நைஜீரியா நாட்டில் 2 இந்திய என்ஜினீயர்கள் துப்பாக்கி முனையில் கடத்தல் தீவிரவாதிகள் கடத்திச் சென்றனர்

விசாகப்பட்டினம்,

நைஜீரியா நாட்டில் 2 இந்திய என்ஜினீயர்கள் தீவிரவாதிகளால் கடத்திச் செல்லப்பட்டனர்.
ஆந்திர என்ஜினீயர்கள்

ஆப்பிரிக்க நாடான நைஜீரியாவின் சில பகுதிகளில் தீவிரவாதிகள் ஆதிக்கம் செலுத்தி வருகின்றனர். இங்குள்ள பெனியூ மாகாணத்தின், போகோ நகரின் டான்கோட் சிமெண்டு ஆலையில் ஆந்திர மாநிலம் விசாகப்பட்டினம் நகரைச் சேர்ந்த சாய் சீனிவாஸ், அனிஷ் சர்மா என்ற 2 என்ஜினீயர்கள் கடந்த 3 ஆண்டுகளாக பணியாற்றி வந்தனர்.

இருவரும் அங்குள்ள சிபோக் நகரில் தங்கியிருந்து தினமும் வேலைக்குச் சென்று வருவது வழக்கம். அவர்கள் இரவு நேர ‘ஷிப்ட்’டில் பணியாற்றி வந்தனர்.
துப்பாக்கி முனையில் கடத்தல்

கடந்த புதன்கிழமை மாலை வழக்கம்போல் இருவரும் பணிக்கு புறப்பட்டுச் சென்றனர். அவர்களின் கார் போகோ நகரில் ஓரிடத்தில் சிக்னலுக்காக நின்றது.

அப்போது அங்கு வந்த தீவிரவாதிகள் என சந்தேகிக்கப்படும் நபர்கள் சிலர் துப்பாக்கி முனையில் இருவரையும் கடத்திச் சென்றனர்.

பணம் கேட்டு மிரட்டுவதற்காக நைஜீரியாவில் இதுபோல் வெளிநாட்டவர்களை தீவிரவாதிகள் கடத்திச் செல்வது வழக்கம். அதுபோல் அவர்கள் கடத்திச் செல்லப்பட்டு இருக்கலாம் என்று கருதப்படுகிறது. ஆனால் கடத்தியவர்கள் பணம் கேட்டு மிரட்டியதாக இதுவரை தகவல் எதுவும் இல்லை.
தொடர்பு கொள்ள முடியவில்லை

கணவரிடம் வழக்கமாக தினமும் போனில் தொடர்பு கொண்டு பேசும் சாய் சீனிவாசின் மனைவி லலிதா கடந்த புதன்கிழமை இரவு தொடர்பு கொண்டபோது கணவரை தொடர்பு கொள்ள முடியவில்லை. நேற்று முன்தினமும் இதே நிலைதான் நீடித்தது.

இதனால் அதிர்ச்சியடைந்த லலிதா, தனது கணவர் வேலை பார்த்து வந்த சிமெண்டு ஆலை அதிகாரிகளுக்கு நேற்று முன்தினம் காலை போன் செய்து கேட்டு இருக்கிறார். அப்போதுதான் அவரும், அவருடைய நண்பரும் கடத்திச் செல்லப்பட்ட தகவலை அவர்கள் தெரிவித்து இருக்கின்றனர்.
மீட்க நடவடிக்கை

இதைத்தொடர்ந்து விசாகப்பட்டினம் மாவட்ட கலெக்டர் யுவராஜை, லலிதா சந்தித்து நைஜீரியாவில் கடத்தப்பட்ட தனது கணவரை மீட்டுத்தர வேண்டும் என்று கண்ணீர் மல்க கோரிக்கை விடுத்தார்.

மாவட்ட கலெக்டர் உடனடியாக இது குறித்து வெளியுறவு அமைச்சகத்துக்கும், நைஜீரியாவில் உள்ள இந்திய தூதரகத்துக்கும் தகவல் தெரிவித்தார்.

இதையடுத்து நைஜீரிய அதிகாரிகள் கடத்தப்பட்ட என்ஜினீயர்கள் இருவரையும் மீட்கும் நடவடிக்கைகளை முடுக்கிவிட்டு உள்ளனர்.
-
தினத்தந்தி

என்னே தீவிர வாதிகளின் துணிவு துணிச்சல் அவர்களை அடக்குவார்______________?