தங்க நகை விற்பனையில் பெரும் சரிவு

நாட்டில் பணப் புழக்கம் குறைந்த காரணத்தால்,
தங்க நகைகளை உற்பத்தி செய்யும் தொழிற்சாலைகள்
மூடப்பட்டுள்ளன என்று தங்கநகை விற்பனையாளர்கள்
தெரிவிக்கின்றனர்.

தங்கத்தின் விற்பனையில் பெரும் சரிவு ஏற்பட்டுள்ள
நிலையில், விற்பனை சகஜ நிலைக்குத் திரும்ப 6 மாதங்கள்
பிடிக்கும் என்று விற்பனையாளர்கள் கவலை
தெரிவிக்கின்றனர்.

600 சதவீதம் அதிகரிப்பு: ரூ.500, ரூ.1,000 நோட்டுகள்
செல்லாது என்று நவம்பர் 8-ஆம் தேதி அறிவிக்கப்பட்டது.
அறிவிப்பு வெளியான சில நிமிஷங்களில் மக்கள் தங்கள்
கைகளில் வைத்திருந்த நோட்டுகளை தங்கத்தில் முதலீடு
செய்யத் தொடங்கினர்.

இதன் காரணமாக, அன்றைய தினம் நள்ளிரவு 12 மணி வரை
நகைக்கடைகளில் விற்பனை நடைபெற்றது. ஒரே நாள்
இரவில் 600 சதவீதம் உற்பத்தி அதிகரித்தது.

வெகுவாகக் குறைந்துவிட்ட விற்பனை:
புதிய ரூபாய் நோட்டுகளை அரசு வெளியிடத் தொடங்கியதைத்
தொடர்ந்து, பங்குச் சந்தையில் முன்னேற்றம் ஏற்பட்டது.
அதன் காரணமாக, தங்கத்தின் விலை தொடர்ந்து குறைந்து
வருகிறது. தொடர்ந்து 8-ஆவது நாளாக தங்கத்தின் விலையில்
தொடர்ந்து சரிவு ஏற்பட்டு வருகிறது.

தங்கத்தின் விலை குறைந்தாலும் மக்களின் கைகளில் பணப்
புழக்கம் குறைந்துள்ளதால், தங்க நகை விற்பனை மொத்தமாகக்
குறைந்துள்ளது. தங்கநகை உள்ளிட்ட வேறு எந்தவித
முதலீட்டிலும் ஈடுபடாமல் பழைய நோட்டுகளை மாற்றுவதற்கும்,
புதிய நோட்டுகளைப் பெறுவதற்கும் மக்கள் வங்கிகளிலேயே
கதியாகக் கிடக்கும் நிலை ஏற்பட்டுள்ளது.

இதன் காரணமாக தங்கத்தின் விற்பனையில் ரூ.500 கோடிக்கும்
அதிகமாக நஷ்டம் ஏற்பட்டுள்ளதாகக் கூறப்படுகிறது.

தொழிற்சாலைகள் மூடப்பட்டன:
தங்கநகை விற்பனை குறைந்துள்ளதால், இந்தியாவில் நகை
தயாரிப்பில் ஈடுபடும் தொழிற்சாலைகள் மூடப்பட்டுள்ளன.
தங்கத்தின் தேவை மக்களிடையே குறைந்துள்ளதாலும்,
பணப்புழக்கம் இல்லாததால் விற்பனை மந்தமானதாலும்,
போதிய வேலை வாய்ப்புகள் இல்லாததால் நகை தொழிற்
சாலைகள் மூடப்பட்டுள்ளன.

இதுதொடர்பாக அகில இந்திய கற்கள், தங்கநகை வர்த்தகர்கள்
கூட்டமைப்பின் மண்டலத் தலைவர் அனந்தபத்மநாபன் கூறியது:-

இந்தியாவைப் பொருத்தவரை அதிகமான நகைகள்
உள்நாட்டிலேயே தயாரிக்கப்படுகின்றன. தற்போது பணப்
புழக்கம் குறைந்து, நகை விற்பனை மந்தமானதால், கோவை,
திருச்சூர், கொல்கத்தா, ஆமதாபாத், ஜெய்பூர், ராஜ்காட்,
பெங்களூரு உள்ளிட்ட இடங்களில் உள்ள தங்க நகை உற்பத்தித்
தொழிற்சாலைகள் மூடப்பட்டுள்ளன.

இதன் காரணமாக தங்க நகைக் கடைகளில்
அடுத்த 2 மாதங்களுக்கு எந்தவித புதிய விற்பனைத் திட்டமோ,
சேமிப்புத் திட்டங்களோ அறிவிக்கப்பட மாட்டாது என்றார்.

சகஜமாக 6 மாதம் தேவை!
டிசம்பர் 30-ஆம் தேதிக்குள் பழைய ரூபாய் நோட்டுகளை மாற்ற
வேண்டும் என்ற மத்திய அரசு அறிவித்துள்ளதால், அதுவரை
மக்கள் வங்கிகளில்தான் கவனம் செலுத்துவார்கள்.

புதிய ரூபாய் நோட்டுகள் புழக்கத்துக்கு வந்துவிட்டாலும்,
தங்கநகை விற்பனை சகஜ நிலைக்குத் திரும்ப இன்னும்
6 மாதங்கள் ஆகும்
-

ஊழியர்களுக்கு ஊதியம்: தங்கத்தின் விற்பனை தொடர்ந்து
வீழ்ச்சியடைந்தால், அதிகபட்சம் இன்னும் 2 மாதங்களுக்கு
மட்டுமே தங்கநகைக் கடைகளில் பணியாற்றும் ஊழியர்களுக்கு
மாத ஊதியம் வழங்க முடியும் என்று விற்பனையாளர்கள்
தெரிவிக்கின்றனர்.
-
--------------------தினமணி