முன்பதிவின்றி பயணிக்கக்கூடிய சிறப்பு ரயில் சேவை: அமைச்சர் சுரேஷ் பிரபு

முன்பதிவு செய்யாமல் பயணிப்பதற்கான பிரத்யேக
ரயில் சேவை விரைவில் தொடங்கப்படும் என்று
ரயில்வே துறை அமைச்சர் சுரேஷ் பிரபு அறிவித்துள்ளார்.

இதைத் தவிர பல்வேறு சிறப்பம்சங்களைக் கொண்ட
மேலும் 3 வகையான புதிய ரயில் சேவைகளை
அறிமுகப்படுத்தப் போவதகாவும் அவர் தெரிவித்துள்ளார்.

குஜராத் மாநிலம், வதோதராவில் புதன்கிழமை நடைபெற்ற
நிகழ்ச்சியொன்றில் பங்கேற்ற சுரேஷ் பிரபு, இதுதொடர்பாக
பேசியதாவது:

ஏழை மக்கள் அனைவருக்கும் ரயில் போக்குவரத்து சேவையை
ஏற்படுத்திக் கொடுக்க வேண்டும் என்பது பிரதமர் மோடியின்
தொலைநோக்குத் திட்டங்களில் ஒன்று.

பொருளாதாரத்தில் பின்தங்கிய மக்கள் பெரும்பாலும் முன்
பதிவு செய்து ரயில்களில் பயணம் செய்வதில்லை.

முன்பதிவில்லாத பொதுப் பெட்டிகளிலேயே அவர்கள்
பயணிக்கின்றனர். நீண்ட தொலைவு இயக்கப்படும் ரயில்களில்
முன்பதிவில்லாத பொதுப் பெட்டிகள் இரண்டு மட்டுமே உள்ளன.
அவற்றை நான்காக உயர்த்தத் திட்டமிடப்பட்டுள்ளது.

மேலும், ஏழை மக்களுக்காக முழுக்க, முழுக்க முன்பதிவில்லாத
பெட்டிகளை மட்டுமே கொண்ட சிறப்பு ரயில்கள் அறிமுகப்
படுத்தப்பட உள்ளன. “அந்த்யோதயா எக்ஸ்பிரஸ்’ என்ற பெயரிலான
அந்த அதிவேக ரயில்கள், நீண்ட தொலைவுக்கு இயக்கப்படும்.

இதைத் தவிர, 3 அடுக்கு குளிர்சாதன வசதி பெட்டிகள் மட்டுமே
கொண்ட “ஹம்சஃபர்’ ரயில் சேவையும் புதிதாக அறிமுகப்படுத்தப்
பட உள்ளது.அதுமட்டுமன்றி மணிக்கு 130 கிலோ மீட்டர் வேகத்தில்
இயக்கப்படும் “தேஜஸ்’ வகை ரயில்களும் புதிதாக வரவுள்ளன.
அந்த ரயில்களில் வை-ஃபை மற்றும் உணவக வசதிகள் இருக்கும்.

நான்காவதாக “உதய்’ என்ற பெயரிலான இரண்டு அடுக்கு
(டபுள் டெக்கர்) ரயில் சேவையையும் அரசு அறிமுகப்படுத்தவுள்ளது.
வழக்கமான ரயில்களைக் காட்டிலும் 40 சதவீதம் பேர் கூடுதலாக
இதில் பயணிக்க முடியும்.

நாட்டின் ரயில் சேவையை மேலும் அதிகரிக்க இந்த 4 வகையான
புதிய ரயில்கள் உறுதுணையாக இருக்கும் என்றார் சுரேஷ் பிரபு
–
——————————
தினமணி