சாரதா மேனனுக்கு ஒளவையார் விருது

-
மனநல மருத்துவர் எம்.சாரதா மேனனுக்கு ஒளவையார் விருது வழங்கப்பட்டது.

சர்வதேச மகளிர் தினத்தையொட்டி, 2012-ஆம் ஆண்டில் இருந்து முதல்வர் ஜெயலலிதா உத்தரவின்பேரில், சிறந்த சேவையாற்றுபவருக்கு ஒளவையார் விருது, ரூ.1 லட்சம் ரொக்கம், 8 கிராம் எடையுள்ள தங்கப் பதக்கம், சான்றிதழ்-பொன்னாடை ஆகியன ஆண்டுதோறும் வழங்கப்படுகிறது.

இதன்படி, நிகழாண்டுக்கான விருது வழங்கும் விழா சென்னை தலைமைச் செயலகத்தில் செவ்வாய்க்கிழமை நடைபெற்றது. இதில், மனநல மருத்துவர் எம்.சாரதா மேனனுக்கு விருதை முதல்வர் ஜெயலலிதா வழங்கினார்.

அப்போது ஜெயலலிதா பேசுகையில், “தங்களுக்கு விருதை வழங்குவதில் மகிழ்ச்சி. தாங்கள் பல ஆண்டுகள் நீண்ட உடல் நலத்துடன் இருந்து, மக்களுக்குச் சேவை ஆற்ற வேண்டும் என எல்லாம் வல்ல இறைவனை வேண்டுகிறேன்’ என்றார்.

இதையடுத்து, ஜெயலலிதாவுக்கு நன்றி தெரிவித்து, சாரதா பேசியது:-

ஒளவையார் விருதுக்கு தேர்ந்தெடுத்தமைக்கு மனமார்ந்த நன்றி. தங்களது எதிர்பார்ப்புகளை நிறைவேற்ற தொடர்ந்து முயற்சிப்பேன்.

மனநலன் பாதித்த-மாற்றுத் திறனாளிகளுக்கான அனைத்து வகையான சேவைகளையும் நிறைவேற்றித் தந்துள்ள முதல்வருக்கு நன்றி. 1995-ஆம் ஆண்டு ஸ்கார்ஃப் இந்தியா தொண்டு நிறுவனத்துக்காக முதல்வர் அளித்த உறுதுணைகளை நினைவுகூர்கிறேன்.

இதர மாற்றுத் திறனாளிகளுக்கு அளிக்கப்படும் அனைத்து நல உதவிகளும், மனநலன் பாதித்த மாற்றுத் திறனாளிகளுக்கும் சமமாகக் கிடைக்க என்ற முதல்வரின் அறிவிப்பு, மனநலன் பாதித்தோரின் எதிர்கால நல்வாழ்வின் நம்பிக்கை உற்றுகளாக உள்ளன.

தயாள குணம், இரக்க குணம், அக்கறை ஆகிய நிரம்பியுள்ள முதல்வர் ஜெயலலிதா, நீண்ட கால வாழ மிகுதியான உடல் நலத்தையும், அமைதியையும், வளத்தையும், ஞானத்தையும் பெற இறைவனைப் பிரார்த்திக்கிறேன் என்றார்.

நிகழ்ச்சியில், அமைச்சர் வி.சரோஜா, தலைமைச் செயலாளர் பா.ராம மோகன ராவ், அரசு ஆலோசகர் ஷீலா பாலகிருஷ்ணன் உள்ளிட்டோர் கலந்துகொண்டனர்.

நாட்டின் முதல் மனநல மருத்துவர்!

நாட்டின் முதல் பெண் மனநல மருத்துவர் எம்.சாரதா மேனன் ஆவார். பத்ம பூஷண் விருது உள்பட பல விருதுகளைப் பெற்றவர்.

1961-ஆம் ஆண்டு சென்னை மனநல நல மருத்துவ நிறுவனத்தின் முதல் பெண் கண்காணிப்பாளராக பணியில் சேர்ந்தார். அங்கு நோயாளிகளுக்கு புதிய தொழிற்பயிற்சிகளை அளித்தார். மனநோயாளிகளின் நல்வாழ்வுக்காக 1984-ஆம் ஆண்டு “ஸ்கார்ஃப்’ என்ற தொண்டு நிறுவனத்தை அவர் தொடங்கினார். இதனால், அவருக்கு ஒளவையார் விருது வழங்கப்பட்டுள்ளது.

தினமணி