விருந்து

by **M.Jagadeesan** Mon Oct 17, 2016 7:16 pm

திருமணத்திற்கு சென்று வந்த நண்பர் பலமாக ஏப்பம் விட்டார் .

" என்ன சார் ! விருந்து பலமா ? இப்படி ஏப்பம் விடறீங்களே ? '

" ஆமாம்யா ! ஏகப்பட்ட ஐட்டம் வைத்துவிட்டார்கள் ! எதை சாப்பிடுவது , எதை விடுவது என்று தெரியவில்லை ! வைத்தது எல்லாவற்றையும் சாப்பிட்டுவிட்டேன் ! ஒரு இலை 300 ரூபாய் என்று சொன்னார்கள் ! அதை வீணாக்கலாமா ! எனக்கு சர்க்கரை வியாதி வேறு ; என்ன ஆகுமோ தெரியவில்லை ! "

" கவலைப்படாதீங்க சார் ! ஒரு மாத்திரை கூடப் போட்டீங்கன்னா எல்லாம் சரியாயிடும் ! "

இதுபோன்ற உரையாடல்களை நாம் அடிக்கடிக் கேட்கிறோம்.

ஆனால் " விருந்து " என்ற சொல்லுக்குத் தவறான பொருள் கொள்கிறோம் . " விருந்து " என்றவுடன் நம் நினைவுக்கு வருவது " அறுசுவை உணவுதான் "

உண்மையில் " விருந்து " என்ற சொல்லுக்குப் " புதியவர் " என்பதுதான் பொருள் . அதை நாம் முற்றிலுமாக மறந்துவிட்டோம் .

" உண்டிக்கு அழகு விருந்தோடு உண்டல் " என்பது வெற்றிவேற்கை .

அதாவது உணவிற்கு அழகாவது , புதிதாக வந்தவரோடு கலந்து உண்ணுதலாம் .

விருந்து புறத்ததாத் தானுண்டல் சாவா
மருந்தெனினும் வேண்டற்பாற்று அன்று .

என்பார் ஐயன் வள்ளுவர் . விருந்தினர் திண்ணையிலே இருக்க தான்மட்டும் தனித்து உண்ணுதல் தவறு . அது சாவாமைக்குக் காரணமாக இருக்கும் அமிழ்தமே ஆனாலும் , விருந்தோடு உண்ணுதலே சரியான செயலாகும் .

இனியாவது " விருந்து " என்றவுடன் சாப்பாடு நம் நினைவுக்கு வராமல் இருக்கட்டும் .