சுதந்திர தின விழாவின்போது தேசிய கீதம் பாட தடை: உ.பி. பள்ளியில் 8 ஆசிரியர்கள் ராஜினாமா

**ayyasamy ram** · **ayyasamy ram** Wed Aug 10, 2016 8:02 am

சுதந்திர தின விழாவின்போது தேசிய கீதம் பாட தடை விதிக்கப்பட்டதற்கு எதிர்ப்பு தெரிவித்து, பள்ளி முதல்வர் உட்பட 8 ஆசிரியர்கள் பதவியை ராஜினாமா செய்துள்ளனர். இதனால் உத்தரப் பிரதேசத்தில் பரபரப்பு ஏற்பட்டுள்ளது.

உத்தரப் பிரதேச மாநிலம் அலகாபாத்தில் பாக்ஹரா பகுதியில், எம்.ஏ. கான்வென்ட் ஸ்கூல் உள்ளது. இங்கு 300-க்கும் மேற்பட்ட மாணவர்கள் படிக்கின்றனர். நாட்டின் 70-வது சுதந்திர தினம் வரும் 15-ம் தேதி நாடு முழுவதும் கோலாகலமாக கொண்டாடப்பட உள்ளது. இந்தப் பள்ளியிலும் சுதந்திர தின விழாவுக்கான ஏற்பாடுகளை ஆசிரியர்களும் மாணவர்களும் செய்து வந்தனர். இந்நிலையில், சுதந்திர தினத்தன்று தேசிய கீதம் பாடக் கூடாது. ஏனெனில், அது இஸ்லாமிய கொள்கைக்கு எதிராக உள்ளது என்று கூறி பள்ளி நிர்வாகத்தினர் தடை விதித்துள்ளனர்.

‘‘சன கண மன அதிநாயக செய கே, பாரத பாக்கிய விதாதா’’ என்பது தேசிய கீதத்தின் முதல் 2 வரிகளாகும். இதன் பொருள், ‘‘இந்தியத் தாயே மக்களின் இன்ப துன்பங்களைக் கணிக்கின்ற நீயே, எல்லாருடைய மனத்திலும் ஆட்சி செய்கிறாய்’’ என்பதாகும்.

இதுகுறித்து பள்ளி மேலாளர் ஜியா உல் ஹக் என்பவர் கூறும்போது, ‘‘தேசிய கீதத்தில் வரும், ‘பாரத பாக்கிய விதாதா’ என்ற வரிகளை பாட அனுமதிக்க முடியாது’’ என்று தெரிவித்துள்ளார். அவர் மேலும் கூறும்போது, ‘‘அல்லா மட்டும்தான் பாக்கிய விதாதா. அப்படி இருக்கும் போது பாரதம்தான் நமது பாக்ய விதாதா என்று எப்படி அழைப்பது’’ என்று பதில் அளித்துள்ளார்.

இதற்கு பள்ளி முதல்வர் உட்பட 8 ஆசிரியர்கள் கடும் எதிர்ப்பு தெரிவித்து கடந்த 2 நாட்களுக்கு முன்னர் தங்கள் பணிகளை ராஜினாமா செய்துள்ளனர். அவர்கள் கூறும்போது, ‘‘நாங்கள் இந்த பள்ளியில் பணியில் சேர்ந்து சில ஆண்டுகள்தான் ஆகின்றன. கடந்த 12 ஆண்டுகளாக பள்ளியில் தேசிய கீதம் பாட அனுமதிப்பதில்லை என்று நிர்வாகத்தினர் கூறியதை கேட்டு நாங்கள் அதிர்ச்சி அடைந்தோம்’’ என்றனர்.

பள்ளி பெண் முதல்வர் பணியை ராஜினாமா செய்த ரிது திரிபாதி கூறும்போது, ‘‘தேசிய கீதத்தில் வரும் சில வரிகளை விட்டுவிட வேண்டும். அதற்கு மறுப்பு தெரிவித்தால் வேலையை ராஜினாமா செய்யலாம் என்று கூறினர். எங்கள் மனசாட்சிப்படி வேலையை ராஜினாமா செய்துவிட்டோம்’’ என்றார்.

அங்கீகாரம் இல்லை

அலகாபாத்தில் உள்ள பேசிக் ஷிக்சா அதிகாரி ஜெய்கரண் யாதவ் கூறும்போது, ‘‘அந்த பள்ளிக்கு கல்வித் துறை அங்கீகாரம் வழங்கவில்லை. ஆனால் தொடர்ந்து செயல்பட்டு கொண்டிருப்பதை அறிந்து ஆச்சரியம் அடைந்தோம். ஒரு வாரத்துக்குள் பள்ளியை மூடும்படி நோட்டீஸ் அனுப்பி உள்ளோம். மேலும் தேசிய கீதத்தை பாடுவதற்கு அனுமதி மறுத்து இன்னொரு குற்றத்தை செய்துள்ளது. இதுகுறித்து விசாரணை நடந்து வருகிறது. குற்றம் நிரூபணமானால் சட்டப்படி நடவடிக்கை எடுக்கப்படும்’’ என்றார்.
-
தி இந்து

ChitraGanesan · ChitraGanesan Wed Aug 10, 2016 10:02 am

இத்தனை நாள் என்ன செய்தார்கள்

**ராஜா** · **ராஜா** Wed Aug 10, 2016 2:52 pm

ChitraGanesan wrote:இத்தனை நாள் என்ன செய்தார்கள்

congress ஆட்சி நடந்ததால் சும்மா இருந்துவிட்டார்கள் போல

Sponsored content · Sponsored content

சுதந்திர தின விழாவின்போது தேசிய கீதம் பாட தடை: உ.பி. பள்ளியில் 8 ஆசிரியர்கள் ராஜினாமா