மேட்டூர் அணை வறண்ட நீர்பரப்பு பகுதியில் 13 ஆண்டுகளுக்கு பின் முழுவீச்சில் சாகுபடி

மேட்டூர்:

சுற்றுப்பகுதியில் வடகிழக்கு பருவமழை பொய்த்ததால்,
13 ஆண்டுகளுக்கு பின், நடப்பாண்டு, மேட்டூர் அணை
வறண்ட நீர்பரப்பு பகுதியில், விவசாயிகள் முழுவீச்சில்
சாகுபடி துவங்கியுள்ளனர்.

மேட்டூர் அணை, 152 சதுர கி.மீ., நீர்பரப்பு பகுதியை
கொண்டது. கடந்த, 1925ல் அணை கட்டுமான பணியின்
போது, நீர்பரப்பு பகுதியில் இருந்த, கோட்டையூர், நாயம்பாடி,
தெலுங்கனூர், காவேரிபுரம், சாம்பள்ளி உள்பட, 25க்கும்
மேற்பட்ட கிராம மக்களை ஆங்கிலேயர்கள் அப்பகுதியில்
இருந்து வெளியேற்றினர்.

வெளியேற்றப்பட்ட கிராம மக்கள் அனைவரும், மேட்டூர்
அணை சுற்றுப்பகுதியில் குடியேறி, அப்பகுதியில் விவசாயம்
செய்வது மட்டுமின்றி, அணை நீர்மட்டம் குறையும் போது,
வறண்ட நீர்பரப்பு பகுதியில் சோளம், எள், குதிரைவாலி
உள்ளிட்ட பயிர்களை சாகுபடி செய்வது வழக்கம்.

ஆண்டுதோறும், வடகிழக்கு பருவமழை சீசனில், மேட்டூர்
அணை சுற்றுப்பகுதியில் நிலத்தடி நீர்மட்டம் அதிகரிக்கும்.
இதனால், அணை சுற்றுகிராமங்களை சேர்ந்த விவசாயிகள்
தங்கள் நிலங்களில் நெல், வாழை, மிளகாய் உள்ளிட்ட
பயிர்களை சாகுபடி செய்வர்.

ஆனால், 13 ஆண்டுகளுக்கு பின், நடப்பாண்டு வடகிழக்கு
பருவமழை பொய்த்ததால், கடும் வறட்சி காரணமாக, அணை
வறண்டது மட்டுமின்றி, கரையோரத்திலுள்ள நிலங்களில்
விவசாயிகளால் பயிர் சாகுபடி செய்ய முடியவில்லை.

பாதிக்கப்பட்ட விவசாயிகள் நடப்பாண்டு மேட்டூர் அணையின்,
100 சதுர கி.மீ., நீர்பரப்பு பகுதியில் தங்களுக்கான நிலப்பரப்பை
அளந்து கல்நட்டு, டிராக்டர் மூலம் உழுது, விதை தூவுகின்றனர்.

இதுகுறித்து அணை கரையோர விவசாயிகள் கூறியதாவது:
ஆண்டுதோறும் வடகிழக்கு பருவமழை சீசனில் அணை
சுற்றுப்பகுதி விவசாய நிலங்களில் சாகுபடி செய்வோம்.
நடப்பாண்டு பருவமழை பொய்த்து விட்டதால்,
சுற்றுகிராமங்களை சேர்ந்த விவசாயிகள் அனைவரும்,
மேட்டூர் அணை வறண்ட நீர்பரப்பு பகுதியில், முழு வீச்சில்
சாகுபடி துவங்கியுள்ளோம்.

இந்த சாகுபடியாவது, எங்களுக்கு ஓரளவு பலன் தரும் என
எதிர்பார்க்கிறோம். இவ்வாறு அவர்கள் கூறினர்.
-
----------------------------------
தினமலர்

A