கோவை-பெங்களூரு இடையே விரைவில் டபுள் டக்கர் விரைவு ரயில் சேவை: கோட்ட மேலாளர் ஹரிசங்கர் வர்மா

கோவை-பெங்களூரு இடையே டபுள் டக்கர் விரைவு
ரயில் சேவை விரைவில் தொடங்கப்படும் என்று சேலம்
கோட்ட ரயில்வே மேலாளர் ஹரிசங்கர் வர்மா
தெரிவித்துள்ளார்.

கோவை, இந்திய தொழில் வர்த்தக சபையில் நடைபெற்ற
தொழில் அமைப்புகளுடனான கலந்தாய்வுக் கூட்டத்தில்
அவர் வியாழக்கிழமை பேசியதாவது:

கோவை ரயில் நிலையத்துக்கு வரும் பயணிகளின்
எண்ணிக்கைக்கு ஏற்ப, இங்கு  போதுமான இடவசதி
இல்லாத காரணத்தால் நெருக்கடி ஏற்பட்டு வருகிறது.

எதிர்காலத்தில் அதிகரிக்கக் கூடிய பயணிகள் மற்றும்
ரயில்களின் எண்ணிக்கையைக் கருத்தில் கொண்டால்,
தற்போது உள்ள கட்டமைப்பு வசதிகள் போதுமானதாக
இல்லை.

எனவே, நெருக்கடியை சமாளிக்க போத்தனூர் ரயில்
நிலையத்தை விரிவுபடுத்தி, வசதிகளை அதிகரிக்கத்
திட்டமிட்டுள்ளோம். ஆனால், பெரும்பாலானோர் அதற்கு
மாற்றாக வடகோவை ரயில் நிலையத்தைத் தேர்வு
செய்ய வேண்டும் என்ற கோரிக்கையை முன் வைத்து
வருகின்றனர்.

இது குறித்து ரயில் பயணிகள், தொழில் அமைப்பினர்
உள்ளிட்டோர் தங்களது கருத்துகளைத் தெரிவிக்க முன்வர
வேண்டும். அப்போதுதான் எதிர்காலத்தில் ரயில் நிலையத்தை
இடநெருக்கடி இல்லாமல் பயன்படுத்த முடியும்.
மேலும் ரயில்களும் தாமதமின்றி வந்து செல்ல வழிவகை
ஏற்படும்.

இருகூர் ரயில் நிலையத்தில் தற்போது சரக்குகள்
கையாளப்பட்டு வருகின்றன. இதற்காக பல்வேறு கட்டமைப்பு
வசதிகள் இருகூர் ரயில் நிலையத்தில் ஏற்படுத்தப்பட்டுள்ளன.
ஆனால், பெரும்பாலான தொழில் நிறுவனங்கள் சரக்குகளை
கையாள பீளமேடு ரயில் நிலையத்தைப் பயன்படுத்தி
வருகின்றன.

எனவே, சரக்குகளைக் கையாள இருகூர் ரயில் நிலையத்தைப்
பயன்படுத்த முன்வர வேண்டும். இதற்கான சுற்றறிக்கையை
வெளியிட ரயில்வே நிர்வாகம் தயாராக உள்ளது.

கோவை-பெங்களூரு இடையே டபுள் டக்கர் விரைவு ரயில்
சேவை விரைவில் தொடங்கப்படும். ஆனால், இந்த ரயில்
சேவையின் நேரம் மற்றும் காலம் குறித்து ரயில்வே துறைதான்
அறிவிக்க வேண்டும். போத்தனூர்-பொள்ளாச்சி இடையே ரயில்வே
அகலப் பாதை அமைக்கும் பணிகள் நிறைவடைந்துவிட்டன.

ஆனால், இப்பாதையில் ரயில் போக்குவரத்தைத் தொடங்குவதற்கு
முன்பாக ரயில்வே பாதுகாப்புக் குழு ஆய்வு செய்ய வேண்டும்.
இப் பணி டிசம்பர் மாதத்துக்குள் முடிவடைந்து ரயில் போக்குவரத்து
தொடங்கும் என எதிர்பார்க்கிறேன்.

கோவை ரயில் நிலையத்தில் நாட்டிலேயே முதன்முறையாக
பன்னடுக்கு வாகன நிறுத்துமிடம் அமைக்க ரூ.9.62 கோடி மதிப்பீடு
செய்யப்பட்டுள்ளது. இதற்கான நிலத்தை ரயில்வே நிர்வாகம்
வழங்கத் தயாராக உள்ளது. அந்த இடத்தில் தனியார் நிறுவனங்கள்,
அமைப்புகள் முன்வந்து இதை ஏற்று நடத்தலாம் என்றார்.

இந்திய தொழில் வர்த்தக சபையின் தலைவர் வனிதா மோகன்,
பொருளாளர் துரைராஜ், செயலாளர் நடராஜ், கொடிசியா தலைவர்
சுந்தரம் உள்ளிட்டோர் கலந்து கொண்டனர்.
-
------------------------------
தினமணி

டபுள் டெக்கர் ரயில்வண்டிகள் அவ்வளவு வசதியாக இருப்பதில்லை .
இம்முயற்சி தோல்வியே . வடிவமைப்பை மாற்றினால்தான் வரவேற்கப்படும் .

ரமணியன்