கொஞ்சம் அழுங்கள்....

by Guest Sat Oct 22, 2016 8:34 pm

உலகில் பிறக்கும் அனைத்து மனிதனின் வாழ்க்கையின் தொடக்கமும் அழுகைதான். அங்கே தொடங்கும் நமது வாழ்க்கை அழுகையிலேயே முடிகிறது. சிரிக்கும் போது ஆயிரம் பேர் வருவார்கள்,அழும் போது யாரும் வரமாட்டார்கள்.

குழந்தையாக இருந்தபோது நமது அழுகை அனிச்சை செயல்; அறியாமலே அழுதோம்.

கண்ணீர் உப்பு கலக்காவிட்டால் வாழ்க்கை சுவைக்காது, அழுங்கள் அது நல்லது -கவிக்கோ அப்துல் ரஹ்மான்.

மிருகங்கள் மகிழ்ச்சி உணர்வைப் பெறும் போது சிரிக்கின்றன,முக்கியமாக பாலூட்டிகள் சிரிப்பை வெளியிட்டாலும் மனிதனைப் போல் அட்டகாசமாக சிரிப்பதில்லை. ஆனால் அவை அழுகின்றன.
எனவே.................

அழுகை என்பது நல்ல உரையாடலை விட பலமடங்கு சிறந்தது. வெற்றியோ, தோல்வியோ, இரண்டும் எங்களைப் பாதிக்கின்றன. இரண்டைப் பற்றியும் நாங்கள் சிந்திக்கிறோம். மனது உடைந்து அழுவது, மன பாரத்தை வெளியில் கொட்டுவது எல்லாமே சரிதான்; நாங்களும் மனிதர்கள் தான் என்பதை எங்கள் அழுகை காண்பிக்கிறது. அழுகை நம் மன அழுத்தத்தைக் குறைத்து, மனதை லேசாக்குகிறது.

கண்ணீர் என்பது நம் கண்களில் அமைந்துள்ள கண்ணீர் சுரப்பிகளிலிருந்து உண்டாகிறது.வருடம் 30 கலன்கள் கண்ணீர் நம் கண்களில் இருந்து வெளியேறுகிறது. சிரிப்பதில் பலவகை உண்டு. அதுபோல் அழும்
கண்ணீரில் மூன்று விதம் உண்டு.

by Guest Sat Oct 22, 2016 8:35 pm

அடிப்படை கண்ணீர்: (Basal tears) இது நமது கண்களை ஈரப்பசையுடன் வைக்கவும், தூசியை அகற்றவும் உதவுகிறது.

எதிர்வினைக் கண்ணீர்: (Reflex tears/Irritant tears) கண்களில் ஏதாவது விழுந்து விட்டாலோ, அதிக நெடியினால் கண்கள் பாதிக்கப் பட்டாலோ, அல்லது இருமும்போதும், தும்மும்போதும், வெங்காயம் நறுக்கும்போதும் வருவது இந்தவகைக் கண்ணீர்.

கடைசி வகையும் முக்கியமானதும் தான் உணர்வுசார் கண்ணீர்: (emotional tears) பலமான உணர்ச்சிக் கொந்தளிப்பு, கோபம், பயம், மன அழுத்தம், துக்கம், சில சமயம் மித மிஞ்சிய சந்தோஷம் இவை இந்த வகைக் கண்ணீருக்குக் காரணம்.

உணர்வு சார் கண்ணீர் பலசமயங்களில் மன அழுத்தத்தை குறைக்க பயன்படும். அதனால்தான் சிலர் தனிமையில் அழுகிறார்கள். அழுதபின் நம் மனது புத்துணர்வு பெறுவதும் இதனால்தான். உணர்வு சார் கண்ணீரில், மற்ற இரண்டு கண்ணீர்களில் இல்லாத மாறுபட்ட இரசாயனப் பொருட்கள் இருக்கின்றன; இவை நமக்கு ஓர் இயற்கையான வலி நிவாரணியாக செயல்படுகிறது. அதன் காரணமாகவே நம் மன அழுத்தம் குறைகிறது.

