தவம் இருக்கும் கொக்கு !
இவற்றின் வாழ்க்கையில் வலி என்பது உண்டா ?
வசந்தம் மட்டுமே உண்டு !

மனிதப் பதரே !
உன் வாழ்க்கையில் மட்டும் ஏன் இத்தனை வலிகள் ?
பக்கத்து வீட்டுக்காரன்
பணக்காரனாக இருந்தால் உன் நெஞ்சிலே வலி !
அடுத்த வீட்டுக்காரன் ஆடிக் காரிலே சென்றால் உன்
அடி வயிற்றிலே வலி !
எதிர் வீட்டுக்காரன் A /C அறையில் தூங்கினால் உன்
நெஞ்சிலே புழுக்கம் !
அழுக்காறு , அவா இவற்றை அறவே நீக்கு
வலிகள் பறந்து போகும் ! வசந்தம் வந்து சேரும் !

இருந்தமிழே ! உன்னால் இருந்தேன் ; இமையோர்
விருந்தமிழ்தம் என்றாலும் வேண்டேன் !

M.Jagadeesan: சிறப்புப் பதிவாளர்; பதிவுகள் : 5382
இணைந்தது : 18/04/2015