2018 செப்டம்பருக்குப் பிறகு தொடங்கப்படும் வங்கிக் கணக்கு விவரங்களை தர ஸ்விஸ் சம்மதம்

வரும் 2018-ஆம் ஆண்டு செப்டம்பருக்குப் பிறகு ஸ்விஸ்
வங்கிகளில் தொடங்கப்படும் வங்கிக் கணக்கு விவரங்களை
இந்தியாவிடம் அளிக்க ஸ்விட்சர்லாந்து ஒப்புக் கொண்டுள்ளது.

வெளிநாட்டு வங்கிகளில் கருப்புப் பணம் பதுக்கப்படுவதைத்
தடுக்க மத்திய அரசு மேற்கொண்டு வரும் முயற்சிகளில்
முக்கிய முன்னேற்றமாக இது கருதப்படுகிறது.

ஸ்விட்சர்லாந்து வங்கிகளில் இந்தியர்கள் வைத்துள்ள கணக்குத்
தகவல்களை பரிமாறிக்கொள்ளும் ஒப்பந்தத்தை செயல்படுத்துவது
தொடர்பான கூட்டறிக்கை செவ்வாய்க்கிழமை வெளியிடப்பட்டது.

எனினும், இந்த ஒப்பந்தத்தின் மூலம் வரும் 2018-ஆம் ஆண்டு
செப்டம்பர் மாதத்துக்குப் பிறகு ஸ்விஸ் வங்கிகளில் உள்ள
இந்தியர்களின் கணக்குகள் தொடர்பான விவரங்கள் மட்டுமே
கிடைக்கும்.

2019-ஆம் ஆண்டு செப்டம்பர் மாதத்தில்தான் முதல் தகவல்
பரிமாற்றம் நடைபெறும்.

இது தொடர்பாக மத்திய நிதியமைச்சகம் வெளியிட்டுள்ள
அறிக்கையில் கூறப்பட்டுள்ளதாவது:

சர்வதேச அளவில், தங்கள் நாட்டில் உள்ள இந்தியர்களின் வங்கிக்
கணக்கு தொடர்பான விவரங்களை இந்தியாவுடன் பரிமாறிக்
கொள்ள ஸ்விட்சர்லாந்து ஒப்புக் கொண்டுள்ளது.

இதன்படி இருநாடுகளும் தங்கள் நாட்டில் உள்ள பிறநாட்டினரின்
வங்கிக் கணக்கு விவரங்களை 2018-ஆம் ஆண்டு செப்டம்பர்
மாதத்திலிருந்து திரட்டும். 2019-ஆம் ஆண்டு செப்டம்பர் முதல்
ஸ்விட்சர்லாந்து தன்னிடம் உள்ள இந்தியர்களின் வங்கிக் கணக்கு
விவரங்களை இந்தியாவுக்கு அளிக்கும்.

இதேபோல இந்தியாவும் தன்னிடம் உள்ள ஸ்விஸ் நாட்டவர்கள்
வங்கிக் கணக்கு விவரங்களை அந்நாட்டிடம் அளிக்கும் என்று
தெரிவிக்கப்பட்டுள்ளது.

இது தொடர்பாக மத்திய வருவாய்த் துறை செயலாளர்
ஹஸ்முக் அதியா சுட்டுரையில் (டுவிட்டர்) கூறியிருப்பதாவது:

2018-ஆம் ஆண்டு செப்டம்பருக்குப் பிறகு இந்தியர்கள் யாரும்
ஸ்விஸ் வங்கிகளில் கணக்கு தொடங்கினால் அந்த விவரங்கள்
வருமான வரித் துறைக்கு கிடைக்கும். இந்த ஒப்பந்தம் அமலுக்கு
வந்துள்ளது, கருப்புப் பணத்துக்கு எதிரான இந்தியாவின்
நடவடிக்கைக்கு கிடைத்த வெற்றி என்று கூறியுள்ளார்.

ஸ்விட்சர்லாந்தில் உள்ள வங்கிகள் தங்களிடம் கணக்கு
வைத்திருப்பவர்கள் குறித்த விவரங்களை மிகவும் ரகசியமாகப்
பாதுகாக்கும் என்பதால் சர்வதேச அளவில் கருப்புப் பணத்தை
பதுக்குவோரின் சொர்க்கபுரியாக ஸ்விஸ் வங்கிகள் திகழ்ந்து
வந்தன.

எனினும், சமீப ஆண்டுகளில் சர்வதேச அளவில் ஏற்பட்ட
நெருக்கடிகளை அடுத்து, வங்கிகள் தொடர்பான கட்டுப்பாடுகளை
அந்நாடு சிறிது தளர்த்தியது.
-
எனினும், ஸ்விஸ் வங்களில் உள்ள இந்தியர்களின் கணக்குகள்
தொடர்பாக பல்வேறு முறை கோரப்பட்ட தகவல்கள் இப்போது
வரை நிலுவையில்தான் உள்ளன. அவை தொடர்பாக இந்த
ஒப்பந்தத்தில் எதுவும் குறிப்பிடப்படவில்லை.

எனவே, ஏற்கெனவே ஸ்விஸ் வங்கிகளில் கருப்புப் பணத்தை
பதுக்கிய இந்தியர்கள் குறித்த விவரம் கிடைப்பது இப்போது வரை
கேள்விக்குறியாகவே உள்ளது.
-
--------------------------------------------------
தினமணி

arumai:

2018 செப்டம்பருக்கு பிறகு ......
ஆம் இந்தியர்கள் இந்த தேதிக்கு பிறகு ,சுவிஸ்ஸில் பணம் பதுக்க கேணையர்களா என்ன ?

ரமணியன்