உணர்வுசார் கண்ணீர் வருவதற்கு மிகப் பலமான உணர்வு பூர்வமான தூண்டுதல் இருக்க வேண்டும்.
அழுகையோ, சிரிப்போ உணர்வு பூர்வமான சூழலை மூளை உணர வேண்டும். அதனால் ஒருவர் அழும்போது மூளையின் பல பகுதிகள் வேலை செய்கின்றன. இதன் காரணமாக, உடல்ரீதியாகவும் பல மாற்றங்கள் ஏற்படுகின்றன. அழுகையோ, சிரிப்போ முகத்தின் தசைகள் முக்கியப்பங்கு வகிக்கின்றன. இதயத் துடிப்பு, மூச்சுவிடும் அளவு இவை அதிகரிக்கின்றன.

பெண்களை விட ஆண்கள் தங்கள் உணர்ச்சிகளை கட்டுப் படுத்திக்கொள்ள முடியும் என்று நம்புவதால், அவர்கள் அழுவதை சமூகம் என்றுக் கொள்ளுவதில்லை. இதனாலேயே ஆண்கள் தங்களது மன அழுத்தத்தை சரி செய்ய நீண்ட நாட்கள் எடுத்துக் கொள்ளுகிறார்கள்.ஆனால் பெண்கள் அப்படியல்ல. உடனே அழுது தீர்த்து விடுகிறார்கள்.

மன ஊனர்வுகளின் வெளிப்பாடே அழுகை.அழுவது கோழைத்தனம் அல்ல.மன நோயாளர்கள் அழுவதில்லை.

by Guest Sat Oct 22, 2016 8:37 pm

ஒருவர் அதீதமான மன அழுத்தத்தால் பாதிக்கப்படும்போது இதயத் துடிப்பு அதிகமாகிறது; வியர்வை பெருகுகிறது. அழுவது இதயத் துடிப்பை நிதானப் படுத்தி, அமைதியைக் கொடுக்கிறது. கண்களைப் பாதுகாக்கிறது. கண்ணீர் வரவில்லையா? குளிர்ந்த நீரில் கண்களை நன்கு கழுவுங்கள்.

அதனால் …...............
மாறாத வடுவை மறந்து விடாது கொஞ்சம் அழுங்கள். ஆனால் முதலைக்கண்ணீர்(crocodile tears) வேண்டாம்.
அழுது விட்டீர்களா? அப்படியானால் இப்போது சிரிக்கலாமே!

காலையில் மெரினாவில் நின்று உரக்கச் சிரிப்பதால் எல்லாம் நோய் மறைந்து புத்துணர்வு கிடைத்து விடாது. முகத்தசைகளுக்கு மட்டுமே அது பலன் தரும். அதனால் மனம் விட்டு சிரியுங்கள். அதற்கு நகைச்சுவையும் (Humour / Humor),நகைச்சுவை உணர்வும் தேவை.

இடுக்கண் வருங்கால் நகுக ...

(நன்றி -Why we cry -American Psychological Association ; Cyquest Healing.; Dr Carrie Lane University of Texas )

by **T.N.Balasubramanian** Sat Oct 22, 2016 8:38 pm

அழுவதால் மனக்கஷ்டம் குறையும் .

ரமணியன்

by Ramalingam K Sat Oct 22, 2016 8:42 pm

ஆனால் ஐயா !

பல சமயங்களில் அழுதால் கொஞ்சம் நிம்மதி என்பதும் உண்மைதானே.

அழுகை:

பரம்பொருளின் வள்ளன்மையை நினைத்து ;

ஸ்ரீகுருதேவரின் கருணாகடாக்ஷத்தை நினைத்து;

அன்னையின் தோளை நினைத்து;

அத்தையின் மடியை நினைத்து;

தந்தையின் பொறுப்பை நினைத்து;

மாமாவின் ( அம்மாவின் சகோதரர்) அன்பை நினைத்து;

மகளின் பொறுமையை நினைத்து;

மகனின் அஞ்சாமையை நினைத்து;

மனைவியின் அயராத உழைப்பை நினைத்து.

அழுதுப்பார்த்தால் கிடைக்கும் சுகம் அலாதி என்பதை அப்போது உணரலாம்.