தி.நகரை மேம்படுத்த நிதி ஒதுக்கீடு... ரூ. 1,300 கோடி! 41 திட்டங்கள் செயல்படுத்த முடிவு

சென்னை ஸ்மார்ட் சிட்டி திட்டத்தில், தி.நகரை மேம்படுத்த,
1,300 கோடி ரூபாய் செலவில், 41 வகையான திட்டங்களை
செயல்படுத்த முடிவு செய்யப்பட்டு உள்ளது. இதற்காக,
ஸ்மார்ட் சிட்டி நிறுவனத்திற்கு, அதிகாரிகள் குழு, விரைவில்
நியமிக்கப்பட உள்ளது.

மத்திய அரசின் ஸ்மார்ட் சிட்டி திட்டத்திற்கு, சென்னை,
தி.நகர் பகுதி தேர்வு செய்யப்பட்டு உள்ளது. மொத்தம்,
நான்கு சட்டசபை தொகுதிகளை உள்ளடக்கி, இந்த திட்டம்
செயல்படுத்தப்பட உள்ளது.

இதற்கான விரிவான திட்ட அறிக்கை தயாரிக்கப்பட்டு,
அரசின் ஒப்புதல் கிடைத்துள்ளது.

கடந்த ஜூன் மாதம், பிரதமர் மோடி, ஸ்மார்ட் சிட்டி திட்டத்தை
துவக்கி வைத்தார். இந்த திட்டத்தில், தி.நகரை மேம்படுத்த,
1,300 கோடி ரூபாய்க்கு திட்டங்கள் வகுக்கப்பட்டு உள்ளன;
மொத்தம், 41 வகையான பணிகள் செய்யப்பட உள்ளன.

இத்திட்டத்தில், மோட்டார் இல்லா வாகன போக்குவரத்து,
நடைபாதை, போக்குவரத்து மேலாண்மை, பூங்காவில்
பசுமையை அதிகரித்தல், மழைநீர் வடிகாலை மேம்படுத்துதல்,
திடக்கழிவு மேலாண்மை, தகவல் தொடர்பை மேம்படுத்துதல்,
துப்புரவு மற்றும் குடிநீர் மேலாண்மை திட்டங்கள், கழிவுநீர்
மேலாண்மை திட்டங்கள், மின் வலையமைப்பை ஸ்மார்ட்
தீர்வுகள் மூலம் மேம்படுத்துதல், வெள்ள கண்காணிப்பு
எச்சரிக்கை அமைப்பு நிறுவுதல் ஆகியவை மேற்கொள்ளப்படும்.

திட்டத்தை செயல்படுத்த வசதியாக, ஸ்மார்ட் சிட்டி நிறுவனம்
ஏற்படுத்தப்பட்டு உள்ளது. இந்நிறுவனத்தின் தலைமை செயல்
அதிகாரி, தலைமை நிதி அதிகாரி, நிறுவன செயலர் ஆகிய
பதவியிடங்கள் புதிதாக தோற்றுவிக்கப்பட உள்ளன.

இந்த அதிகாரிகள் குழு தான், திட்டத்தை நுணுக்கமாக கவனித்து
செயல்படுத்தும்.
இந்த அதிகாரிகளை தேர்வு செய்ய, ஸ்மார்ட் சிட்டி நிறுவனம்
தயாராகி வருகிறது. இந்த பணியிடங்களுக்கு விண்ணப்பிக்க,
மாநகராட்சி வழங்கிய கால அவகாசம் முடிந்துள்ளது.

மொத்தம், 20க்கும் மேற்பட்டோர் விண்ணப்பித்துள்ளதாக
தெரிகிறது. தகுதி அடிப்படையில் அதிகாரிகள் குழு விரைவில்
அமைக்கப்படும். அதன்பின், ஸ்மார்ட் சிட்டி திட்டப் பணிகள்
வேகம் பிடிக்கும் என, அதிகாரிகள் தெரிவித்தனர்.

மத்திய அரசு, ஸ்மார்ட் சிட்டி திட்டத்திற்கு, ஒவ்வொரு ஆண்டும்,
100 கோடி ரூபாய் வீதம், அடுத்த ஐந்து ஆண்டுகளுக்கு வழங்கும்.
மாநில அரசும், மாநகராட்சியும், இதே அளவு தொகையை,
இத்திட்டத்திற்கு செலவிட வேண்டும்.
-
----------------------------------

- நமது நிருபர் -

வீதியில் ஜனநடமாட்டத்திற்கு தடங்கலாக உள்ள சில்லறை வியாபாரிகளை தடைசெய்தல் ,
பிளாட்பார வியாபாரிகள் . மெஹந்தி கலைஞர்கள் தடை செய்தல்.
கடையை ஒட்டிய பார்க்கிங் வசதி இல்லாத கடைகள்,
வாடிக்கையாளரின் பாதுகாப்பின்றி /தீயணைக்கும் வசதிகள் இல்லாத கடைகளை கண்டறிந்து ,
குறைகளை நீக்குதல் போன்ற முக்கியமான விஷயங்களையும் இவர்கள் கவனம் செலுத்தவேண்டும்.

ரமணியன்