19 புதிய அமைச்சர்கள் பதவியேற்பு:ஸ்மிருதி இரானி இலாகா மாற்றம் ஜாவ்டேகருக்கு கேபினட் அந்தஸ்து

பிரதமர் நரேந்திர மோடி தலைமையிலான மத்திய அமைச்சரவை செவ்வாய்க்கிழமை மீண்டும் மாற்றியமைக்கப்பட்டது. இதில் 19 பேர் புதிய அமைச்சர்களாக பதவியேற்றுக் கொண்டனர். மத்திய இணையமைச்சர்கள் 5 பேரின் பதவி பறிக்கப்பட்டது.

மத்திய நிதியமைச்சர் அருண் ஜேட்லியின் வசம் கூடுதலாக இருந்த தகவல் மற்றும் தொழில்நுட்பத் துறை நாடாளுமன்ற விவகாரத்துறை அமைச்சர் வெங்கய்ய நாயுடு வசம் ஒப்படைக்கப்பட்டுள்ளது.

சர்ச்சைக்குரிய அமைச்சரான ஸ்மிருதி இரானியிடமிருந்து மனித வள மேம்பாட்டுத் துறை பறிக்கப்பட்டு, அவருக்கு ஜவுளித்துறை ஒதுக்கப்பட்டுள்ளது. கேபினட் அமைச்சராக பதவி உயர்த்தப்பட்டுள்ள பிரகாஷ் ஜாவ்டேகரிடம், மனித வள மேம்பாட்டுத் துறை அளிக்கப்பட்டுள்ளது.

மத்தியில் பிரதமர் நரேந்திர மோடி தலைமையிலான தேசிய ஜனநாயகக் கூட்டணி அரசு கடந்த 2014-ஆம் ஆண்டு மே மாதம் பதவியேற்றது. அதையடுத்து, மத்திய அமைச்சரவை 2-ஆவது முறையாக செவ்வாய்க்கிழமை மாற்றம் செய்யப்பட்டது.

தில்லியில் குடியரசுத் தலைவர் மாளிகையில் செவ்வாய்க்கிழமை நடைபெற்ற விழாவில், பிரதமர் நரேந்திர மோடி முன்னிலையில் புதிய அமைச்சர்கள் 19 பேரும் பதவியேற்றுக் கொண்டனர். அவர்களுக்கு குடியரசுத் தலைவர் பிரணாப் முகர்ஜி பதவிப் பிரமாணமும், ரகசியக் காப்பு பிரமாணமும் செய்து வைத்தார்.

உத்தரப் பிரதேசம், உத்தரண்ட் மற்றும் குஜராத் ஆகிய மாநிலங்களின் சட்டப் பேரவைகளுக்கு அடுத்த ஆண்டு தேர்தல் நடைபெறவுள்ளதால், அதைக் கருத்தில் கொண்டு அமைச்சரவையில் அந்த மாநிலங்களைச் சேர்ந்தவர்களுக்கு முக்கியத்துவம் அளிக்கப்பட்டுள்ளது.

ராஜஸ்தானைச் சேர்ந்த 4 பேரும், உத்தரப் பிரதேசம், குஜராத், மத்தியப் பிரதேசம் மாநிலங்களில் இருந்து தலா 3 பேரும், தில்லி, மகாராஷ்டிரத்திலிருந்து தலா 2 பேரும் புதிய அமைச்சர்களாகப் பொறுப்பேற்றுள்ளனர்.

இதைத் தவிர கர்நாடகம், உத்தரகண்ட் ஆகிய மாநிலங்களைச் சேர்ந்த எம்.பி.க்கள் இருவரும் மத்திய அமைச்சரவையில் புதிதாக இணைந்துள்ளனர்.

அமைச்சரவையில் புதிதாக சேர்க்கப்பட்டுள்ளவர்களில் 5 பேர் தலித் சமூகத்தைச் சேர்ந்தவர் ஆவர். இதர பிற்படுத்தப்பட்ட வகுப்பை (ஓபிசி) சேர்ந்த எம்.பி.க்கள் பலரும் அமைச்சரவையில் சேர்க்கப்பட்டுள்ளனர்.

