ஐ.நா.,வில் எம்.எஸ்.சுப்புலட்சுமிக்கு கவுரவம்: ஏ.ஆர்.ரஹ்மான் இசை அஞ்சலி

புதுடில்லி:

மறைந்த பிரபல கர்நாடக இசைக் கலைஞர் எம்.எஸ்.சுப்புலட்சுமியின், 100வது பிறந்த நாளையொட்டி, அவரை கவுரவிக்கும் வகையில், வரும் சுதந்திர தினத்தன்று, ஐ.நா.,சபையில், இசை அஞ்சலி நிகழ்ச்சியை நடத்துகிறார், பிரபல இசைக் கலைஞர் ஏ.ஆர்.ரஹ்மான்.

100வது பிறந்த நாள்:

எம்.எஸ்.சுப்புலட்சுமியின், 100வது பிறந்த நாள், அடுத்த மாதம் வருகிறது. ஐ.நா.,வில், கடந்த, 1966ல், இசை நிகழ்ச்சி நடத்தினார் எம்.எஸ்., அதன், 50வது ஆண்டு விழா, அவருடைய, 100வது பிறந்த நாள் விழா மற்றும் இந்திய சுதந்திர தினத்தின், 70வது ஆண்டு விழா ஆகியவற்றை ஒருங்கிணைத்து, மிகச் சிறப்பாக கொண்டாட ஏற்பாடுகள் செய்யப்பட்டு வருகின்றன.

எம்.எஸ்.சுப்புலட்சுமியை கவுரவிக்கும் வகையில், வரும், 15ல், பிரபல இசையமைப்பாளர் ஏ.ஆர்.ரஹ்மான் இசை அஞ்சலி நிகழ்ச்சிக்கு ஏற்பாடு செய்யப்பட்டுள்ளது. சென்னையைச் சேர்ந்த, பிரபல கண் மருத்துவமனையான சங்கர நேத்ராலயாவின் உதவியுடன், அமெரிக்காவின் நியூயார்க் நகரில் உள்ள ஐ.நா., சபையில், பல்வேறு நிகழ்ச்சிகளுக்கு ஏற்பாடு செய்யப்பட்டுள்ள
தாக, ஐ.நா.,வுக்கான இந்தியத் துாதர் சையது அக்பருதீன் தெரிவித்தார்.

எம்.எஸ்., நினைவாக, ஐ.நா., தலைமையகத்தில், புகைப்பட கண்காட்சியும், பல்வேறு நிகழ்ச்சிகளும், வரும், 15 முதல், 19ம் தேதி வரை ஏற்பாடு செய்யப்பட்டுள்ளன. இந்தியத் துாதரகத்தில் நடக்கும் சுதந்திர தின நிகழ்ச்சிகளில், வெளியுறவு இணையமைச்சர் எம்.ஜே.அக்பர் பங்கேற்கிறார்.

எம்.எஸ். சுப்பு:லட்சுமி நினைவாக, சங்கர நேத்ராலயா சார்பில் அமெரிக்காவின், பல்வேறு இடங்களில், இசை நிகழ்ச்சிகளுக்கும் ஏற்பாடு செய்யப்பட்டுள்ளது. பிரபல கர்நாடக இசைக் கலைஞர் சுதா ரகுநாதன், அக்டோபர், 2ல், ஐ.நா.,வில் இசை நிகழ்ச்சியை நடத்துகிறார்.

இசைக்கான அமர்வு:

இந்தியாவை பூர்வீகமாக உடைய பிரபல இசையமைப்பாளர் ஜுபின் மேத்தா, சிதார் கலைஞர் அனோஷ்கா சங்கர் உள்ளிட்டோரின் நிகழ்ச்சிகளுக்கும் ஏற்பாடு செய்யப்பட்டுள்ளது.இதைத் தவிர, அமெரிக்காவில் உள்ள சங்கர நேத்ராலயா அமைப்பின் மூலம், அங்குள்ள பல்கலையில், எம்.எஸ்., பெயரில், இசைக்கான அமர்வையும் அமைக்க திட்டமிடப்பட்டுள்ளது.