பூக்க மறந்த பூக்கள்

by சசி Fri Jul 15, 2016 11:25 am

ஆயிரமாயிரம் கனவுகள்
நிறைவேறும் என்ற
நம்பிக்கைகள் இவையாவும்
நமக்கானவை அல்ல
என்ற புரிதல்களோடு
வாழ்வின் எதிர்பார்ப்புகள்
ஒரு வேளை உணவின்
தேடலில் உலகத்து
இன்பத்தை எய்தும் மொட்டுகள்!!

கயவர்களின் வன்ம
பார்வைக்கு விலகி
ஒதுங்க இடமில்லாமல்
சாலையோரமாய் ஒதுங்கி
தன் வதனத்தையும்
தன் அந்தரங்கத்தையும்
மறப்பதற்கு கிழிசல்களை
தேடித் தேடித் தொலைவதிலும்
கருகும் மொட்டுகள்!!

இரவின் ஒளியில்
இச்சையை தீர்த்துக் கொள்ள
நினைக்கும் காம
வெறியர்களின்
பிடியில் விலகி
நித்திரைக்கான இடத்தை
தேடித் தேடியும்
அலையும் காம்புகள்!!

ஏடு எடுத்து பள்ளி செல்லும்
குழந்தைகளை ஏக்கமாய்
பார்வைகள்
ஈரமுள்ளவர்களின் நெஞ்சை
பிளக்கும்!!

அழகான தோட்டத்தில்
பூக்க வேண்டிய பூக்கள்
சாலையோரத்தில்
காய்ந்த சருகாய்
இலையுதிர்ந்த மரமாய்
புன்னகையை மறந்து
பூக்க மறந்த பூக்களாய்
புவிதனில் இன்றும்
கருகி கொண்டு தான்
இருக்கிறது சாலையோர மொட்டுகள்!!

சசி....