இடம் மாற்றி நட்ட மரங்கள் துளிர்விட்ட அதிசயம்

-
கோபி:
கோபி அருகே, சாலை விரிவாக்க பணியின் போது,
வேருடன் அகற்றி இடம் மாற்றி நடப்பட்ட புளிய மரங்கள்,
பசுமையாக துளிர் விட்டுள்ளன.

ஈரோடு மாவட்டம், கோபி – குன்னத்துார் சாலை,
ஒட்டவலவு அருகே, ‘எஸ்’ வடிவில் குறுகிய திருப்பமாக இருந்தது.
இதனால், அடிக்கடி விபத்து ஏற்பட்டது. இதையடுத்து,

இச்சாலையை விரிவாக்கம் செய்ய முடிவானது. இதற்கு இடையூறாக,
பழமை வாய்ந்த, 33 புளிய மரங்கள் இருந்தன. மரங்களை வெட்டி
அகற்ற மனமில்லாத நெடுஞ்சாலைத் துறை, அம்மரங்களை ஆணி
வேருடன் பிடுங்கி, வேறிடத்தில் நட திட்டமிட்டது;

ஆக., 27ல், மரங்கள் அகற்றப்பட்டன. ஒட்டவலவு – கொளப்பலுார்
சாலையில், லிங்கப்ப கவுண்டன்புதுார் முதல் கல்லுமடை வரை,
சாலையோரத்தில், புளிய மரங்கள் நடப்பட்டன. மழை பெய்யாததால்,
மரங்கள் பட்டுப்போகும் நிலை ஏற்பட்டது.

இதனால் விலைக்கு தண்ணீர் வாங்கி, மரங்களை பராமரிக்க முடிவு
செய்யப்பட்டது.இரண்டு நாட்களுக்கு ஒரு முறை, 12 ஆயிரம் லிட்டர்
தண்ணீர், 1,600 ரூபாய்க்கு விலை கொடுத்து வாங்கி, நெடுஞ்சாலைத்
துறையினர் ஊற்றினர். ஊற்றிய தண்ணீரின் ஈரப்பதத்தை தக்க வைக்க,
மரத்தின் நடுத்தண்டு பகுதியில், நார்ச்சாக்கு கட்டப்பட்டது.

ஆணி வேர் விரைவில் வளர்ச்சி பெற, 15 நாளைக்கு ஒரு முறை,
‘ரூட் மேக்கர்’ என்ற உரமிடப்பட்டது. இதன் விளைவாக, ஓரிரு மரங்களை
தவிர, அனைத்து மரங்களும் தற்போது துளிர் விட்டு வியக்க வைத்துள்ளன.

அதே சமயம் வளைவாக இருந்த, ஏழு மீட்டர் சாலை, 90 லட்சம் ரூபாய்
செலவில், 15.20 மீட்டர் விரிவாக்கம் செய்யப்பட்டு, தார்சாலையாக மாற்றும்
பணி, இறுதி கட்டத்தை எட்டியுள்ளது.

இன்னும் ஒரு மாதத்துக்குள் இந்தப் பணி முழுமை பெறும்.திட்டம்
முழுமை பெற்றதும், விபரங்கள் அனைத்தும், ‘சக்சஸ் ஸ்டோரி’யாக
தயாரிக்கப்பட்டு, தலைமை அதிகாரிகளுக்கு அனுப்ப, நெடுஞ்சாலைத்
துறை சார்பில் முடிவு செய்யப்பட்டு உள்ளது.
–
———————————————-
தினமலர்

இங்கு பேரீட்சை மரத்தை இப்படி தான் ஒரு இடத்தில் பயிரிட்டு பெரிதாக வளர்ந்து காய்க்க ஆரம்பித்தவுடன் வேண்டுவோருக்கு விலைக்கு கொடுப்பார்கள் வாங்கி வந்து நட்டால் அப்படியே பிழைத்துக்கொண்டு அடுத்த வருடம் காய்க்க ஆரம்பித்துவிடும்

சென்னை கிண்டி - to போரூர் சாலை முன்பு பெரிய பெரிய மரங்கள் அடர்ந்து அருமையாக இருக்கும் சாலை விரிவாக்கம் என்று அனைத்தையும் வெட்டிவீசிவிட்டார்கள். இதே போல முன்பே முயற்சித்திருந்தால் அவ்வளவு மரங்களையும் இழந்திருக்க வேண்டாம்

Transplantation -மாற்று நடுதல் ,வழக்கில் இருக்கும் ஒரு உத்திதான் .
இருப்பினும் பெரிய அளவில் செய்துள்ளனர் நெடுஞ்சாலை துறையினர் .
வாழ்த்துவோம் .
பசுமையை காப்பாற்றுவோம் .

ரமணியன்

வெளிநாடுகளில் இந்த Tree Transplantation - ஐ சர்வ சாதாரணமாகச் செய்கிறார்கள் . இதற்கென்று ராட்சத எந்திரங்கள் உள்ளன. You Tube -ல் பாருங்கள் .

வீடுகளைக்கூட தற்போது இடம் மாற்றுகிறார்கள் . நாம் கட்டிய வீட்டில் மழைக்காலங்களில் நீர் புகுந்தால் , அதை அப்படியே அலாக்காகத் தூக்கி வேறு இடத்தில் வைத்துக்கொள்ளலாம் .