தமிழில் யுனானி மருத்துவப் பாடங்கள்: சென்னை உயர்நீதிமன்றம் உத்தரவு

உருது மொழியில் உள்ள யுனானி மருத்துவப் பாடங்களை
விரைவாகத் தமிழில் மொழிபெயர்க்க வேண்டும் என
சென்னை உயர்நீதிமன்றம் உத்தரவு பிறப்பித்துள்ளது.

5 மாவட்ட மருத்துவமனைகள், 8 தாலுகா மருத்துவமனைகள்,
27 ஆரம்ப சுகாதார நிலையங்களுக்கு 24 உதவி மருத்துவ
அதிகாரிகளை நேரடியாகத் தேர்வு செய்வது தொடர்பாக
2012 நவம்பர் 16-இல் டி.என்.பி.எஸ்.சி. அறிவிப்பாணை வெளிட்டது.

இதில் 4 இடங்கள் பிற்படுத்தப்பட்ட வகுப்பினருக்கும்,
7 இடங்கள் மிகவும் பிற்படுத்தப்பட்ட வகுப்பினருக்கும்,
10 இடங்கள் தாழ்த்தப்பட்ட வகுப்பினருக்கும், ஒரு இடம்
அருந்ததியருக்கும் ஒதுக்கப்பட்டது.

இதில், இடஒதுக்கீடுக்கு தகுதியான விண்ணப்பதாரர்கள்
கிடைக்கப்பெறாவிட்டால் அந்தப் பணியிடங்கள் 2011 நவம்பர்
28-ஆம் தேதி பிறப்பிக்கப்பட்ட அரசாணையின்படி பிற
பிரிவினரைக் கொண்டு நிரப்பப்படும் எனத் தெரிவிக்கப்பட்டதை
எதிர்த்து வழக்குரைஞர் எம்.பழனிமுத்து சென்னை உயர்
நீதிமன்றத்தில் மனு தாக்கல் செய்தார்.

அதில், "உருது தெரியாததால் மிகவும் பிற்படுத்தப்பட்ட,
தாழ்த்தப்பட்ட, பழங்குடியின வகுப்பினர், இந்தப் பதவிகளுக்கு
விண்ணப்பிப்பதில்லை. அதற்கு உருதுவில் உள்ள யுனானி
மருத்துவப் பாடங்களை தமிழில் மொழிபெயர்க்க வேண்டும்.

இதர வகுப்பினரை கொண்டு நிரப்ப வேண்டும் என்ற
அரசாணையை ரத்து செய்ய வேண்டும். அதுவரை உதவி மருத்துவ
அதிகாரிகள் நியமனத்திற்கு தடை விதிக்க வேண்டும்' எனக்
கோரியிருந்தார்.

இந்த மனு மீதான விசாரணை தலைமை நீதிபதி
எஸ்.கே.கௌல், நீதிபதி ஆர்.மகாதேவன் முன்பு நடந்தது.

அப்போது தமிழக அரசு சார்பில், "யுனானி மருத்துவப் பாடங்களை
தமிழில் மொழிபெயர்ப்பதற்கான நடவடிக்கை மேற்கொள்ளப்பட்டு
வருகிறது' என தெரிவிக்கப்பட்டது.

இதையடுத்து, உருது மொழியில் உள்ள யுனானி மருத்துவப்
பாடங்களை விரைவாக தமிழில் மொழிபெயர்க்க நடவடிக்கை
எடுக்க வேண்டும் என நீதிபதிகள் உத்தரவிட்டனர்.
-
---------------------------
தினமணி