வைரமுத்து கவிதைகள் – காலம் கடந்த காதல் கவிதைகள்

**ayyasamy ram** · **ayyasamy ram** Fri Sep 09, 2016 3:37 pm

----

1. சங்க காலம்
-
ஆற்றுத் தூநீர் ஆரல் உண்டு
குருகு பறக்கும் தீம்புனல் நாடன்
கற்றை நிலவு காயும் காட்டிடை
என்கை பற்றி இலங்குவளை ஞெகிழ்த்து
மேனி வியர்ப்ப மெல்லிடை ஒடித்து
வாட்கண் மயங்க உண்டதை மீண்டும்
பசலை உண்ணும் பாராய் தோழி
–
2. காவிய காலம்
–
பொன்னங் கொடியென்பார் போதலரும் பூவென்பார்
மின்னல் மிடைந்த இடையென்பார் – இன்னும்
கரும்பிருக்கும் கூந்தல் சுடர்த்தொடிஉன் சொல்லில்
கரும்பிருக்கும் என்பார் கவி.
–
3. சமய காலம்
–
வெண்ணிலவால் பொங்குதியோ
விரக்தியால் பொங்குதியோ
பெண்ணொருத்தி நான்விடுக்கும்
பெருமூச்சாற் பொங்குதியோ பண்ணளந்த மால்வண்ணன் பள்ளிகொண்ட பான்மையினால்
விண்ணளந்து பொங்குதியோ
விளம்பாய் பாற்கடலே!
–

**ayyasamy ram** · **ayyasamy ram** Fri Sep 09, 2016 3:38 pm

4. சிற்றிலக்கியக் காலம்
–
தூக்கி நிறுத்திவைத்த கொண்டையாள் – மனம்
துள்ளி ஓடும்விழிக் கெண்டையாள் – நெஞ்சைத்
தாக்கி மறுநொடியில் தவிடுபொடியாக்கும்
சண்டையாள் – வெள்ளித் தண்டையாள்
முலை அதிரும்படி மணி உதிரும்படி
மனம் பதறும்படிஆடும் பாவையாள் – வில்
மாரன் பகைமுடிக்கத் தேவையாள்
–
5. தேசிய காலம்
–
சின்னஞ் சிறுகமலப் பூவினாள் – என்
சித்தத்திலே வந்து மேவினாள்
கண்ணில் ஜோதிஒன்று காட்டினாள் – என்
கவியில் காதல்ரசம்
விண்ணில் நிலவெரியும் வேளையில் – பொன்
வீணை கரம்கொண்டு மீட்டினாள்
மண்ணில் விண்ணகம் காட்டியே – அவள்
மறைந்தகதை எங்கு சொல்குவேன்?
–
6 .திராவிட காலம் – 1
–
இல்லாத கடவுள் போன்ற
இடைகொண்ட பெண்ணே உந்தன்
பொல்லாத அழகு பாடப்
பூவாடும் கூந்தல் பாட
சல்லாப விழிகள் பாடத்
தனித்தமிழ் கொண்டு வந்தேன்
நில்லாமற் போனால் கூட்டில்
நிற்குமோ எந்தன் ஆவி?
–

**ayyasamy ram** · **ayyasamy ram** Fri Sep 09, 2016 3:39 pm

7. திராவிட காலம் -2
–
விண் – அப்பம் போன்ற நிலவுவந்து – காதல்
விண்ணப்பம் எழுதுகின்ற இரவு
முத்தமென்ற சொல்போல – நான்
இதழ்சேர வரும்போது உதடுஒட்டாத குறள்போல – நீ
தள்ளியா நிற்பது? விடையாட வேண்டும் வாடி என் கண்ணே
விடிவெள்ளி கண்ணயரும் முன்னே
–
8. புதுக்கவிதைக் காலம் -1
–
ஏப்ரல் சூரியன்
டீசல் புகை
பேருந்து நெரிசல்
அலுவலக எரிச்சல்
இவையெதிலும் வாடாமல்
பத்திரமாய் வைத்திருக்கிறேன்
உனக்குத் தெரியாமல் உதிர்ந்து
யாருக்கும் தெரியாமல் நான் கவர்ந்த
உன் கருங்கூந்தற் சிறுபூவை
–
9. புதுக்கவிதைக் காலம் – 2
–
உன்வீட்டு
ஆன்ட்டனாவிலும்
என்வீட்டு
நைலான் கொடியிலும்
தனித்தனியே காயும்
நேற்று
ஊருக்கு வெளியே நாம்
ஒன்றாய்
அழுக்குச் செய்த உள்ளாடைகள்
–
-வைரமுத்து

Sponsored content · Sponsored content

வைரமுத்து கவிதைகள் – காலம் கடந்த காதல் கவிதைகள்

வைரமுத்து கவிதைகள் – காலம் கடந்த காதல் கவிதைகள்

Re: வைரமுத்து கவிதைகள் – காலம் கடந்த காதல் கவிதைகள்

Re: வைரமுத்து கவிதைகள் – காலம் கடந்த காதல் கவிதைகள்

Re: வைரமுத்து கவிதைகள் – காலம் கடந்த காதல் கவிதைகள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக