சட்டசபை 21ம் தேதி கூடுகிறது? 2016-17ம் ஆண்டு பட்ஜெட் தாக்கல்

சென்னை:
தமிழக அரசின் 2016-2017ம் ஆண்டுக்கான பட்ஜெட்
வரும் 21 அல்லது 22ம் தேதி சட்டசபையில் தாக்கல்
செய்யப்படும் என்று கூறப்படுகிறது.

பட்ஜெட் கூட்டத் தொடர் ஒரு மாதம் வரை நடக்கும் என்றும்
கூறப்படுகிறது.தமிழகத்தில் கடந்த மே 16ம் தேதி சட்டமன்ற
பொதுத்தேர்தல் நடைபெற்றது. இதில் அதிமுக அதிக
இடங்களை கைப்பற்றி, முதல்வர் ஜெயலலிதா தலைமையில்
மீண்டும் ஆட்சி அமைக்கப்பட்டது.

இதைத்தொடர்ந்து, இந்த ஆண்டுக்கான முதல் சட்டப்பேரவை
கூட்டம் கடந்த மாதம் 16ம் தேதி நடைபெற்றது.
அன்றைய தினம் தமிழக கவர்னர் ரோசய்யா உரையாற்றினார்.
இதைத்தொடர்ந்து கவர்னர் உரைக்கு நன்றி தெரிவிக்கும்
தீர்மானத்தின் மீதான விவாதம் 4 நாட்கள் நடைபெற்று, சட்டசபை
ஒத்திவைக்கப்பட்டது.

இந்நிலையில், தமிழக அரசின் 2016-2017ம் ஆண்டுக்கான பட்ஜெட்
கூட்டத் தொடர் அடுத்த வாரம் நடைபெறலாம் என்று தெரிகிறது.
இதுகுறித்து, தமிழக சட்டப்பேரவை செயலக உயர் அதிகாரி ஒருவர்
கூறும்போது, ‘‘வரும் 21 அல்லது 22ம் தேதி தமிழக பட்ஜெட் தாக்கல்
செய்யப்படலாம்” என்றார்.

இதற்கான அதிகாரப்பூர்வ அறிவிப்பை சட்டப்பேரவை செயலாளர்
ஜமாலுதீன் இன்னும் ஒரு சில தினங்களில் வெளியிடலாம்.
நிதி அமைச்சர் ஓ.பன்னீர்செல்வம் 2016-2017ம் ஆண்டுக்கான
பட்ஜெட்டை தாக்கல் செய்வார். அதைத்தொடர்ந்து பட்ஜெட் மீதான
விவாதம் 4 நாட்கள் நடைபெறும்.

அதைத் தொடர்ந்து, துறை வாரியான மானிய கோரிக்கை மீதான
விவாதங்கள் நடைபெறும். இந்த கூட்டத் தொடர் ஒரு மாதம் வரை
நடைபெறும்.

இந்த தொடரில் காரசார விவாதத்துக்கு பஞ்சம் இருக்காது.
குறிப்பாக தமிழகத்தில், சமீபத்தில் நடைபெற்று வரும் கூலிப்
படையினரின் தொடர் கொலைகள், கொள்ளை, வழிப்பறி சம்பவங்கள்
மற்றும் ஆந்திர அரசு பாலாற்றின் குறுக்கே தடுப்பணை கட்டுவது,
டாஸ்மாக் கடைகளால் பொதுமக்களுக்கு ஏற்படும் பாதிப்பு உள்ளிட்ட
பல்வேறு பிரச்னைகளை பற்றி விவாதிக்க எதிர்க்கட்சிகள்
திட்டமிட்டுள்ளன.
-
---------------------------------
தினகரன்