காங்கிரஸ் பொதுச் செயலர் பதவியை ராஜிநாமா செய்தார் கமல்நாத்:சீக்கியர் போர்க்கொடி எதிரொலி

காங்கிரஸ் கட்சியின் பொதுச் செயலாளர் பதவியை
அக்கட்சியின் மூத்த தலைவரான கமல்நாத் புதன்கிழமை
ராஜிநாமா செய்தார்.

சீக்கியர்களுக்கு எதிரான கலவரத்தில் கமல்நாத்துக்குத்
தொடர்பிருப்பதாக எழுந்த சர்ச்சையை அடுத்து, அவர்
தனது பதவியை ராஜிநாமா செய்தார்.

அவரது ராஜிநாமாவை காங்கிரஸ் தலைவர் சோனியா காந்தி
ஏற்றுக்கொண்டதாக அக்கட்சியின் செய்தித் தொடர்பாளர்
ரண்தீப் சுர்ஜேவாலா கூறினார்.

முன்னதாக சோனியா காந்திக்கு கமல்நாத் எழுதிய கடிதத்தில்,
"1984-ஆம் ஆண்டில் நிகழ்ந்த கலவரத்தை முன்வைத்து, கடந்த
சில தினங்களாக, எனக்கு எதிராக உருவாக்கப்படும்
தேவையற்ற சர்ச்சைகள், என்னைக் காயப்படுத்தி விட்டன;
இதனால், எனது பதவியை ராஜிநாமா செய்கிறேன்'' என்று
குறிப்பிட்டுள்ளார்.

முன்னதாக, காங்கிரஸ் கட்சியின் பொதுச் செயலர்களாக,
அக்கட்சியின் மூத்த தலைவர்களான குலாம் நபி ஆஸாத்தும்,
கமல்நாத்தும் கடந்த சில தினங்களுக்கு முன் நியமிக்கப்பட்டனர்.
அதைத் தொடர்ந்து, உத்தரப் பிரதேச மாநில மேலிடப்
பொறுப்பாளராக குலாம் நபி ஆஸாத்தும், பஞ்சாப் மாநில மேலிடப்
பொறுப்பளராக கமல்நாத்தும் நியமிக்கப்பட்டனர்.

அந்த இரு மாநிலங்களிலும் அடுத்த ஆண்டு சட்டப்பேரவைத் தேர்தல்
நடைபெறவுள்ளது.
இதனிடையே, 1984-ஆண்டு நிகழ்ந்த சீக்கியர்களுக்கு எதிரான
கலவரத்தில் தொடர்பிருப்பதாகக் கூறி, கமல்நாத்துக்கு எதிராக
சீக்கியர்கள் போர்க்கொடி உயர்த்தினர். அதையடுத்து, அவர் தனது
கட்சிப் பதவியை ராஜிநாமா செய்துள்ளார்.

விலகினார் அஜித் ஜோகி:
இதனிடையே, சத்தீஸ்கர் மாநில முன்னாள் முதல்வரான அஜித் ஜோகி,
காங்கிரஸ் கட்சியின் அடிப்படை உறுப்பினர் பொறுப்பில் இருந்து
புதன்கிழமை ராஜிநாமா செய்தார். கடந்த சில தினங்களுக்கு முன்
புதிய கட்சி தொடங்குவதாக அறிவித்ததைத் தொடர்ந்து, காங்கிரஸ்
காரிய கமிட்டி உறுப்பினர் பதவியில் இருந்து நீக்கப்பட்டார் அஜித் ஜோகி
-
----------------------
தினமணி