நவம்பரில் நடக்கும் அமெரிக்க தேர்தலில் சாதனை படைக்க காத்திருக்கும் 3 இந்திய வம்சாவளி பெண்கள்

**ayyasamy ram** · **ayyasamy ram** Tue Aug 23, 2016 11:37 am

-
அமெரிக்க தேர்தலில் 3 இந்திய வம்சாவளி பெண்கள் சாதனை படைக்க காத்திருக்கின்றனர்.

அமெரிக்காவில் நவம்பர் மாதம் அதிபர் தேர்தல் நடக்கிறது. ஆளும் ஜனநாயக கட்சி சார்பில் அதிபர் வேட்பாளராக ஹிலாரி கிளிண்டன் களம் இறக்கப்பட்டுள்ளார். அவர் அதிபர் தேர்தலில் வெற்றி பெறுவார் என்று எதிர்பார்க்கப்படுகிறது. அதேபோல் அமெரிக்க நாடாளு மன்றத்தின் இரு சபைகளுக்கும் உறுப்பினர்கள் தேர்ந்தெடுக்கப்பட உள்ளனர்.

இந்தத் தேர்தலில் இந்திய வம்சாவளியினர் 5 பேர் எம்.பி.க்களாக தேர்ந்தெடுக்கப் படுவார்கள் என்று எதிர்பார்க்கப் படுகிறது. அவர்களில் 3 பேர் இந்திய வம்சாவளி பெண்கள். ஜனநாயக கட்சி சார்பில், வாஷிங்டனின் சியாட்டில் பகுதியில் பிரமிளா ஜெயபால் என்பவர் நாடாளுமன்ற உறுப்பினர் தேர்தலில் போட்டியிடுகிறார். இவர் சென்னையில் பிறந்து அமெரிக்காவில் குடியேறியவர் ஆவார்.

இதேபோல ஜனநாயக கட்சியின் சார்பில், தற்போது கலிபோர்னியா மாகாண அட்டர்னி ஜெனரலாக உள்ள கமலா ஹாரிஸ் என்பவர் அமெரிக்க நாடாளுமன்ற மேலவை உறுப்பினர் தேர்தலில் போட்டியிடுகிறார். இவரது தாயார் சியாமளா கோபாலன் சென்னையில் இருந்து அமெரிக்காவில் குடியேறியவர் ஆவார். தந்தை ஜமைக்காவை சேர்ந்தவர்.

தேர்தலில் கமலா வெற்றி பெற்றால் மேலவைக்குத் தேர்ந் தெடுக்கப்படும் முதல் இந்திய வம்சாவளி பெண் என்ற பெருமை கிடைக்கும். இந்தத் தேர்தலில் சமீபத்தில் கருத்து கணிப்பின்படி பிரமிளாவும் கமலாவும் வெற்றி பெறுவார்கள் என்று எதிர்பார்க்கப்படுகிறது.

அதேபோல் புளோரிடாவில் இருந்து குடியரசு கட்சி சார்பில் லத்திகா மேரி தாமஸ் என்பவர் நாடாளுமன்ற உறுப்பினர் தேர் தலில் போட்டியிடுகிறார். இவர் கேரளாவின் கோட்டயம் மாவட்டம், பாளை பகுதியை பூர்விகமாகக் கொண்டவர் ஆவார்.

ஜனநாயகக் கட்சி சார்பில் 2 முறை எம்.பி.யாகத் தேர்ந் தெடுக்கப்பட்ட அமி பேரா மீண்டும் தேர்தலில் போட்டியிடுகிறார். இந்தத் தேர்தலில் 19 பெண்கள் போட்டியிடுகின்றனர்.

தி இந்து

நவம்பரில் நடக்கும் அமெரிக்க தேர்தலில் சாதனை படைக்க காத்திருக்கும் 3 இந்திய வம்சாவளி பெண்கள்