பெண்களுக்கான 3 ஆயிரம் மீட்டர் ஸ்டீபிள்சேஸ்: இந்திய வீராங்கனை லலிதா பாபர் இறுதி சுற்றுக்கு தகுதி

ரியோ டி ஜெனீரோ,

பெண்களுக்கான 3 ஆயிரம் மீட்டர் ஸ்டீபிள்சேஸ் பந்தயத்தில் இந்திய வீராங்கனை லலிதா பாபர் இறுதி சுற்றுக்கு முன்னேறினார்.

இறுதி சுற்றில் லலிதா பாபர்
31–வது ஒலிம்பிக் போட்டி பிரேசில் நாட்டில் உள்ள ரியோடிஜெனீரோவில் நடந்து வருகிறது. இதில் 8–வது நாளான நேற்றும் பெரும்பாலான போட்டிகளில் இந்தியாவுக்கு சோகமே மிஞ்சியது. தடகள போட்டியில் பெண்களுக்கான 3 ஆயிரம் மீட்டர் ஸ்டீபிள்சேஸ் தகுதி சுற்று பந்தயத்தில் இந்திய வீராங்கனைகள் லலிதா பாபர், சுதாசிங் உள்பட 52 பேர் கலந்து கொண்டனர். ஸ்டீபிள்சேஸ் என்பது 3 ஆயிரம் மீட்டர் தூரத்தை ஓடுவதுடன் 27 முறை தடைகளை தாண்டுவதுடன், தண்ணீரிலும் குதித்து ஓட வேண்டிய கடுமையான போட்டியாகும்.

இதில் இந்திய வீராங்கனை லலிதா பாபர் 9 நிமிடம் 19.76 வினாடியில் பந்தய தூரத்தை கடந்து புதிய தேசிய சாதனை படைத்ததுடன், ஒட்டு மொத்தத்தில் 7–வது இடத்தை பிடித்து இறுதி சுற்றுக்கும் முன்னேறினார். மற்றொரு இந்திய வீராங்கனை சுதாசிங் 9 நிமிடம் 43.29 வினாடியில் பந்தய தூரத்தை கடந்து 30–வது இடம் பெற்று இறுதி சுற்று வாய்ப்பை இழந்து ஏமாற்றம் அளித்தார். 15 வீராங்கனைகள் பங்கேற்கும் இறுதி சுற்று போட்டி நாளை நடக்கிறது.

2–வது இந்திய வீராங்கனை
ஒலிம்பிக் வரலாற்றில் தடகளத்தில் இறுதி சுற்றை எட்டிய 2–வது வீராங்கனை என்ற பெருமையை மராட்டியத்தை சேர்ந்த லலிதா பாபர் பெற்றுள்ளார். இதற்கு முன்பு 1984–ம் ஆண்டில் லாஸ்ஏஞ்சல்சில் நடந்த ஒலிம்பிக் போட்டியில் 400 மீட்டர் தடை ஓட்டத்தில் இந்திய வீராங்கனை பி.டி.உஷா இறுதிப்போட்டிக்கு முன்னேறி இருந்தார்.

பெண்களுக்கான 100 மீட்டர் ஓட்டத்தில் இந்திய வீராங்கனை டுட்டீ சந்த் தகுதி சுற்றை தாண்டவில்லை. தனது பிரிவில் 11.69 வினாடியுடன் 7–வது இடம் பிடித்த அவர் அரை இறுதி வாய்ப்பை இழந்து நடையை கட்டினார்.

நிர்மலா தோல்வி
பெண்களுக்கான 400 மீட்டர் ஓட்டத்தில் இந்திய வீராங்கனை நிர்மலா ஷெரோன் தோல்வி அடைந்தார். தகுதி சுற்றில் ஒவ்வொரு பிரிவிலும் தலா 2 பேர் வீதம் அரைஇறுதிக்கு தகுதி பெற முடியும் என்ற நிலையில், நிர்மலா தனது பிரிவில் 53.04 வினாடியில் இலக்கை கடந்து 6–வது இடத்துக்கு தள்ளப்பட்டதால் வெளியேறினார்.
-
தினத்தந்தி