வாரணாசியில் பாலம் இடிந்ததாக வதந்தி; நெரிசலில் சிக்கி 24 பக்தர்கள் உயிரிழப்பு, 3 போலீஸ் சூப்பிரண்டுகள் ‘சஸ்பெண்டு’

-
வாரணாசி,

வாரணாசியில் பாலம் இடிந்ததாக வதந்தி பரவியதால்
நெரிசலில் சிக்கி 24 பக்தர்கள் உயிரிழந்தனர்.
இந்த சம்பவம் தொடர்பாக போலீஸ் சூப்பிரண்டு 3 பேர்
சஸ்பெண்டு செய்யப்பட்டு உள்ளனர்.

உத்தரபிரதேச மாநிலம் வாரணாசியில் கங்கை நதிக்கரையோரம்
அமைந்துள்ள துமரியா கிராமத்தில் ஜெய் குருதேவின் 2 நாள் விழா
நடந்து வருகிறது. இதில் பங்கேற்பதற்காக திரளான பக்தர்கள்
நேற்று அந்த கிராமத்தில் திரண்டனர்.

இதற்காக துமரியாவுக்கு அருகே உள்ள ராஜ்காட் கங்கை நதி
பாலத்தில் ஒரே நேரத்தில் ஆயிரக்கணக்கான பக்தர்கள் சென்று
கொண்டிருந்தனர். அப்போது பாலத்தின் ஒரு பகுதி உடைந்ததாக
வதந்தி பரவியது. இதனால் பக்தர்கள் ஆங்காங்கே சிதறி ஓடினர்.

இதனால் குறுகிய அந்த பாலத்தில் பெரும் கூட்ட நெரிசல் ஏற்பட்டது.
இதில் சிக்கி பெண்கள், குழந்தைகள் உள்பட 24 பக்தர்கள் பரிதாபமாக
உயிரிழந்தனர். சுமார் 60 பேர் படுகாயமடைந்தனர்.

இதனால் அங்கு பெரும் பரபரப்பு ஏற்பட்டது. இதைத்தொடர்ந்து அங்கு
பாதுகாப்பு பணியில் நின்றிருந்த போலீசாரும், ஜெய் குருதேவ் முகாமில்
உள்ள தன்னார்வ தொண்டர்களும் இணைந்து மீட்பு பணிகளை மேற்
கொண்டனர்.

அவர்கள் காயமடைந்த பக்தர்களை மீட்டு அருகில் உள்ள மருத்துவ
மனைகளில் சேர்த்தனர். அங்கு பலரது நிலைமை கவலைக்கிடமாக
உள்ளதால் உயிரிழப்பு அதிகரிக்கக்கூடும் என அஞ்சப்படுகிறது.

மாநில முதல்–மந்திரி அகிலேஷ் யாதவும் உயிரிழந்தவர்களுக்கு
இரங்கல் தெரிவித்ததுடன், அவர்களது குடும்பத்துக்கு தலா ரூ.2 லட்சம்
இழப்பீடும் அறிவித்து உள்ளார். மேலும் காயமடைந்தவர்களுக்கு இலவச
சிகிச்சை அளிக்கவும் அவர் உத்தரவிட்டார்.

வதந்தி காரணமாக இந்த நெரிசல் ஏற்பட்டதாக தெரியவந்துள்ளது.
இந்த நிகழ்ச்சியில் 4,000 பேர் வரை பங்கேற்பார்கள் என போலீசார்
எதிர்பார்த்து அதற்கான பாதுகாப்பு ஏற்பாடுகள் செய்தனர்.

ஆனால் 50,000 பேர் கலந்து கொண்டதால் உரிய பாதுகாப்பு ஏற்பாடுகள்
செய்ய முடியவில்லை. மேலும் ராஜ்காட் பாலத்தில் சென்ற ஒருவர் திடீர்
என்று மூச்சு திணறல் ஏற்பட்டு மயங்கி விழுந்து இறந்தார். இதனால்
அந்த இடத்தில் பரபரப்பு ஏற்பட்டது. ஆனால் பாலம் இடிந்து விட்டதாக
வதந்தி பரவியது. இதனால் பலர் தப்பி ஓட முயன்ற போது நெரிசல்
ஏற்பட்டு பலர் பலியானார்கள்.

இந்த சம்பவம் தொடர்பாக போலீஸ் சூப்பிரண்டு 3 பேர் சஸ்பெண்டு
செய்யப்பட்டு உள்ளனர். எவ்வளவு மக்கள் கூடுவார்கள் என்பதை முன்
கூட்டியே கணித்து அதற்கு ஏற்ப போக்குவரத்து மாற்றம் மற்றும்
பாதுகாப்பு ஏற்பாடுகளை செய்ய தவறியதாக போலீசார் மீது குற்றம்
சாட்டப்பட்டுள்ளது.
-
----------------------------------------------
தினத்தந்தி