பணிக்கு திரும்பாவிட்டால் தகுதி நீக்கம்:வழக்குரைஞர்களுக்கு இந்திய பார் கவுன்சில் எச்சரிக்கை

தமிழகத்தில் நீதிமன்றப் புறக்கணிப்பில் ஈடுபட்டுள்ள வழக்குரைஞர்கள் தங்கள் போராட்டத்தை வெள்ளிக்கிழமைக்குள் (ஜூலை 22) திரும்பப் பெறாவிட்டால் அடிப்படை உறுப்பினர் பொறுப்பில் இருந்து தகுதி நீக்கம் செய்யப்படுவர் என்று பார் கவுன்சில் ஆஃப் இந்தியா (பிசிஐ) எச்சரிக்கை விடுத்துள்ளது.

வழக்குரைஞர்களுக்கு எதிராக சென்னை உயர் நீதிமன்றம் அண்மையில் அமல்படுத்திய சட்டத் திருத்தத்துக்கு எதிர்ப்புத் தெரிவித்து தமிழகம், புதுச்சேரி வழக்குரைஞர்களில் ஒரு பிரிவினர், நீதிமன்ற புறக்கணிப்புப் போராட்டத்தில் ஈடுபட்டு வருகின்றனர். இந்நிலையில், சென்னை உயர் நீதிமன்றத்தை முற்றுகையிடும் போராட்டத்தில் வரும் ஜூலை 25-ஆம் தேதி ஈடுபடப் போவதாக தமிழ்நாடு, புதுச்சேரி அனைத்து வழக்குரைஞர்கள் சங்கங்களின் கூட்டு நடவடிக்கைக் குழு அறிவித்துள்ளது.

இந்நிலையில், பிசிஐ தலைவர் மனன் குமார் மிஸ்ரா தில்லியில் புதன்கிழமை பிறப்பித்துள்ள உத்தரவு வருமாறு: தமிழ்நாடு, புதுச்சேரி ஆகியவற்றில் பணியாற்றும் வழக்குரைஞர்கள் தொடர் போராட்டங்களிலும், நீதிமன்றப் புறக்கணிப்பிலும் ஈடுபட்டு வருகின்றனர். போராட்டத்தைக் கைவிட பலமுறை அறிவுறுத்தியும் இதுவரை சம்பந்தப்பட்ட வழக்குரைஞர்கள் பணிக்குத் திரும்பவில்லை. வழக்குரைஞர்களின் போராட்டத்தால் வழக்குத் தொடுப்போர் மட்டுமன்றி அமைதியை விரும்பும் வழக்குரைஞர்களும் மிகுந்த வேதனைக்கு உள்ளாகியுள்ளனர். இதுபோன்ற போராட்டங்கள் சட்டத்துக்கு புறம்பானவை. எனவே, வரும் 22-ஆம் தேதிக்குள் போராட்டத்தை விலக்கிக் கொள்ளுமாறு தமிழ்நாடு, புதுச்சேரியில் போராட்டத்தில் ஈடுபட்டுள்ள வழக்குரைஞர்களுக்கு தமிழ்நாடு மற்றும் புதுச்சேரி பார் கவுன்சில் அறிவுறுத்த வேண்டும். இந்த உத்தரவை ஏற்று தமிழ்நாடு, புதுச்சேரி பார் கவுன்சில் உறுப்பினர்கள் வரும் 21-ஆம் தேதி போராட்டத்தை கைவிடுவதாக செய்தியாளர்கள் சந்திப்பில் தெரிவிக்க வேண்டும்.

இந்த உத்தரவை மீறி ஜூலை 22-ஆம் தேதிக்கு பிறகும் போராட்டத்தில் வழக்குரைஞர்கள் ஈடுபட்டால், சம்பந்தப்பட்டவர்களை இடைநீக்கம் செய்வது அல்லது அடிப்படை உறுப்பினர் பொறுப்பில் இருந்து தகுதி நீக்கம் செய்வது உள்ளிட்ட கடும் நடவடிக்கை எடுக்க வேண்டும் என மாநில பார் கவுன்சிலுக்கு உத்தரவிடப்படுகிறது. அந்த வழக்குரைஞர்கள் இனி வரும் காலங்களில் பார் கவுன்சில் சார்பில் நடத்தப்படும் தேர்தல்களில் போட்டியிட முடியாது என்பதையும் தெளிவுபடுத்துகிறோம். இதுதொடர்பான உத்தரவின் நகல், சென்னை உயர் நீதிமன்றத் தலைமைப் பதிவாளருக்கும் அனுப்பப்பட்டுள்ளது என உத்தரவில் குறிப்பிடப்பட்டுள்ளது.

தினமணி