திப்பு சுல்தான் ஜெயந்தி கொண்டாட்டத்திற்கு தடை விதிக்குமாறு மனு தலைமை செயலாளரிடம் முறையிடும்படி ஐகோர்ட்டு உத்தரவு

பெங்களூரு,

திப்பு சுல்தான் ஜெயந்தி கொண்டாட்டத்திற்கு தடை
விதிக்குமாறு கோரி தாக்கல் செய்யப்பட்ட பொது நல மனுவில்,
தலைமை செயலாளரிடம் முறையிடும்படி ஐகோர்ட்டு
உத்தரவிட்டுள்ளது.

திப்பு சுல்தான் ஜெயந்தி

கர்நாடக அரசு சார்பில் திப்பு சுல்தான் ஜெயந்தி வருகிற
10–ந் தேதி கொண்டாடப்படுகிறது. இதற்கு பா.ஜனதா மற்றும்
ஆர்.எஸ்.எஸ். அமைப்பு கடும் எதிர்ப்பு தெரிவித்து வருகிறது.
ஆயினும் இதை பொருட்படுத்தாமல் மாநில அரசு
திப்பு சுல்தான் ஜெயந்தியை திட்டமிட்டபடி கொண்டாட முடிவு
செய்துள்ளது.

இந்த நிலையில் கர்நாடக ஐகோர்ட்டில் திப்பு சுல்தான் ஜெயந்தியை
மாநில அரசு கொண்டாடுவதற்கு தடை விதிக்குமாறு கோரி பொது
நல மனு தாக்கல் செய்யப்பட்டது. அந்த மனுவை தலைமை நீதிபதி
எஸ்.கே.முகர்ஜி தலைமையிலான அமர்வு நேற்று முன்தினம்
விசாரணை நடத்தியது. அதன் தொடர்ச்சியான விசாரணை
நேற்றைக்கு ஒத்திவைக்கப்பட்டது.

ஒரு பகுதியை ஆட்சி புரிந்தார்

இந்த நிலையில் அந்த மனு மீது ஐகோர்ட்டில் நேற்று
2–வது நாளாக விசாரணை நடைபெற்றது. அப்போது மனுதாரர்
சார்பில் ஆஜரான வக்கீல் சஜன் பூவய்யா, “கொடவா, கொங்கனி
மக்களுக்கு எதிராக செயல்பட்ட திப்பு சுல்தானின் ஜெயந்தி
விழாவை மாநில அரசு கொண்டாட முடிவு செய்துள்ளது.

இது சரியல்ல. மாநில அரசின் இந்த முடிவுக்கு தடை விதிக்க
வேண்டும்’’ என்றார்.

அப்போது அட்வகேட் ஜெனரல் மதுசூதன் நாயக் வாதிடுகையில்,
“இது அரசின் கொள்கை சம்பந்தபட்ட விஷயம். இதுகுறித்து
கூடுதல் விவரங்களை தெரிவிக்க கால அவகாசம் வழங்க வேண்டும்’’
என்றார். அப்போது தலைமை நீதிபதி எஸ்.கே.முகர்ஜி, “திப்பு சுல்தான்
நாட்டின் ஒரு பகுதியை ஆட்சி புரிந்தார். அவ்வளவு தான். அவருடைய
ஜெயந்தியை கொண்டாடுவது ஏன்?. அவர் ஒரு சுதந்திர போராட்ட வீரர்
என்பது சரியா?’’ என்று பல்வேறு கேள்விகளை கேட்டார்.

இதற்கு அரசு தரப்பில் சரியான பதில் அளிக்கப்படவில்லை.

தலைமை செயலாளரிடம்...

இதையடுத்து தலைமை நீதிபதி, திப்பு சுல்தான் ஜெயந்தி
கொண்டாட்டம் குறித்த ஆட்சேபனையை தலைமை செயலாளரிடம்
மனுதாரர் முறையிடும்படியும், வருகிற 8–ந் தேதிக்குள் தலைமை
செயலாளர் உரிய முடிவை எடுக்க வேண்டும் என்றும் உத்தரவிட்டார்
-
---------------------------------------
தினத்தந்தி