பஞ்சாப்: குடியரசுத் தலைவர் ஆட்சியின் கீழ் தேர்தலை நடத்த காங்கிரஸ் கோரிக்கை

-
பஞ்சாப் மாநிலத்தில் குடியரசுத் தலைவர் ஆட்சியை
அமல்படுத்திவிட்டு, சட்டப் பேரவைத் தேர்தலை நடத்த
வேண்டும் என்று மாநில காங்கிரஸ் கட்சி கோரிக்கை
விடுத்துள்ளது.

மாநில காங்கிரஸ் தலைவர் அமரீந்தர் சிங் தலைமையிலான
காங்கிரஸ் கட்சியினர், தலைமைத் தேர்தல் ஆணையர்
நஜீம் ஜைதியை வியாழக்கிழமை நேரில் சந்தித்து,
மாநிலத்தில் முன்கூட்டியே தேர்தல் நடத்தை விதிகளை
அமல்படுத்த வேண்டும் என்று கோரிக்கை விடுத்தனர்.

இதுதொடர்பாக, மனு ஒன்றையும் நஜீம் ஜைதியிடம்
அவர்கள் கொடுத்தனர். அதில், கூறப்பட்டிருப்பதாவது:

தற்போதைய பாஜக-அகாலி தள கூட்டணி அரசு, மாநிலத்தின்
நீர்ப் பங்கீட்டு உரிமையை உச்ச நீதிமன்றத்தில் பெற்றுத்
தர தவறிவிட்டது. சட்லஜ் - யமுனை இணைப்புக் கால்வாய்
திட்டத்துக்கு எதிராக, பஞ்சாப் மாநில அரசு கொண்டு வந்திருந்த
சட்டத்தை உச்ச நீதிமன்றன்றம் ரத்து செய்ததை அடுத்து,
மாநிலத்தில் சட்டம்- ஒழுங்கு சீர்குலைந்துவிட்டது.

மாநிலத்தில் சாராய விற்பனை, போதைப்பொருள் கடத்தல்
உள்ளிட்ட குற்றச் செயல்கள் தொடர்கிறன்றன. இதுதவிர,
பொய் வழக்குப் போடுவதால் மாநிலத்தில் எப்போதும்
பதற்றமான சூழலே நிலவி வருகிறது.

இந்த நிலையில், மாநிலத்தில் சட்டப் பேரவைத் தேர்தலை
நேர்மையாகவும், நியாயமாகவும் நடத்துவதற்கு தற்போதுள்ள
ஆட்சியைக் கலைத்துவிட்டு, குடியரசுத் தலைவர் ஆட்சியின்
கீழ் தேர்தலை நடத்த வேண்டும்.

மாநிலத்தில் சட்டம் - ஒழுங்கு நிலைமை மேலும்
மோசமடைவதைத் தடுப்பதற்காக, தாமதமின்றி தேர்தல்
நடத்தை விதிகளை அமல்படுத்த வேண்டும். மேலும்,
சட்டப்பேரவைத் தேர்தல் நேர்மையாக நடைபெறுவற்கு,
பஞ்சாப் மாநிலத்தில் உள்ள மின்னணு வாக்குப்பதிவு
இயந்திரங்களைப் பயன்படுத்தக் கூடாது. துணை ராணுவப்
படையினரை பாதுகாப்பில் ஈடுபடுத்த வேண்டும் என்று
அந்த மனுவில் தெரிவிக்கப்பட்டுள்ளது.
-
--------------------------------------------------
தினமணி