உலகின் முதல் செயற்கைக்கால் யானை!

-
செயற்கைக்காலை மனிதர்களுக்கு பொருத்திக் கேள்விப்பட்டிருக்கிறோம்.
ஆனால் 5000 கிலோ எடை கொண்ட யானைக்குப் பொருத்துவதை
யோசித்தாவது பார்த்திருப்போமா?
-
இப்படி ஒரு சம்பவம் தாய்லாந்தில் நடந்திருக்கிறது, பொருத்தியிருக்கிறார்கள்.
நடக்க வைத்து யானையையும் வாழ வைத்திருக்கிறார்கள்.
இதற்கான காரணத்தையும் விளக்கத்தையும் அறியவேண்டாமா?
-
2007ம் ஆண்டு நடந்த கண்ணி வெடித் தாக்குதலில் மோஷா எனும் ஏழு மாத பெண் யானை ஒரு காலை இழந்தது. தற்போது 9 வயதாகும் மோஷாவுக்கு தாய்லாந்தில் உள்ள ஆசிய யானைகள் மருத்துவமனையில் செயற்கைக் காலைப் பொருத்தியிருக்கிறார்கள்.

உலகிலேயே செயற்கைக் கால் மூட்டு பொருத்தப்பட்ட முதல் யானை மோஷாதான். ஆனால் கால் பொருத்தப்பட்டபின், மோஷா சரியாக உணவு உட்கொண்டு இயல்பு வழக்கத்திற்கு திரும்புமா என்ற சந்தேகம் மருத்துவக்குழுவிற்கு இருந்திருக்கிறது. மோஷா செயற்கைக் காலு`க்கு இசைந்து வாழப் பழகி ஏறத்தாழ 6 ஆண்டுகளாகிறது.

இந்த சிகிச்சையைத் தந்த மரு.தெர்ட்சாய் ஜீவாகேட் முன்பு மனிதர்களுக்கு செயற்கைக் கால்களைத் தயாரித்து வந்தவர் ஆவார். மோஷா இன்று அணிந்திருக்கும் செயற்கைக் காலும் இவரது பெருமைக்குரிய ஆக்கமே.

செயற்கைக் காலை உருவாக்கும் முன்பு, காலில்லாமல் நகர முடியவில்லை என்றால் அவள் இறந்துவிடுவாள் என்பதே யதார்த்தமாக இருந்தது. ‘‘கால் இல்லாத நிலையிலும் மோஷா தும்பிக்கையை காற்றில் வீசியபடி எழ முயன்று கொண்டிருந்த காட்சிதான் என்னை அதற்கான செயற்கைக் காலை உருவாக்கத் தூண்டியது’’ என நெகிழ்கிறார் தெர்ட்சாய்.

மரத்தூள், தெர்மோபிளாஸ்டிக், உலோகங்கள் கலந்து யானையின் எடையை உத்தேசித்து அதற்கு ஏற்ப நடக்க ஏதுவாக சிறப்பான முறையில் தயாரிக்கப்பட்டுள்ள இந்த செயற்கைக் காலின் எடை 15 கிலோவாகும்.

கண்ணிவெடித் தாக்குதலால் காயம்பட்ட 15க்கும் மேற்பட்ட யானைகள், தாய்லாந்திலுள்ள ஆசிய யானைகள் மருத்துவமனையில் சிகிச்சை பெற்றுள்ளன. மோஷாவுக்கு அடுத்து 2009ம் ஆண்டு மோட்டாலா என்ற யானைக்கும் செயற்கைக்கால் பொருத்தப்பட்டது.

யானைகள் காலை இழந்து தவிக்கும் பரிதாப நிலைக்கு காரணம், தாய்லாந்து – கம்போடியா எல்லைப்பகுதியில் புதைக்கப்பட்டுள்ள கண்ணிவெடிகள்தான். 1979ம் ஆண்டிலிருந்து இதுவரை இங்கு நிகழ்ந்த கண்ணிவெடித் துயரங்களின் எண்ணிக்கை 64 ஆயிரம் என்றால் பார்த்துக்கொள்ளுங்கள்.

‘‘இந்தப் பகுதியில் கை, கால் மூட்டு துண்டிக்கப்பட்டு வாழ்ந்து வருபவர்களின் எண்ணிக்கையே 25 ஆயிரத்தைத் தாண்டி விட்டது’’ என ஹாலோ எனும் கண்ணிவெடி அகற்றும் அமைப்பு தன் ஆய்வு முடிவில் தெரிவித்துள்ளது. இப்பூவுலகு நமக்கானது மட்டுமல்ல என்பதை மனிதர்கள் உணர்வது எப்போது?

– கா.சி.வின்சென்ட்

முத்தாரம்
-