நவ.16-இல் தொடங்குகிறது குளிர்காலக் கூட்டத் தொடர்

நாடாளுமன்ற குளிர்காலக் கூட்டத் தொடர் நவம்பர் 16-ஆம்
தேதி தொடங்கும் என்று அதிகாரப்பூர்வமாக அறிவிக்கப்
பட்டுள்ளது. ஒரு மாதம் நடைபெறவுள்ள இந்தக் கூட்டத்
தொடரானது டிசம்பர் 16-ஆம் தேதி நிறைவடையலாம் என்று
எதிர்பார்க்கப்படுகிறது.

சரக்கு - சேவை வரி (ஜிஎஸ்டி) சட்டத்தை அமல்படுத்த வகை
செய்யும் மத்திய ஜிஎஸ்டி மற்றும் ஒருங்கிணைந்த ஜிஎஸ்டி
மசோதாக்களை அப்போது நாடாளுமன்றத்தின் இரு
அவைகளிலும் தாக்கல் செய்ய மத்திய அரசு
திட்டமிட்டுள்ளதாகத் தெரிகிறது. இதைத் தவிர மேலும் சில
மசோதாக்களை நிறைவேற்ற அரசு முனைப்பு காட்டி
வருவதாகவும் கூறப்படுகிறது.

கடந்த சில நாள்களுக்கு முன்பு மத்திய அமைச்சரவைக் கூட்டம்
தில்லியில் நடைபெற்றது. நிர்வாகக் காரணங்களுக்காக
நாடாளுமன்ற குளிர்காலக் கூட்டத் தொடரை முன்கூட்டியே
நடத்துவது என்று திட்டமிடப்பட்டது. அதன் அடிப்படையில்
தற்போது வழக்கத்தைக் காட்டிலும் ஓரிரு வாரங்கள் முன்
கூட்டியே கூட்டத் தொடரை நடத்த முடிவு செய்யப்பட்டுள்ளது.

இதற்கான அறிவிப்பை நாடாளுமன்றச் செயலர் புதன்கிழமை
(அக்.19) வெளியிட்டுள்ளார்.

பாகிஸ்தான் ஆக்கிரமிப்பு காஷ்மீருக்குள் நுழைந்து இந்திய
ராணுவம் அதிரடி தாக்குதல் நடத்திய விவகாரத்தில், ஆம் ஆத்மி
மற்றும் காங்கிரஸ் உள்ளிட்ட எதிர்க்கட்சிகள் மத்திய அரசை
விமர்சித்து வரும் நிலையில், நாடாளுமன்ற கூட்டத் தொடரிலும்
இந்த விவகாரம் எதிரொலிக்கும் என எதிர்பார்க்கப்படுகிறது.

காவிரி நதி நீர்ப் பகிர்வு விவகாரத்தில் மத்திய அரசின்
ஒருதலைபட்சமான செயல்பாடு குறித்து தமிழக எம்.பி.க்கள்,
இரு அவைகளிலும் கண்டனக் குரல் எழுப்பத் திட்டமிட்டுள்ளனர்.

இதைத் தவிர, வெளியுறவுக் கொள்கைகள், பாகிஸ்தான் மீதான
நடவடிக்கை உள்பட பல்வேறு விவகாரங்கள் நாடாளுமன்ற
குளிர்காலக் கூட்டத் தொடரில் விவாதிக்கப்பட வாய்ப்புள்ளது.

உத்தரப் பிரதேசம், பஞ்சாப், உத்தரகண்ட், கோவா, மணிப்பூர்
உள்ளிட்ட 5 மாநிலங்களுக்கான சட்டப்பேரவைத் தேர்தல் அடுத்த
சில மாதங்களில் நடைபெற உள்ளதால் மத்திய பட்ஜெட்டை
பிப்ரவரி 1-ஆம் தேதியே தாக்கல் செய்வதற்கும் மத்திய அரசு
பரிசீலித்து வருவது குறிப்பிடத்தக்கது.
-
-------------------------------------------
தினமணி