மனிதன் இன்று நிலவில் காலடி வைத்த தினம்!

வானில் தெரியும் நிலவைக் காட்டி குழந்தைகளுக்கு உணவு ஊட்டுவர். அந்த நிலவையே தொட்டு சாதித்தார் நீல் ஆம்ஸ்ட்ராங்.47 ஆண்டுகளுக்கு முன் இதே நாளில் தான் முதன் முதலாக நிலவில் மனிதன் காலடி பதித்தான். அமெரிக்காவின் புளோரிடா மாகாணத்தில் இருந்து நாசா விண்வெளி மையத்தின் சார்பில் 1969, ஜூலை 16ம் தேதி அப்பல்லோ 11 என்ற விண்கலம் நிலவுக்கு பயணமானது.இதில் கமாண்டர் நீல் ஆம்ஸ்ட்ராங், பைலட் மைக்கேல் காலியன்ஸ் மற்றும் பைலட் எட்வின் ஆல்ட்ரின் ஆகிய மூன்று விண்வெளி வீரர்கள் பயணித்தனர்.

இந்த விண்கலம் ஜூலை 20ம் தேதி (இந்திய நேரம் நள்ளிரவு 12.48 மணிக்கு) நிலவில் இறங்கியது. 6 மணி நேரம் கழித்து, நீல் ஆம்ஸ்ட்ராங், விண்கலத்தில் இருந்து இறங்கி நிலவில் காலடி வைத்தார். இதன் அடையாளமாக, அமெரிக்காவின் தேசியக் கொடியையும் நிலவில் பறக்க விட்டார். பின் 20 நிமிடம் கழித்து எட்வின் ஆல்ட்ரின் நிலவில் இறங்கினார்.

யார் முதலிடம்

1957 அக்., 4ல் 'ஸ்புட்னிக் 1' என்ற உலகின் முதல் செயற்கைக்கோளை, சோவியத் யூனியன் விண்ணுக்கு அனுப்பி சாதனை படைத்தது. இதன்பின் 1961ல் அமெரிக்கா தனது முதல் செயற்கைக்கோளை விண்ணுக்கு அனுப்பியது.

பின் சோவியத் யூனியனுக்கும், அமெரிக்காவுக்கும் இடையே நடந்த பனிப்போரின் விளைவாக, இருநாடுகளும் பலத்தை நிரூபிக்கும் விதமாக போட்டிபோட்டு நிலவுக்கு விண்கலத்தை அனுப்பின. இதன் ஒரு கட்டமாக 1969ல் அமெரிக்கா, நிலவுக்கு மனிதனை அனுப்பி, சாதனை மைல்கல்லில் தனி இடம்
பிடித்தது.


6 ஆண்டு உழைப்பு

அப்பல்லோ -11 விண்கலத்தை தயாரிப்பதற்கு ஆன செலவு '20 பில்லியன்' டாலர். இதனை உருவாக்குவதற்கு 6 ஆண்டுகள் ஆனது. 195 மணி, 18 நிமிடம், 35 வினாடிகள் இதன் பயணம் நீடித்தது. 8 நாட்களுக்கு பின், ஜூலை 24ல், கொலம்பியாவில் வெற்றிகரமாக இந்த விண்கலம் தரை இறங்கியது. விண்வெளியில் வீரர்கள் தங்களின் உணவுக்கு பாகர் (பன்றி இறைச்சி), சுகர் குக்கீஸ், பைன் ஆப்பிள், திராட்சை ஜூஸ் மற்றும் காபி ஆகியவற்றை எடுத்துக்கொண்டனர்.

யார் அந்த 3 வீரர்கள்

* நீல் ஆம்ஸ்ட்ராங் 1930, ஆக. 5ல் பிறந்தார். பி.எஸ்., (ஏரோநாட்டிக்கல் இன்ஜினியரிங்) , எம்.எஸ்., (ஏரோஸ்பேஸ் இன்ஜினியரிங்) படித்தவர்.

* எட்வின் ஆல்ட்ரின் 1930, ஜன. 20ல் பிறந்தார். இவரும் பி.எஸ்., பட்டதாரி. நிலவில் இறங்கிய இரண்டாவது மனிதன் என்ற பெருமை பெற்றவர்.

* மைக்கேல் காலியன்ஸ் 1930, அக்., 31ல் இத்தாலியில் பிறந்தார். இவரும் பி.எஸ்., பட்டதாரி. 'அப்பல்லோ 11' பயணத்துக்கு பின் அமெரிக்காவின் 'நேஷனல் ஏர் அண்ட் ஸ்பேஸ் மியூசியத்தின் நிர்வாக இயக்குனராக பணியாற்றினார்.

தினமலர்