இராக் குண்டு வெடிப்புகளில் 119 பேர் பலி

by **ayyasamy ram** Mon Jul 04, 2016 9:12 am

இராக் தலைநகர் பாக்தாதில் ஞாயிற்றுக்கிழமை நிகழ்த்தப்பட்ட இரு குண்டு வெடிப்புகளில் 119 பேர் உயிரிழந்தனர்.

பாக்தாதில் பிரபல வணிக மையங்கள் அமைந்துள்ள கராடா பகுதியில் நிகழ்த்தப்பட்ட கார் குண்டு வெடிப்பில் 114 பேர் பலியாகினர்.

அந்தத் தாக்குதலில் ஏராளமான கட்டடங்கள் சேதமடைந்தன. 160 பேர் காயமடைந்தனர்.

ரம்ஜான் பண்டிகையையொட்டி கடை வீதிகளில் மக்கள் கூட்டம் அதிகமாக இருந்தது.

உயிரிழந்தவர்களில் 15 சிறுவர்கள், 10 பெண்கள், 6 காவலர்கள் அடங்குவர் என்று அதிகாரிகள் தெரிவித்தனர்.

இங்கு ஏற்பட்ட சக்தி வாய்ந்த குண்டு வெடிப்பைத் தொடர்ந்து, செல்லிடப்பேசிகள் மற்றும் துணிகள் விற்பனை செய்யும் கடைகளில் தீப்பிடித்தது.

இந்தத் தாக்குதலுக்கு இஸ்லாமிய தேச பயங்கரவாதிகள் பொறுப்பேற்றனர். ஷியா பிரிவினருக்கு எதிராகத் தாக்குதல் நிகழ்த்தப்பட்டதாக, அந்த பயங்கரவாத அமைப்பின் வலைதளத்தில் குறிப்பிடப்பட்டது.

தலைநகரின் கிழக்குப் பகுதியில் நிகழ்த்தப்பட்ட மற்றொரு குண்டு வெடிப்பில் 5 பேர் உயிரிழந்தனர். 16 பேர் காயமடைந்தனர்.

இந்தத் தாக்குதலுக்கு எந்த அமைப்பும் பொறுப்பேற்கவில்லை.

குண்டு வெடிப்பு நிகழ்ந்த இடங்களை இராக் பிரதமர் ஹைதர் அல்-அபாதி பார்வையிட்டார்.

அந்நாட்டில் முக்கியத்துவம் வாய்ந்த ஃபலூஜா நகரை இஸ்லாமிய தேச பயங்கரவாதிகளின் கட்டுப்பாட்டிலிருந்து பாதுகாப்புப் படையினர் வெற்றிகரமாக மீட்ட சில நாட்களிலேயே, தலைநகரில் பெரும் உயிரிழப்புகளை ஏற்படுத்திய இரு குண்டு வெடிப்புகள் நிகழ்ந்திருப்பது குறிப்பிடத்தக்கது.

போர்முனைகளில் பயங்கரவாதிகளுக்கு எதிராக இராக் பாதுகாப்புப் படையினர் வெற்றி பெற்றாலும், அந்நாட்டில் மக்கள் வசிக்கும் நகர்ப்புறங்களில் பெருத்த உயிர்ச் சேதத்தை ஏற்படுத்தும் திடீர் பயங்கரவாதத் தாக்குதல்கள் தொடர் கதையாக உள்ளது.

தினமணி