கணவன் மனைவிக்காற்றியது

by **சிவா** Thu Sep 25, 2008 11:39 am

மங்கல நாண் பூட்டி
கைப்பிடித்து
கூட்டிச் சென்றாய்
இல்லறத்திற்கு
உன்
இல்லத்திற்கு

பின்தொடர்ந்தேன்
புத்தம் புதிய உலகிற்குள்
நுழைகிறேன் என்று
புரியாமலேயே...

தொடர்வண்டியைக் கூட
தொலைக்காட்சியில் மட்டுமே
பார்த்திருந்தவள்...

ஆகாயத்தில் பறந்தேன்
சிறகு முளைத்த கனவில் மட்டுமல்ல
நிலவில் தேனுண்ட தேனிலவு நாட்களில்...

ஊர்க்கோடியைத் தாண்டாதவள்
ஊட்டியின் மலையழகில்
மயங்கிவிட்டேன்

பாரதி கண்டித்த
பழமொழி பேசி
உயர்நிலைப் பள்ளியோடு
உயர்கல்விக்கு வைக்கப்பட்ட
முற்றுப்புள்ளியை
கமாவாக்கினாய்...

இல்லத்தரசி
பட்டத்தரசியானேன்

வீட்டு வேலையிலும்
விதிவிலக்கு சொன்ன
கணக்குகள் கடந்து
இன்று
அனைத்திடத்திலும் அசத்துகிறேன்

ஆண்மகனை
அண்டி வாழ்வதே
பெண்ணுக்குப் பெருமை
என்பதை எதிர்த்து
எனக்கென
சுயமாய்
அறிமுகம் கொடுத்துவிட்டாய்...

தந்தை மகனுக்காற்றுவதோ
மகன் தந்தைக்காற்றுவதோ
குறள் கூறும்

நீ எனக்காற்றியது?

என்ன பெயர் சூட்டுவேன்?
என்ன பிரதி செய்வேன்?

உன் பெயரே
எனக்கான முகவரி...

முன்னேற வைத்த
உன் பெயரை
பின்னால் அல்லவா
இணைக்கிறேன்!!!

பார்கவி மோஹன்