செல்லாக் காசு

by **M.Jagadeesan** Mon Nov 21, 2016 7:02 pm

பெற்ற பிள்ளைகள் அவனை சட்டை செய்வதில்லை !
கட்டிய மனைவி , அவன் வார்த்தையைக் காதில் போட்டுக் கொள்வதில்லை !
வேலைக்காரர்களுக்கோ அவன் ஒரு வெத்து வேட்டு !
மொத்தத்தில் அவன் ஒரு செல்லாக் காசு !

நான்கு மாதங்களுக்கு முன்பு அவன்
நல்ல காசாகத்தான் இருந்தான் !
நாலுபேர் மதிக்கின்ற தங்கக் காசாகத்தான் இருந்தான் !
திடீரென்று ஒருநாள்
காமப் பிசாசின் கைகளில் சிக்கி
வேலிதாண்டிய வெள்ளாடாக மாறினான் !

உற்றார் உறவினரின் உபதேசங்கள் எல்லாமே
செவிடன் காதில் ஊதிய சங்காயிற்று !
அரண்மனை வாசம் வேண்டாம் ;
சின்னவீடே போதும் என்றான் .
நோட்டுகள் எனக்குத் தேவையில்லை ;
சில்லரைகளே போதும் என்றான் .
கம்பனின் ராமனாக இருப்பதைக் காட்டிலும்
இளங்கோவின் கோவலனாகவே
இருக்க விரும்புகிறேன் என்றான் !

மொத்தத்தில் ' அவன் ஒரு செல்லாக் காசாக இருப்பதையே விரும்புகிறான் ! '