4 தீவிரவாதிகளை சுட்டுக் கொன்று வீர மரணம் அடைந்த ராணுவ வீரருக்கு அசோக் சக்ரா விருது

ஜம்மு-காஷ்மீரில் தீவிரவாதிகளுடனான சண்டையின்போது இறப்பதற்கு முன்னர், பயங்கர ஆயுதங்களுடன் ஊடுருவிய 4 தீவிரவாதிகளை சுட்டுக்கொன்று வீர மரணம் அடைந்த இந்திய ராணுவ வீரர் ஹவில்தார் ஹங்பன் தாதா என்பவருக்கு அசோக் சக்ரா விருது வழங்கப்படும் என அறிவிப்பு வெளியாகியுள்ளது.


ஜம்மு-காஷ்மீர் மாநிலத்தில் 13 ஆயிரம் அடி உயரத்தில் உள்ள ஷம்சாபாரி பகுதியில் கடந்த ஆண்டு மே மாதம் 25-ம் தேதி ஹவில்தார் ஹங்பன் தாதா என்பவர் பாதுகாப்பு பணியில் ஈடுபட்டிருந்தார். அப்போது அந்த பகுதியில் தீவிரவாதிகள் பதுங்கி இருப்பது அவருக்கு தெரியவந்தது.

உடனடியாக அவர் அந்த தீவிரவாதிகளை கொல்வதற்கு என்கவுன்ட்டரில் ஈடுபட்டார். அப்போது அந்த தீவிரவாதிகள் தங்கள் கைகளில் இருந்த துப்பாக்கிகளால் சுட்டனர். இதில் தாதா படுகாயம் அடைந்து உயிருக்கு போராடினார். அந்த நிலையிலும், அவர் மன உறுதியுடன் தீவிரவாதிகளை கொல்வதற்கு தொடர்ந்து துப்பாக்கியால் சுட்டார்.

சுமார் 24 மணிநேரம் நீடித்த துப்பாக்கிச் சூட்டினை எதிர்கொள்ள முடியாமல் 2 தீவிரவாதிகள் கொல்லப்பட்டனர். பின்னர், மற்றொரு தீவிரவாதியுடன் மலைச்சரிவில் கட்டிப்பிடித்து சண்டையிட்டு அவனை கொன்றார்.

இன்னொரு தீவிரவாதி தன்னைத்தானே துப்பாக்கியால் சுட்டு தற்கொலை செய்து கொண்டான். இப்படி 4 தீவிரவாதிகளின் மரணத்திற்கும் காரணமாக இருந்த தாதாவும் படுகாயம் அடைந்து, சிகிச்சை பலனளிக்காமல் 27-3-2015 அன்று மரணம் அடைந்தார். அவர் உரிய நேரத்தில் தீவிரவாதிகளுடன் வீராவேசத்துடன் போரிட்டதால் இந்திய வீரர்கள் பலரின் உயிர்கள் காப்பாற்றப்பட்டது.

இறக்கும்போதும் மனஉறுதியுடன் தீவிரவாதிகளை சுட்டுக் கொன்ற ராணுவ வீரர் தாதாவின் உடல் ராணுவ மரியாதையுடன் அடக்கம் செய்யப்பட்டது.
-maalaimalar

கண்ணீர் அஞ்சலி
RIP சகோதரனே , உன்னை போன்றோரின் உயிர்தியாகத்தால் நங்கள் 135 கோடி பேர் நிம்மதியாக உறங்குகிறோம்.