எங்கே போவேன்

by geetham Sat Sep 24, 2016 10:44 am

இன்றைய பெண் குழந்தையின் கதறலாய்...முடியாது தொடரும் வன்முறையின் வலியாய் .முகநூலில் 15000 பகிர்வுகள் பகிரப்பட்ட கவிதை

அப்பான்னு நினச்சேன்

அசிங்கமாய்த் தொட்டான்

சகோதரன்னு பழகினேன்

சங்கடப்படுத்தினான்

மாமான்னு பேசினேன்

மட்டமாய் நடந்தான்

உறவுகள் அனைத்தும்

உறவாடவே அழைக்கின்றது...

பாதுகாப்பை நாடி

பள்ளிக்குச் சென்றேன்

ஆசிரியனும் அரவணைத்து

மறுக்காதே மதிப்பெண்ணும்

குறையுமென்றான்...

நட்புக் கரமொன்று

நண்பனாய் தலைகோதி

தூங்கென்றான்

மரத்த மனம்

மருண்டு சுருண்டு

மயங்கித் தூங்கையில்

கைபேசியில் படமெடுத்தான்

அவனும் ஆண்தானே...

கதறி அழ

கடவுளைச் சரணடைந்தேன்

ஆறுதலாய் தொட்டுத்தடவி

ஆண்டவன் துணையென்றான்

சாமியாரும்...

அலறி அடித்து

ஓடுகின்றேன்

எங்கே போவேன்?

சமத்துவம் வந்ததென

சத்தமாய்க் கூவுகின்றார்

பெண்ணை

பெண்ணாய் பாராமல்

மனிதராய் பார்க்கும் நாள்

எந்நாளோ?

பாவிகளின் பாலியல் வன்முறை

எப்போது ஓயுமோ?

2008 ஆம் ஆண்டு விகடனில் வந்த கட்டுரையின் விளைவாக நான் எழுதியுள்ல இக்கவிதை என் பெயரின்றி உலகெங்கும் உலவி வருகின்றது...ஐரோப்பாவின் தமிழ் ஒலி வானொலியில் ஹரந்தணிகை என்பவர் தனது கவிதையாக போட்டுள்ளார்....

எங்கே போவேன் SwyiC9KbRyuf29JNL3eA+1157609_191150144394053_87536117_n

எங்கே போவேன் SwyiC9KbRyuf29JNL3eA+1157609_191150144394053_87536117_n

by **ஜாஹீதாபானு** Sat Sep 24, 2016 5:46 pm

கவிதை மிக அருமை

//2008 ஆம் ஆண்டு விகடனில் வந்த கட்டுரையின் விளைவாக நான் எழுதியுள்ல இக்கவிதை என் பெயரின்றி உலகெங்கும் உலவி வருகின்றது...ஐரோப்பாவின் தமிழ் ஒலி வானொலியில் ஹரந்தணிகை என்பவர் தனது கவிதையாக போட்டுள்ளார்....
//

இது போல எவ்வளவோ பேர் திருட்டுத்தனம் செய்கிறார்கள். மற்றவர் கவிதையை தன்னுடையது என சொல்வதில் என்ன சந்தோஷமோ... என்ன கொடுமை சார் இது

by **T.N.Balasubramanian** Sat Sep 24, 2016 6:31 pm

1 )முதலில் ,
கவிதை நன்றாக ,யதார்த்தமாக உள்ளது .
வாழ்த்துகள்

2)அதிர்ச்சியாக உள்ளது .
ஆனால் , ஈகரையிலும் இது போல் ,
மற்றவர்கள் கவிதையை தனது என்று
கூறிக் கொண்டவர்கள் உண்டு .
என்ன பண்ணுவது இவர்களை ?
நிற்க ,

3. முதலில் உங்கள் கவிதை எங்கு எதில் எப்போது பிரசுரமானது ? உங்கள் வலைப்பூவிலா ?
இது விஷயம் ஐரோப்பிய வானொலி கவனத்திற்கு கொண்டு வரலாமே !

ரமணியன்

by **M.Jagadeesan** Sat Sep 24, 2016 7:29 pm

இலக்கியத் திருடர் எங்கும் உண்டு
...இதுவோ தமிழுக்குச் செய்யும் தொண்டு ?
நலம்தரும் இலக்கிய வரிகளை எடுத்து
...நாளும் தருவார் பாக்கள் தொடுத்து !
வலம்வரும் சினிமாக் கவிஞர் சிலபேர்
...வாழ்வு சிறக்க இலக்கியமே வேர் !
மலத்தைத் தின்னும் பன்றிகள் போல
...எதையும் செய்வார் தாங்கள் வாழ !

by Ramalingam K Sat Sep 24, 2016 8:02 pm

ஆக்கம் எவரது ஆனால் என்ன
நோக்கம் எவரையும் சென்று சேர்தலே
தாக்கம் பெற்றுத் தளர்வுற வேண்டாம்
போக்கும் பெண்ணின் துயரை நும்பா

by geetham Sat Sep 24, 2016 8:42 pm

T.N.Balasubramanian wrote:1 )முதலில் ,
கவிதை நன்றாக ,யதார்த்தமாக உள்ளது .
வாழ்த்துகள்

2)அதிர்ச்சியாக உள்ளது .
ஆனால் , ஈகரையிலும் இது போல் ,
மற்றவர்கள் கவிதையை தனது என்று
கூறிக் கொண்டவர்கள் உண்டு .
என்ன பண்ணுவது இவர்களை ?
நிற்க ,

3. முதலில் உங்கள் கவிதை எங்கு எதில் எப்போது பிரசுரமானது ? உங்கள் வலைப்பூவிலா ?
இது விஷயம் ஐரோப்பிய வானொலி கவனத்திற்கு கொண்டு வரலாமே !

ரமணியன்

மேற்கோள் செய்த பதிவு: 1222601

எனது முதல் கவிதை நூலில் வெளியானது..பின் எனது தேவதாதமிழ் என்ற முகநூல் பக்கத்தில் வெளியிட்டுள்ளேன் சார்.மின்னஞ்சல் அனுப்பியுள்ளேன்...தமிழ் ஒலிக்கு..