ஆசியாவிலேயே அதிக வயதான யானை! கின்னஸ் புத்தகத்தில் இடம்பெற முயற்சி

-
ஆசியாவிலேயே மிக அதிக வயதுடைய யானை (86 வயது) என்ற பெருமையை கேரள மாநிலத்தைச் சேர்ந்த தாக்ஷாயணி என்ற கோயில் யானை பெற்றுள்ளது.

இந்த யானையை கின்னஸ் உலக சாதனை புத்தகத்தில் இடம்பெற வைக்கவும் திருவாங்கூர் தேவஸ்வம் வாரியம் விண்ணப்பித்துள்ளது.

இதுகுறித்து கேரள மாநில அரசு புதன்கிழமை வெளியிட்ட செய்திக்குறிப்பில் கூறப்பட்டுள்ளதாவது:

கேரளத்தில் உள்ள புகழ்பெற்ற சபரிமலை ஐயப்பன் உள்ளிட்ட பல ஹிந்துக் கோயில்களை நிர்வகித்துவரும் தன்னாட்சி அதிகாரம் கொண்ட அமைப்பான திருவாங்கூர் தேவஸ்வம் வாரியம், தாக்ஷாயணி யானையை கௌரவிக்கும் விதமாக திருவனந்தபுரத்தில் வியாழக்கிழமை விழா நடத்த ஏற்பாடு செய்துள்ளது. அந்த விழாவில் அந்த யானைக்கு "பாட்டி யானை' என்ற பெயரையும் அந்த அமைப்பு சூட்டவுள்ளது.

இந்த நிகழ்ச்சியை தேவஸ்வம் துறை அமைச்சர் கடகம்பள்ளி சுரேந்திரன் தொடங்கி வைக்க உள்ளார். மாநில வனத் துறை அமைச்சர் கே.ராஜுவும் இந்த நிகழ்ச்சியில் பங்கேற்கிறார்.

மிக அதிக வயதுடைய தாக்ஷாயனி யானையை கின்னஸ் புத்தகத்தில் இடம்பெற வைக்கவும் தேவஸ்வம் வாரியம் விண்ணப்பித்துள்ளது என்று அந்தச் செய்திக்குறிப்பில் தெரிவிக்கப்பட்டுள்ளது. தாக்ஷாயணி யானையை திருவாங்கூர் தேவஸ்வம் வாரியத்துக்கு திருவாங்கூர் அரச குடும்பத்தினர் அன்பளிப்பாக வழங்கினர். அந்த யானை தற்போது திருவனந்தபுரத்தை அடுத்துள்ள செங்கல்லூர் மஹாதேவா கோயிலில் உள்ளது.

ஆசிய யானைகளின் சராசரி ஆயுட்காலம் 48 ஆண்டுகள்தான் என்பது குறிப்பிடத்தக்கது.

-
தினமணி