காவிரி: மாநிலங்களவையில் அதிமுக அமளி

மாநிலங்களவையில் காவிரி நீர்ப் பங்கீடு விவகாரத்தை
வியாழக்கிழமை எழுப்பி அதிமுக உறுப்பினர்கள் கடும்
அமளியில் ஈடுபட்டனர்.

மாநிலங்களவை வியாழக்கிழமை காலை 11 மணிக்கு
தொடங்கியவுடனேயே மாநிலங்களவை அதிமுக குழுத்
தலைவர் நவநீதகிருஷ்ணன் தலைமையில் அக்கட்சி
உறுப்பினர்கள் அனைவரும் மையப் பகுதிக்குச் சென்று
"காவிரி நீரை தமிழகத்துக்கு கர்நாடகம் திறந்து விட
வேண்டும்';

"காவிரி மேலாண்மை வாரியம் அமைக்காமல் தமிழகத்தை
மத்திய அரசு வஞ்சித்து விட்டது' என்று குரல் எழுப்பினர்.
அதிமுகவில் இருந்து சில மாதங்களுக்கு முன்பு நீக்கப்பட்ட
சசிகலா புஷ்பாவும் அவையின் மையப் பகுதியின்
மறுமுனையில் தனியாக நின்று தனது ஆதரவைத்
தெரிவித்தார்.

இதையடுத்து, அவையை வழிநடத்திய மாநிலங்களவைத்
துணைத் தலைவர் பி.ஜே.குரியன், ரூபாய் நோட்டு விவகாரம்
குறித்து மற்ற கட்சிகளின் உறுப்பினர்கள் பேசிய பிறகு
நவநீதகிருஷ்ணனுக்கு அனுமதி அளிப்பதாகக் கூறினார்.
அதன் பிறகும் அமளி நீடித்ததால் அவை நடவடிக்கை
ஒத்திவைக்கப்பட்டது.

முன்னதாக, காவிரி விவகாரத்தை விவாதிக்கும் வகையில்
நவநீதகிருஷ்ணன் பெயரில் அளித்துள்ள ஒத்திவைப்பு
நோட்டீஸை அனுமதிக்க வேண்டும் என்று அதிமுக
உறுப்பினர்கள் குரல் எழுப்பினர்.

மாநிலங்களவையில் மையப் பகுதிக்குச் சென்ற
நவநீதகிருஷ்ணன், டாக்டர் மைத்ரேயன் உள்ளிட்டோர்
"காவிரி நடுவர் மன்ற இறுதித் தீர்ப்பின்படி மேலாண்மை
வாரியத்தை உடனே மத்திய அரசு அமைக்க வேண்டும்.

காவிரி நீர் திறந்து விடப்படாததால் தமிழக விவசாயிகள்,
மக்கள் பாதிக்கப்பட்டுள்ளனர். இந்த விஷயத்தில் மத்திய
அரசின் நிலைப்பாட்டை ஏற்க முடியாது' என்று குரல்
கொடுத்தனர்.

எதிர்க்கட்சிகள் ஆதரவு:
அப்போது, திமுக உறுப்பினர்கள் கனிமொழி, திருச்சி சிவா,
டி.கே.எஸ்.இளங்கோவன், ஆர்.எஸ்.பாரதி ஆகியோர்
இருக்கையில் சில நிமிடங்கள் நின்றபடி தங்கள் ஆதரவைத்
தெரிவித்தனர்.

இந்திய கம்யூனிஸ்ட் கட்சியின் டி.ராஜா, மார்க்சிஸ்ட் கம்யூனிஸ்ட்
கட்சியின் டி.கே.ரங்கராஜன் ஆகியோரும் இருக்கையில்
நின்றவாறு அதிமுகவினரின் கோரிக்கைக்கு ஆதரவு
தெரிவித்தனர்.

மக்களவையில்...: ரூபாய் தட்டுப்பாடு விவகாரத்தில் மத்திய
அரசின் நிலைப்பாடு குறித்து விவாதிக்க அதிமுக உறுப்பினர்
கே.என்.ராமச்சந்திரன் பெயரில் ஒத்திவைப்பு நோட்டீஸ்
கொடுக்கப்பட்டிருந்தது. இந்த நோட்டீஸை அனுமதிக்க
வேண்டும் என்று மக்களவைத் தலைவர் சுமித்ரா மகாஜனிடம்
அதிமுக குழுத் தலைவர் வேணுகோபால் கோரிக்கை விடுத்தார்.

ரூபாய் நோட்டு விவகாரத்தில் எதிர்க்கட்சிகளுடன் சேர்ந்து
அதிமுக உறுப்பினர்களும் நாள் முழுவதுமாகக் குரல் கொடுத்தனர்.

முன்னதாக நண்பகலில் மக்களவையில் அவை விதி 377-இன்கீழ்
தங்கள் கோரிக்கையை சில உறுப்பினர்கள் தாக்கல் செய்தனர்.
இதில், வேலூர் தொகுதி உறுப்பினர் பி.செங்குட்டுவன் முன்
வைத்துள்ள கோரிக்கையில், "காவிரி பிரச்னையில் கர்நாடகத்தில்
வாழும் தமிழர்கள் பாதுகாக்கப்படுவதை பிரதமர் நரேந்திர மோடி
உறுதிப்படுத்த வேண்டும்.

நீர்ப் பங்கீட்டு பிரச்னைக்குத் தீர்வு காண மத்திய நீர் வளத் துறை
அமைச்சர் முயற்சிக்க வேண்டும். காவிரி மேலாண்மை வாரியத்தை
அமைக்கத் தடையாக உள்ள மாநிலங்களிடையிலான நதிகள்
சட்ட விதி 6ஏ-இல் திருத்தம் செய்ய வேண்டும்.

காவிரி நடுவர் மன்றத் தீர்ப்பின்படி மேலாண்மை வாரியத்தை
அமைக்க வேண்டும்' என்று வலியுறுத்தப்பட்டுள்ளது.
-
தமிழக எம்.பி.க்களுக்கு இல.கணேசன் ஆதரவு
-
மத்தியப் பிரதேச மாநிலத்தில் இருந்து மாநிலங்களவைக்கு தேர்வு
செய்யப்பட்ட தமிழகத்தைச் சேர்ந்த பாஜக உறுப்பினர்
இல.கணேசன் காவிரி விவகாரத்தை அதிமுக உறுப்பினர்கள்
எழுப்பிய போது, தனது இருக்கையில் இருந்து நின்றபடி தனது
ஆதரவைத் தெரிவித்தார்.

புதிய உறுப்பினராகப் பதவியேற்ற பிறகு முதல் முதலாக
மாநிலங்களவை குளிர்கால கூட்டத் தொடரில் இல.கணேசன்
புதன், வியாழன் ஆகிய நாள்களில் பங்கேற்றார்.

காவிரி விவகாரத்தில் மேலாண்மை வாரியத்தை அமைக்கும்
நடவடிக்கையில் மத்தியில் ஆளும் பாஜக ஆர்வம் காட்டாத
நிலையில், அதிமுக உறுப்பினர்கள் மாநிலங்களவையில்
வியாழக்கிழமை அமளியில் ஈடுபட்ட போதெல்லாம், அவர்களுக்கு
ஆதரவு தெரிவிப்பது போல, இல.கணேசன் தனது இருக்கையில்
இருந்து எழுந்து நின்றார்.
-
--------------------------------------

தினமணி