இரவு 10 முதல் காலை வரையில் பட்டாசு வெடிக்க தடை

by **ayyasamy ram** Wed Oct 26, 2016 8:11 am

தீபாவளியை முன்னிட்டு, இரவு 10 மணி முதல்
காலை 6 மணி வரையில் பட்டாசு வெடிக்கக் கூடாது
என தமிழ்நாடு மாசு கட்டுப்பாடு வாரியம் உத்தரவிட்டுள்ளது.

இதுகுறித்து வாரியம் வெளியிட்ட செய்திக் குறிப்பில்
கூறியிருப்பதாவது:-

பட்டாசு வெடிக்கும்போதும், மகிழ்ச்சியாக பட்டாசுகளை
வெடித்து கொண்டாடும்போதும் பொதுமக்கள் பொது
விதிமுறைகளை கட்டாயம் கடைபிடிப்பது அவசியம்.

திறந்தவெளியிடங்கள், பொது இடங்களில் மட்டுமே
கூட்டாக சேர்ந்து பட்டாசு வெடிக்க வேண்டும். எளிதில்
தீ விபத்து ஏற்படக் கூடிய இடங்களான குடிசைகள்,
தீப்பற்றும் பொருள்கள் உள்ள இடங்களில் கண்டிப்பாக
பேன்சி ரக பட்டாசுகளான ராக்கெட், வாணவெடி
போன்றவைகளை வெடிக்கக் கூடாது.

சிறுவர்கள், சிறுமிகளை எந்தக் காரணம் கொண்டும்
தனியாக பட்டாசு வெடிக்க அனுமதிக்காமல், பெற்றோர்கள்
கண்காணிப்பிலேயே பட்டாசுகளை வெடிக்க வழிநடத்த
வேண்டும்.

தீவிபத்து ஏற்பட்டால் தடுக்கும் வகையில், பட்டாசு வெடிக்கும்
இடத்தின் அருகே முன்னெச்சரிக்கை நடவடிக்கையாக
மணல், தண்ணீர் வாளி போன்றவைகளை வைத்திருக்க
வேண்டும். மருத்துவமனைகள், பள்ளிகள், நீதிமன்றம்,
முதியோர் இல்லங்கள் போன்ற அமைதி காக்கும் இடங்களில்
பட்டாசு வெடிக்கக் கூடாது.

இவற்றை மீறுகிறவர்கள் மீது அபராதம், சிறை தண்டனை
அளிக்க நடவடிக்கை எடுக்கப்படும்.
-
----------------------------------------
தினமணி
குறிப்பாக இரவு 10 முதல் காலை 6 மணி வரை எந்தச் சூழ்நிலையிலும் பட்டாசு வெடிக்கக் கூடாது. எனவே விபத்தில்லாமல் பாதுகாப்பான தீபாவளியை கொண்டாட பொதுமக்கள் ஒத்துழைப்பு அளிக்க வேண்டும் என கூறப்பட்டுள்ளது.