எல்லை தாண்டி மீன் பிடிக்க தமிழக மீனவர்களுக்கு அனுமதி: இலங்கை அரசு பரிசீலனை

இலங்கைக் கடல் பகுதிக்குள் இந்திய மீன்பிடிப் படகுகளை அனுமதிப்பதற்கான உரிமத்தை வழங்க அந்நாட்டு அரசு பரிசீலித்து வருவதாக ஊடகத் தகவல்கள் வெளியாகியுள்ளன.

இதன் மூலம் உரிமம் பெற்ற இந்தியப் படகுகள், இலங்கை கடல் எல்லைக்குள் சென்று மீன் பிடிக்கலாம் எனத் தெரிகிறது.

சர்வதேச கடல் எல்லையைத் தாண்டி வந்து மீன் பிடித்ததாகக்
கூறி இலங்கை கடற்படையால் தமிழக மீனவர்கள் கைது
செய்யப்படும் நடவடிக்கைகள் தொடர்கதையாக உள்ளன.

இதைத் தவிர தமிழக மீனவர்களின் வலைகளை அவர்கள்
சேதப்படுத்துவதும், படகுகளைப் பறிமுதல் செய்வதும்
அன்றாடம் அரங்கேறும் சம்பவங்களாக இருக்கின்றன.

இலங்கைக் கடற்படையினரின் இத்தகைய செயல்பாடுகளைக்
கண்டிக்குமாறும், கைதான தமிழக மீனவர்களை விடுவிக்க
நடவடிக்கை எடுக்குமாறும் மத்திய அரசுக்கு தமிழக முதல்வர்
ஜெயலலிதா ஒவ்வொரு தருணத்திலும் வலியுறுத்தி வருகிறார்.

பாக் நீரிணை (பாக் ஜலசந்தி) பகுதியில் மீன்பிடிப்பதற்கு
தமிழர்களுக்கு இருக்கும் வரலாற்று உரிமையை இலங்கை அரசு
அங்கீகரிக்காமல் விடாப்பிடியாக செயல்படுகிறது என்று
பிரதமருக்கு அண்மையில் எழுதிய கடிதத்தில் ஜெயலலிதா
குற்றம்சாட்டியிருந்தார்.

அனுமதி வழங்கத் திட்டம்: இதனிடையே, இலங்கைக் கடல் பகுதிக்குள்
இந்தியாவைச் சேர்ந்த குறிப்பிட்ட மீன்பிடிப் படகுகள் எல்லை தாண்டி
வருவதற்கு அனுமதி வழங்க இலங்கை அரசு திட்டமிட்டுள்ளதாகத்
தெரிகிறது.

இதன் மூலம் சட்டவிரோதமாக மீன் பிடித்தல், அனுமதியின்றி சர்வதேச
கடல் பகுதிகளுக்குள் ஊடுருவுதல் உள்ளிட்ட குற்றங்கள் குறையலாம்
என எதிர்பார்க்கப்படுகிறது.

அதற்கான உரிமங்களை இந்தியப் படகுகளுக்கு வழங்க இலங்கை முடிவு
செய்திருப்பதாக "சண்டே டைம்ஸ்' பத்திரிகை செய்தி வெளியிட்டுள்ளது.

இதுகுறித்து இலங்கை பாதுகாப்புத் துறைச் செயலர் கருணசேனா
ஹெட்டியாரச்சி தெரிவித்ததாக அந்தப் பத்திரிகையில் குறிப்பிடப்
பட்டிருந்ததாவது:

இந்திய மீன்பிடிப் படகுகள் இலங்கை கடல் பகுதிக்குள் வருவதற்கு உரிமம்
வழங்குவது குறித்து பரிசீலிக்கப்பட்டு வருகிறது. அதேவேளையில்,
அந்தத் திட்டம் மீது இன்னமும் இறுதி முடிவு எடுக்கப்படவில்லை.

இந்த விவகாரம், இருநாடுகளுக்கும் இடையே நிலவும் உணர்வுரீதியான
விஷயம் என்பதால் மிகக் கவனமாக கையாள வேண்டியுள்ளது.

மீன்பிடிப் படகுகளுக்கு உரிமம் வழங்கும் விவகாரம் தொடர்பான தொழில்
நுட்ப திட்ட அறிக்கை விரைவில் தயார் செய்யப்பட்டு வெளியுறவுத் துறை
வாயிலாக இந்திய அரசிடம் சமர்ப்பிக்கப்படும் என்று கருணசேனா
தெரிவித்ததாக அந்தச் செய்தியில் குறிப்பிடப்பட்டுள்ளது.

இந்த உத்தேசத் திட்டம் குறித்து இரு நாடுகளுக்கும் இடையே பேச்சு
வார்த்தை நடந்தாலோ அல்லது இந்த விவகாரத்தை அடுத்த கட்டத்துக்கு
முன்னெடுத்தாலோ இலங்கை மீனவர் அமைப்புகள் கடுமையாக எதிர்க்கும்
என்று "சண்டே டைம்ஸ்' நாளிதழ் கருத்து தெரிவித்துள்ளது.
-
-----------------------------------
தினமணி