புதிய ரூ. 500 நோட்டுகள் புழக்கத்துக்கு வருவது எப்போது? ரிசர்வ் வங்கி பதிலளிக்க உயர் நீதிமன்றம் உத்தரவு

புதிய ரூ. 500 நோட்டுகள் புழக்கத்துக்கு வருவது எப்போது? ரிசர்வ் வங்கி பதிலளிக்க உயர் நீதிமன்றம் உத்தரவு
By DIN | Published on : 17th November 2016 03:41 AM | அ+அ அ- |


புதிய ரூ. 500 நோட்டுகள் தமிழகத்தில் எப்போது
புழக்கத்தில் விடப்படும் என்பது குறித்து வெள்ளிக்கிழமை
பதிலளிக்க வேண்டும் என ரிசர்வ் வங்கிக்கு சென்னை
உயர் நீதிமன்றம் உத்தரவிட்டுள்ளது.

தொடக்க வேளாண்மை கூட்டுறவு வங்கி
வாடிக்கையாளர்களுக்கும், பழைய நோட்டுகளை
மாற்றும் வசதிகளை ரிசர்வ் வங்கி ஏற்படுத்தித் தர
வேண்டும் என, விழுப்புரம் மாவட்டத்தைச் சேர்ந்த
கே.ராமமூர்த்தி என்பவர் சென்னை உயர் நீதிமன்றத்தில்
மனு தாக்கல் செய்தார்.

இந்த மனு புதன்கிழமை மீண்டும் விசாரணைக்கு வந்தது.
அப்போது, மத்திய கூட்டுறவு வங்கிகளில் பழைய
ரூ. 500, 1000 நோட்டுகள் மாற்றுவதை நிறுத்தி வைக்குமாறு
ரிசர்வ் வங்கி உத்தரவு பிறப்பித்துள்ளது.

இவற்றால் ஏழை, எளிய விவசாயிகள் மிகவும்
பாதிக்கப்பட்டுள்ளதாக கூட்டுறவு சங்கங்கள் சார்பில்
ஆஜரான வழக்குரைஞர் தெரிவித்தார்.

இதைத் தொடர்ந்து, ஆஜரான ரிசர்வ் வங்கி தரப்பு
வழக்குரைஞர், அச்சிடப்பட்ட புதிய ரூ. 500 நோட்டுகளை
கொண்டு வருவதில் நடைமுறை சிக்கல்கள் உள்ளன.
ஏற்கெனவே தனியார் நிறுவனங்கள் மூலம் அண்மையில்
கண்டெய்னரில் கொண்டு வரப்பட்ட பணம் பறிமுதல்
செய்யப்பட்டது.

ஆகையால், தனியார் நிறுவனங்கள் வாயிலாக பணம்
கொண்டு வருவதை ரிசர்வ் வங்கி நிறுத்தியுள்ளது. மாறாக,
அரசு அமைப்புகள் மூலம் பணம் கொண்டு வருவதாகவும்,
தற்போது மைசூரிலிருந்து பணம் வந்து கொண்டிருப்பதாகவும்
தெரிவித்தார்.

அனைத்து தரப்பு வாதங்களையும் கேட்ட நீதிபதி, புதிய
ரூ. 500 நோட்டுகள் எப்போது தமிழகத்துக்கு வந்தடையும்.
புழக்கத்தில் எப்போது விடப்படும் என்பது குறித்தும்
ரிசர்வ் வங்கியின் கருத்தை அறிந்து வெள்ளிக்கிழமை
தெரிவிக்க உத்தரவிட்ட நீதிபதி, புதிய ரூ. 500 நோட்டுகளை
புழக்கத்துக்கு கொண்டு வந்தாலே, இரண்டு நாள்களில்
நாட்டில் நிலவும் அசாதாரண சூழல் சீரடைந்துவிடும் என்றும்
நீதிபதி தெரிவித்தார்.
-
---------------------------------------
தினமணி