தகவல் தொழில்நுட்ப துறையில் 4 லட்சம் வேலைவாய்ப்புகள்

தமிழகத்தில் தகவல் தொழில்நுட்பத் துறை வளர்ச்சியின்
பயனாக 4 லட்சம் பேருக்கு வேலை வாய்ப்புகள்
கிடைத்துள்ளன என்று தமிழக பள்ளிக் கல்வித் துறை
அமைச்சர் பாண்டியராஜன் கூறினார்.

இந்திய தொழில் கூட்டமைப்பின் (சிஐஐ) சார்பில், தகவல்
மற்றும் தகவல்தொடர்பு தொழில்நுட்பம் குறித்த சர்வதேச
கருத்தரங்கம் சென்னையில் செவ்வாய்க்கிழமை
தொடங்கியது.

2 நாள் கருத்தரங்கின் தொடக்க நிகழ்ச்சியில் அமைச்சர்
பாண்டியராஜன் பேசியது:

தகவல் தொழில்நுட்பத் துறையில் பிற மாநிலங்களுடன்
ஒப்பிடும்போது தமிழகம் பெரும் வளர்ச்சி அடைந்துள்ளது.
இங்குள்ள 2,500 மருத்துவமனைகள் தகவல் தொழில்
நுட்பத்தின் மூலம் இணைக்கப்பட்டுள்ளன. அதன் பயனாக
ஒருங்கிணைந்த மருத்துவச் சேவையை அளிக்க முடிகிறது.

பள்ளி, கல்லூரி மாணவர்களுக்கு தமிழக அரசு இலவச
மடிக்கணினி வழங்குகிறது. இதன் மூலம் தகவல் தொழில்நுட்பம்
கிராமங்கள் வரை பரவியுள்ளது.

தகவல் தொழில்நுட்பத் துறையின் மாபெரும் வளர்ச்சியின்
மூலம் தமிழகத்தில் 4 லட்சம் பேருக்கு வேலை வாய்ப்புகள்
கிடைத்துள்ளன என்றார் அவர்.

இந்தத் துறையின் முதன்மைச் செயலர் டி.கே.ராமச்சந்திரன்
பேசியதாவது:

சென்னையை அடுத்த சோழிங்கநல்லூரில், 2 லட்சம் சதுர அடி
பரப்பளவில் மிகப்பெரிய தகவல்தொழில்நுட்பப் பூங்கா விரைவில்
அமையவுள்ளது. சென்னையைத் தவிர கோவை, ஓசூர், சேலம்,
மதுரை, திருநெல்வேலி உள்ளிட்ட இடங்களிலும் தகவல்
தொழில்நுட்ப நிறுவனங்களைத் தொடங்க பிரபல நிறுவனங்கள்
அனுமதி கோருகின்றன.

தமிழக அரசின் சேவைகளை எளிதில் பெறும் வகையில்
பிரத்யேக செயலி உருவாக்கும் பணிகள் நடைபெற்று வருகின்றன.
இந்தச் செயலி விரைவில் அறிமுகப்படுத்தப்படும் என்றார் அவர்.

கருத்தரங்கின் தலைவர் ரவி விஸ்வநாதன், இணைத் தலைவர்
பிரேம்குமார், டிசிஎஸ் நிறுவனத்தின் தலைமை செயல் அதிகாரி
என்.சந்திரசேகரன் உள்ளிட்டோர் இந்த நிகழ்ச்சியில் கலந்து
கொண்டனர்.
-
----------------------------------------
தினமணி