காஷ்மீரில் போராட்டக்காரர்களை விரட்டியடிக்க புதுவகை குண்டு ஒப்புதல் அளித்தார், ராஜ்நாத் சிங்

புதுடெல்லி,

காஷ்மீரில் கடந்த ஜூலை மாதம் 8–ந்தேதி ஹிஸ்புல் முஜாகிதீன் இயக்க தளபதி பர்கான் வானி சுட்டுக்கொல்லப்பட்டதைத் தொடர்ந்து அங்கு கடந்த 50 நாட்களுக்கு மேலாக வன்முறை தலைவிரித்தாடுகிறது.

எதிர்க்கட்சிகள் கோரிக்கை
காஷ்மீர் பள்ளத்தாக்கு பகுதியில் போராட்டக்காரர்களை விரட்டியடிக்க பாதுகாப்பு படையினர் ரவை குண்டுகளை பயன்படுத்தி வந்தனர். இது போராட்டக்காரர்களின் கண் பார்வையை பறித்து விடுவதால் கடும் எதிர்ப்பு எழுந்துள்ளது.

காஷ்மீரில் அமைதி நிலவுவதற்கு எதிர்க்கட்சிகள் வலியுறுத்திய கோரிக்கைகளில் ஒன்று, அங்கு ரவை குண்டுகள் பயன்படுத்துவதை நிறுத்த வேண்டும் என்பதாகும்.

இது குறித்து மத்திய அரசு பரிசீலித்து வந்தது.

புது வகை குண்டு
இந்த நிலையில் ரவை குண்டுகளுக்கு பதிலாக போராட்டக்காரர்களை ஒடுக்குவதற்கு ‘பாவா’ (பெலார்கானிக் ஆசிட் வானில்லில்லமைட்) என்ற ரசாயனப்பெயரால் அழைக்கப்படுகிற மிளகாய்த்தூளைக் கொண்டு தயாரிக்கப்படுகிற குண்டுகளை பயன்படுத்த உள்துறை அமைச்சக இணைச்செயலாளர் பிரசாத் தலைமையிலான 7 உறுப்பினர் குழு, மத்திய அரசுக்கு சிபாரிசு செய்தது.

இந்த சிபாரிசை மத்திய உள்துறை மந்திரி ராஜ்நாத் சிங் ஏற்றுக்கொண்டு, ஒப்புதல் அளித்தார்.

ஆயிரம் குண்டுகள்
இந்த வகையை சேர்ந்த குண்டுகள், கடந்த ஓராண்டு காலத்துக்கு மேலாக லக்னோவில் உள்ள மத்திய அரசின் சி.எஸ்.ஐ.ஆர். ஆய்வுக்கூடத்தில் பரிசோதிக்கப்பட்டு வந்தது குறிப்பிடத்தக்கது.

இந்த வகையை சேர்ந்த ஆயிரம் குண்டுகள் காஷ்மீர் பள்ளத்தாக்கு பகுதிக்கு அனுப்பி வைக்கப்படுகிறது.

இதுபற்றி மத்திய உள்துறை மந்திரி ராஜ்நாத் சிங் ஏற்கனவே கூறும்போது, ‘‘ரவை குண்டுகளுக்கு பதிலாக பாதுகாப்பு படையினருக்கு மாற்றுவகை குண்டுகள் வழங்கப்படும்’’ என கூறியது நினைவுகூரத்தக்கது.

அதே நேரத்தில் ரவை குண்டுகளுக்கு முழுவதுமாக தடை விதிக்கப்படவில்லை.

மிகவும் அபூர்வமாக, தவிர்க்க முடியாத சம்பவங்களின்போது அவை பயன்படுத்தப்படும் என மத்திய அரசு வட்டாரங்கள் கூறுகின்றன.
-
தினத்தந்தி