பயிற்சியாளர் பதவிக்கான நேர்காணல்: சாஸ்திரி, கும்ப்ளே, மூடி பங்கேற்பு

-
இந்திய கிரிக்கெட் அணியின் தலைமைப் பயிற்சியாளர் பதவிக்கான நேர்காணல் கொல்கத்தாவில் செவ்வாய்க்கிழமை நடைபெற்றது.

அதில் இந்திய அணியின் முன்னாள் இயக்குநர் ரவி சாஸ்திரி, முன்னாள் கேப்டன் அனில் கும்ப்ளே, முன்னாள் ஆஸ்திரேலிய வீரர் டாம் மூடி உள்ளிட்டோர் பங்கேற்றனர்.

முன்னாள் கேப்டன் செளரவ் கங்குலி, சச்சின் டெண்டுல்கர், வி.வி.எஸ்.லட்சுமண் ஆகியோர் அடங்கிய பிசிசிஐ கிரிக்கெட் ஆலோசனைக் கமிட்டி இந்த நேர்காணலை நடத்தியது. இவர்களில் சச்சின் லண்டனில் இருப்பதால் விடியோ கான்பரன்ஸ் மூலம் நேர்காணல் நடத்தினார்.

இதில் அனில் கும்ப்ளே நேரடியாக பங்கேற்றார். அதேநேரத்தில் ரவி சாஸ்திரி வெளிநாட்டில் இருப்பதால் ஸ்கைப் மூலம் நேர்காணலில் பங்கேற்று தனது பயிற்சி திட்டங்கள் குறித்து விளக்கினார். இதேபோல் முன்னாள் ஆஸ்திரேலிய வீரர்கள் ஸ்டூவர்ட் லா, டாம் மூடி ஆகியோர் விடியோ கான்பரன்ஸ் மூலம் நேர்காணலில் கலந்து கொண்டு தங்கள் தரப்பு திட்டங்கள் குறித்து தெரிவித்தனர்.

அதேநேரத்தில் இந்திய அணியின் தேர்வுக்குழு தலைவர் சந்தீப் பாட்டீல் நேர்காணலுக்கு அழைக்கப்படவில்லை. ஒரே நாளில் நேர்காணல் முடிந்தது.

இது தொடர்பாக கங்குலி கூறியதாவது: பயிற்சியாளர் பதவிக்கான நேர்காணல் செவ்வாய்க்கிழமையோடு முடிந்தது. 10 பேரிடம் நேர்காணல் நடத்தினோம். அவர்கள் அனைவரும் தங்களின் பயிற்சி திட்டங்கள் குறித்து எங்களிடம் விளக்கிக் கூறினர். நாங்கள் உடனடியாக இறுதிப் பட்டியலை தயார் செய்துவிடுவோம். அந்தப் பட்டியலை பிசிசிஐ செயலாளரிடம் சமர்ப்பிப்போம்’ என்றார்.

பயிற்சியாளர் பதவிக்கு இறுதி செய்யப்பட்டவர்களின் பட்டியல் பிசிசிஐயிடம் புதன்கிழமை அளிக்கப்படும் என தெரிகிறது. புதிய பயிற்சியாளர் யார் என்பது குறித்து அறிவிப்பு வரும் 24-ஆம் தேதி வெளியாகும் என எதிர்பார்க்கப்படுகிறது

-தினமணரி