கனிமொழி எம்.பி. பெயரைப் பயன்படுத்தி மோசடி: புகாரை விசாரிக்க உயர் நீதிமன்றம் உத்தரவு

கனிமொழி எம்.பி பெயரைப் பயன்படுத்தி மோசடியில்
ஈடுபட்டதாகக் கூறப்படும் புகாரை, தேவகோட்டை நகர
காவல் ஆய்வாளர் விசாரிக்க சென்னை உயர் நீதிமன்ற
மதுரைக்கிளை வியாழக்கிழமை உத்தரவிட்டது.

சிவகங்கை மாவட்டம், திருப்பத்தூர் தாலுகா ஏ.காளப்பூரைச்
சேர்ந்த ராஜரத்தினம் தாக்கல் செய்த மனு:

தேவகோட்டையைச் சேர்ந்தவர் சரவணன், அவரது மனைவி
மீனாள் ஆகியோர் எனக்கு அறிமுகமாகினர். அப்போது,
தங்களுக்கு கனிமொழி எம்.பி., அவரது தாயார் ராசாத்தி
அம்மாள் ஆகியோரை நன்றாக தெரியும்,
ரூ. 8 லட்சம் பணம் கொடுத்தால் அவர்கள் மூலமாக
கிராம நிர்வாக அலுவலர் வேலை வாங்கித் தருவதாகக் கூறினர்.

மாற்றுத்திறனாளியான நானும் அதை நம்பி கடந்த 2011-இல்
ரூ. 8 லட்சத்தை அவர்களிடம் கொடுத்தேன். சில நாள்களில்
வேலைக்கான உத்தரவு வந்துவிடும் என்றும், அதை தனது
மைத்துனர்கள் வள்ளியப்பன், மெய்யப்பன் ஆகியோரிடம்
கொடுத்து அனுப்புவதாகவும் சரவணன் தெரிவித்தார்.

ஆனால், வேலை வாங்கி கொடுக்கவில்லை. இதனால் பணத்தைத்
திரும்ப கேட்டேன். பணத்தைத் திரும்ப தர முடியாது என்று கூறி
சரவணன், அவரது மனைவி, மைத்துனர்கள் கொலை மிரட்டல்
விடுத்தனர். இதுகுறித்து தேவகோட்டை நகர் காவல் ஆய்வாளரிடம்
2015 நவம்பர் 11-இல் புகார் கொடுத்தும் நடவடிக்கை எடுக்கவில்லை.

நான் கொடுத்த புகார் மீது வழக்குப் பதிவு செய்து நடவடிக்கை
எடுக்க உத்தரவிட வேண்டும் எனக் குறிப்பிட்டிருந்தார். இந்த மனு,
நீதிபதி எஸ்.விமலா முன் வியாழக்கிழமை விசாரணைக்கு வந்தது.

விசாரணையில், அரசுத்தரப்பு வழக்குரைஞர், மனுதாரரின் புகார்
மீதான விசாரணை நிலுவையில் இருப்பதாகத் தெரிவித்தார்.
இதைத் தொடர்ந்து நீதிபதி, மனுதாரரின் புகாரை தேவகோட்டை
நகரக் காவல் ஆய்வாளர் 2 வாரத்துக்குள் விசாரித்து முடிக்க
வேண்டும். புகாரில் முகாந்திரம் இருக்கும்பட்சத்தில் சட்டப்படி
நடவடிக்கை எடுக்க வேண்டும் என உத்தரவிட்டார்.
-
---------------------------------------------
தினமணி