காங்கிரஸ் புறக்கணிப்பு:

பதவியேற்பு விழாவில், குடியரசுத் துணைத் தலைவர் ஹமீது அன்சாரி, பாஜக தேசியத் தலைவர் அமித் ஷா, மத்திய அமைச்சர்கள், பாஜக மூத்த தலைவர்கள் உள்ளிட்டோர் கலந்துகொண்டனர். அதே நேரத்தில் காங்கிரஸ் சார்பில் இந்த விழாவில் எவரும் பங்கேற்கவில்லை.

புதிய அமைச்சர்கள் யார்?: பாஜகவின் மூத்த தலைவர்களான விஜய் கோயல், ஃபக்கன் சிங் குலஸ்தே, எஸ்.எஸ்.அலுவாலியா, தேசிய செய்தித் தொடர்பாளர் எம்.ஜே.அக்பர், பி.பி.செளதரி, அஜய் டம்டா, அர்ஜுன் ராம் மேக்வால், கிருஷ்ணா ராஜ், ரமேஷ் சி ஜிகாஜினாகி, சி.ஆர்.செளதரி, ஏ.எம்.தவே, மகேந்திரநாத் பாண்டே, புருஷோத்தம் ரூபாலா, ஜே.பாபோர், மன்சுக்பாய் மண்டவியா, ராஜன் கோஹெய்ன், எஸ்.ஆர்.பாம்ரே ஆகியோருக்கு மத்திய அமைச்சரவையில் வாய்ப்பு வழங்கப்பட்டுள்ளது.

இதைத்தவிர, பாஜக தலைமையிலான தேசிய ஜனநாயகக் கூட்டணியில் அங்கம் வகிக்கும் அப்னா தளக் கட்சியைச் சேர்ந்த அனுப்ரியா படேல், இந்தியக் குடியரசுக் கட்சி (அதாவலே) தலைவர் ராமதாஸ் அதாவலே ஆகியோரும் அமைச்சரவையில் சேர்க்கப்பட்டுள்ளனர்.

புதிய அமைச்சர்களில் விஜய் கோயல், ஃபக்கன் சிங் குலஸ்தே உள்பட 6 பேர் வழக்குரைஞராவர். எஸ்.ஆர்.பாம்ரி புற்றுநோய் மருத்துவராவார். உள்துறை, நிதி, பாதுகாப்பு, மின்சாரம் உள்ளிட்ட முக்கியத் துறைகளில் இந்த முறை எந்தவிதமான மாற்றமும் செய்யப்படவில்லை. மத்திய சட்ட அமைச்சர் சதானந்த கௌடா புள்ளியியல் துறைக்கு மாற்றப்பட்டார். அவர் வசமிருந்த சட்ட இலாகா மத்திய அமைச்சர் ரவிசங்கர் பிரசாதிடம் வழங்கப்பட்டுள்ளது.

மத்திய விளையாட்டுத் துறை அமைச்சராக இருந்த சர்வானந்தா சோனோவால், அஸ்ஸாம் முதல்வராக பதவியேற்றதால் காலியான அவரது பதவி விஜய் கோயலுக்கு அளிக்கப்பட்டது.மத்திய சுற்றுச்சூழல் துறை இணையமைச்சராக (தனிப்பொறுப்பு) இருந்து வந்த பிரகாஷ் ஜாவடேகருக்கு கேபினட் அந்தஸ்து வழங்கப்பட்டுள்ளது.

மத்திய அமைச்சரவையில் பிரதமர் மோடியுடன் சேர்த்து 64 பேர் இடம்பெற்றிருந்தனர். அவர்களில், 5 பேரின் பதவி பறிக்கப்பட்டது. 19 பேருக்கு புதிதாக வாய்ப்பளிக்கப்பட்டது. இதையடுத்து, மத்திய அமைச்சரவையில் இடம்பெற்ற அமைச்சர்களின் எண்ணிக்கை 78ஆக அதிகரித்துள்ளது.lsikps
-
தினமணி