ஏளனத்தின் எதிர்காலம்

ச. சந்திரசேகரன் · 16/09/2012

ஏளனத்தின் எதிர்காலம்

நீண்ட நெடு வரிசையிலே
நிற்கும் பாரத மக்களே
மாண்டு விட்ட என்னை
மாற்ற வந்த மக்களே
வேண்டி நானும் கேட்கிறேன்
வரி ஏய்ப்பு செய்யாதீர்
மீண்டும் ஏய்ப்பு செய்தாலோ
மரணம் வரை ரணமே

ஐநூறு ரூபாய்நான்
அலட்சியமாய்ச் சிரித்தேன்
நூறு ரூபாயைப் பார்த்து
நோகும்படி சிரித்தேன்
யாருக்கும் தேவையின்றி
என்சுயத்தை இழந்தேன்
பாரதத்தில் பாமரர்க்கும்
பலனின்றி இறந்தேன்

நூறுரூபாய் என்னிலும்
நூறுமடங்கு உயரத்தில்
பத்துரூபாய் என்னிலும்
பலமடங்கு பயன்பாட்டில்
ஆகவேதான் மானிடரே
அகந்தை கொள்ளாதீர்
சாகும்வரை சிறுபான்மை
சகவாசம் மறுக்காதீர்.

உயரத்தில் உள்ளநீவிர்
உருக்குலைந்து போகலாம்
தகரங்கள் தரமுயர்ந்து
தங்கமாயும் மாறலாம்
ச.சந்திரசேகரன்.

சசி · சசி Thu Nov 24, 2016 7:35 pm

நல்ல சிந்தனை ஐயா.
வரி ஏய்ப்பினால் வந்த வினை
வயிற்றுக்கு இல்லாதவனுக்கும்
வந்த சோதனை ஆகி விட்டது.

**T.N.Balasubramanian** · **T.N.Balasubramanian** Thu Nov 24, 2016 8:40 pm

யானைக்கு ஒரு காலம் வந்தால்
பூனைக்கு ஒரு காலம்

ரமணியன்

இந்த பதிவைத் துவங்கியவர் நன்றி கூறியுள்ளார் T.N.Balasubramanian

**M.Jagadeesan** · **M.Jagadeesan** Thu Nov 24, 2016 8:57 pm

ஐயா !

தங்கள் கூறிய பழமொழியைத் திரித்து கீழ்க்கண்டவாறு சிலர் கூறுகின்றனர் .

ஆநெய்க்கு ஒரு காலம் வந்தால்
பூநெய்க்கும் ஒரு காலம் வரும்.

ஆநெய் ஆகிய பசுநெய்யினை ஒரு காலத்தில் உண்டால் பூநெய் ஆகிய தேனையும் ஒரு காலத்தில் உண்ணவேண்டி வரும்.

அதாவது, பசுநெய்யினை உணவுடன் சேர்த்து அதிகம் உண்டால் அதனால் உண்டாகும் கொழுப்பினைக் குறைக்க அதன்பின்னர் தேனை உண்ண வேண்டி வரும் என்று விளக்கம் கூறுகின்றனர்.